Исми сир қолиш шарти билан Озодликка гапирган Тошкентдаги хусусий ширкат эгаларидан бири, 20-23 ноябрь кунлари ўтказиладиган “Осиё Қуëш энергияси форуми” меҳмонларига хизмат кўрсатиш учун ўз Малибу машинасини ҳайдовчиси билан 18-25 ноябрь кунлари “Тошшаҳартрансхизмат” бирлашмаси ихтиëрига топширишга мажбурланаëтганини маълум қилди.
20-23 ноябр кунлари Тошкентда Осиë Тараққиëт банкига аъзо бўлган 30 давлат намояндаларининг “Осиё Қуëш энергияси форуми”нинг навбатдаги 6-йиғини бўлиб ўтади.
Ўзбекистон ҳукуматининг Осиë тараққиëт банки¸ Халқаро энергетика агентлиги ва БМТнинг Саноат тараққиëти бўйича агентлиги билан ҳамкорликда ўтказилаëтган бу тадбирда хорижлик юзлаб сиëсатчи ва олимларнинг иштирок этиши кутилмоқда.
Ана шу тадбирни “юксак даража”да ўтказиш мақсадида Вазирлар Маҳкамаси кўрсатмаси асосида Тошкентда жиддий ҳозирлик бошлаб юборилган.
Озодликка маълум бўлишича¸ мазкур йиғин меҳмонларига Ўзбекистонда ишлаб чиқарилаëтган энг сўнгги русумдаги автомобиллар хизматини ташкил этиш ҳозирликнинг муҳим қисмига айланган.
Озодликка мурожаат қилган Тошкентда рўйхатга олинган хусусий ширкат эгаларидан бирининг билдиришича¸ келадиган бу меҳмонларга ўзбек машиналарини кўз-кўз қилиш учун Малибу ва Каптива русумидаги машинаси бор ва ҳокимликларда юридик шахс сифатида рўйхатга олинган хусусий тадбиркорлар машинаси бир ҳафтага тортиб олинмоқда.
Ўз хавфсизлигидан чўчиб¸ исми-шарифи ва ширкати номи сир қолишини сўраган бу манбага кўра¸ Ўзбекистон Бош вазирининг 1-ўринбосари Рустам Азимов имзо чеккан расмий хатда унинг исми-шарифи ва машинасининг давлат рақами қайд қилинган (бу маълумот қўлда ëзилган –таҳр.) ва ана шу хат асосида ундан ўз машинасини хатда ëзилган вақтда¸ белгиланган жойга ҳайдовчиси билан етказиш талаб қилинган.
Мазкур манба Озодликка Рустам Азимов қўл қўйгани акс этган ушбу расмий фармойиш нусхасини ҳам жўнатди.
Вазирлар Маҳкамасининг “Вазирлик¸ идора¸ ҳокимликлар¸ давлат-акционерлик ширкатлари¸ ташкилот ва муассасалар раҳбарларига” аталган 02/1-684 сонли бу фармойишига 2013 йилнинг 6 ноябрь куни Рустам Азимов имзо чеккан.
Зикр этилган тизим раҳбарларидан “Осиë Қуëш энергияси форуми”нинг Тошкентда ўтказилажак 6-мажлиси қатнашчиларини транспорт воситаси билан таъминлашни ташкиллаштириш сўралган бу хатда¸ ўз машинасини топшириши лозим бўлган шахс ва унга хизмат кўрсатаëтган машинанинг давлат рақами ëзилган.
Бундан эса¸ машинасини давлат форуми хизматига бериш талаб қилинаëтган ҳар бир хусусий ширкат эгасининг номи ва машинасининг давлат рақами шахсан Бош вазирнинг 1-ўринбосари Рустам Азимов имзо чеккан хатда белгиланган бўлиб чиқади.
Табиийки¸ бундай буйруққа бўйсунмаслик¸ шахсан Бош вазир ўринбосари фармойишига қаршилик сифатида талқин этилади ва юридик шахсларнинг уни қабул қилмасликдан ўзга чораси қолмайди.
Тошкент шаҳар ҳокимиятидан олинган маълумотга кўра¸ ҳозирда бу форумни ўтказиш бўйича шаҳар штаби тузилган ва ҳар бир район ҳокимлигида ҳоким ўринбосарлари бу штабга бириктирилган.
Тошкентдаги айрим туман ҳокимликлари расмийлари¸ Рустам Азимов имзо чеккан фармойишнинг мавжудлиги¸ бу ҳужжат асосида айнан кимларнинг машинаси 18-25 ноябрь кунлари хизматга жалб қилинишига оид рўйхат ҳам тузилганини тасдиқладилар. Аммо хусусий ширкат эгаларининг ўз Малибу ва Каптива русумли машиналарини ҳайдовчиси билан бир ҳафталик текин хизматга топширишга мажбурланаëтганликларини изоҳлашни истамадилар.
“Осиё Қуëш энергияси форуми”нинг 6-мажлиси меҳмонларини транспорт билан таъминлашга масъул бўлган расмийлардан бири Озодликка ҳокимиятда юридик шахс сифатида рўйхатга олинган хусусий тадбиркорлардан ҳам Малибу ва Каптива машиналарини бир ҳафтага “Тошшаҳартрансхизмат”га топшириш талаб қилинаëтганини тасдиқлади.
Унинг айтишича¸ “Ўзбекистон конституциясига кўра¸ давлат учун хизмат қилиш унда яшаëтган барча фуқаронинг бош масъулияти ва бу хизматдан бош тортганлар¸ тегишли идоралар томонидан тегишли жазога тортилмай қолмайди”.
Бу расмийга кўра¸ айни кунларда ҳам давлат идоралари¸ айни пайтда хусусий тадбиркорларга қарашли Малибу ва Каптива русумли автомашиналарини рўйхатга олиш¸ уларни техник кўрикдан ўтказиш¸ ҳайдовчиларга трейнинг бериш жараëни бошланган.
Ҳозирча уч кунлик халқаро форум учун давлат муассасалари ва хусусий тадбиркорларга қарашли Малибу ва Каптива машиналарининг нега тўлиқ бир ҳафтага тортиб олинаëтганига оид ҳеч қандай изоҳ берилмади.
14 ноябрь куни Озодликка мурожаат қилган яна бир тошкентлик хусусий тадбиркор ҳам ўзига қарашли Hundai Elentra ва Toyota Corolla машиналари 18-25 ноябрь кунлари ҳайдовчиси билан топшириш ҳақида фармойиш олганини маълум қилди.