Тошкент шаҳри туманларида 10 ноябрдан ташқи реклама объектларини демонтаж қилиш жараёни бошланди.

Миробод тумани ҳокимлиги “пойтахт ташқи қиёфаси кўркамлигини сақлаб қолиш”, “кўчаларда хавфсизликни ошириш” мақсадида Нукус, Шаҳрисабз, Фарғона йўли ва бошқа қатор кўчаларда жойлашган кўп қаватли уйларнинг фасад қисми, пиёдалар йўлакларида ўрнатилган 120 дан ортиқ ноқонуний реклама ва турли эълонлар баннерлари демонтаж қилингани ҳақида маълумот тарқатди.

Яккасарой ҳокимлиги ҳам “ноқонуний баннер ва рекламалар бартараф этилаётгани” ҳақида ҳисобот берди.

Пойтахт ҳокимлиги Gazeta.uz нашрига бир кун ичида Яккасарой, Мирзо Улуғбек, Миробод ва Чилонзор туманларида 1600 дан ортиқ объект демонтаж қилинганини билдирган.

Демонтаж ишлари 25 октябрь куни қабул қилинган ташқи реклама объектларининг дизайн коди муносабати билан амалга оширилаётгани айтилмоқда. Халқ депутатлари Тошкент шаҳри кенгаши томонидан тасдиқланган ҳужжатда ташқи реклама турлари, объектларнинг габарити ва уларни жойлаштириш қоидаларини белгиланган.

Айни пайтда ижтимоий тармоқларда тадбиркорлар демонтаж ишлари огоҳлантиришсиз олиб борилаётгани, тегишли қонуний асос кўрсатилмаётгани, ҳатто марказ ва муассасаларнинг пешлавҳалари ҳам реклама деган иддао билан олиб ташланаётганидан норозилик билдирган.

Наманган вилоятида рўй берган поезд ва автомобиль тўқнашуви оқибатида 63 ёшли ҳайдовчи ҳалок бўлди.

Фожиа 9 ноябрь куни эрталаб Уйчи – Чортоқ темирйўл бекатлари оралиғининг 118-километридаги қўриқланмайдиган темирйўл кесишмасида рўй берган, дея маълум қилди вилоят ИИБ ЙҲХБ.

Йўл ҳаракати хавфсизлиги идораси версиясига кўра, 1961 йилда туғилган ҳайдовчи Damas русумли автомашинани бошқариб, “Тўхташ” ишораси белгисига амал қилмай темирйўлда ҳаракатланиб келаётан тепловознинг юк вагонига урилган. Оқибатда у оғир жароҳатланиб воқеа жойида вафот этган.

“Электровоз машинисти тезкорлик билан шошилинч тормозни босган, аммо тўқнашувнинг олдини олиш иложи бўлмаган”, дея вазиятга ойдинлик киритган “Ўзбекистон темирйўллари” АЖ матбуот хизмати.

Наманган вилоятида бундан 6 йил аввал ҳам Damas ва поезд тўқнашуви рўй берганди.

2018 йил 8 октябрь куни Поп тумани Уйғур қишлоғи ҳудудида жойлашган қўриқланадиган темирйўл кесишмасида рўй берган тўқнашувда енгил автомобилда бўлган йўловчилардан 2 нафари ҳалок бўлган, 5 нафари эса оғир жароҳат билан касалхонага ётқизилган эди.

Кадастр агентлигининг Наманган вилояти Тўрақўрғон тумани бўлими бошлиғи Жобир Маҳмудов 5 йилга қамалди ва 2 йил муддатга давлат ташкилотларида масъул лавозимда ишлаш ҳуқуқидан маҳрум этилди.

Суд Маҳмудов Ўзбекистон Жиноят кодексининг 210-моддаси 2-қисми “в” бандида (тамагирлик йўли билан пора олиш) назарда тутилган жиноятни содир этган, деб топган.

Kun.uz нашрининг суд ҳужжатига таянган ҳолда ёзишича, Тўрақўрғон тумани кадастр идораси раҳбари ер участкасини ўзбошимчалик билан эгаллаб, фойдаланиб келган фуқарога 51 миллион сўм жарима қўлланишини билдирган. Фуқаро тегишли ҳужжатларни расмийлаштираётганини айтиб, мулозимдан жарима қўлламасликни сўраган.

Кадастр идораси раҳбари иш қўзғатмаслик эвазига тўйи бўлаётган бир ходимига тўёна беришни талаб қилган.

Фуқаро фарзандларига ўқув қуроллари олиш учун танишидан 100 доллар қарз кўтаргани, шу маблағни беришини айтган. Бўлим бошлиғи яна 300 доллар “тўёна” талаб қилган.

Суд ҳужжатларига кўра, Жобир Маҳмудов 2024 йил 22 август куни Тўрақўрғон тумани Оқтош маҳалласи ҳудудида ўзининг Lacetti машинасида 300 долларни пора тариқасида олгани ортидан ушланган.

Эслатиб ўтамиз, Ўзбекистонда “Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида”ги қонун кучга кириши муносабати билан куни кеча аҳолига мурожаатнома йўллаган Кадастр агентлиги директори Фаррух Пўлатов эндиликда тизимда таниш-билишчилик бўлмаслигига ваъда берган эди.

Ўзбекистон урушда жабрланган фаластинлик болалар ва аёлларни ўз шифохоналарида беғараз даволашга тайёр. Бу ҳақда президент Шавкат Мирзиёев 11 ноябрь куни Саудия Арабистони пойтахти Ар-Риёд шаҳрида бўлиб ўтган навбатдан ташқари араб-ислом саммитидаги нутқида гапирди.

Президент матбуот хизматининг маълум қилишича, Ўзбекистон раҳбари Фаластин ва Ливан ҳудудидаги мислсиз гуманитар инқирознинг олдини олиш учун давлатлар ҳамда халқаро ташкилотлар томонидан ёрдам кўламини кенгайтириш лозимлигини урғулаган. Хусусан, БМТнинг катта тажрибага эга бўлган махсус агентлиги ва бошқа институтлари фаолиятига зарурий кўмакни оширишни таклиф қилган.

“Дунё ҳамжамиятининг қатъий ҳаракат ва чақириқларига қарамасдан, халқаро меъёрлар ва резолюцияларнинг қўпол равишда бузилиши давом этмоқда. Уруш олови эндиликда Ливан ҳудудини ҳам қамраб олгани барчамизни қаттиқ ларзага солмоқда”, дея Яқин Шарқдаги жорий вазият юзасидан хавотир изҳор қилган Мирзиёев.

У “минг-минглаб бегуноҳ болалар, аёллар ва кексалар ўлимига сабаб бўлаётган бу вайронкор ва мудҳиш ҳужумлар инсоният янги тарихининг энг қора саҳифасига айланаётгани”ни ҳам айтган.

Фаластин халқи “1967 йилдаги чегаралар доирасида, пойтахти Шарқий Қуддус бўлган мустақил ва озод давлатини тузишга тўла ҳақли” эканини қайд этган Мирзиёев Ўзбекистон Фаластин – Исроил муаммосини икки давлат тамойили орқали ечиш тарафдори эканини яна бир карра таъкидлаган.

Шавкат Мирзиёев 24 октябрь куни Россия мезбонлигида ўтган “БРИКС плюс” саммитидаги нутқида ҳам Ғазо сектори ва Ливандаги вазият юзасидан хавотир билдирган, тинч аҳоли, айниқса, болаларнинг бегуноҳ қурбон бўлишини ҳеч қандай сиёсий мақсадлар оқлай олмаслигини қайд этганди.

Марказий ҳарбий округда жойлашган “Фориш” тоғ полигонида Ўзбекистон ва Қозоғистон ҳарбий хизматчиларининг ҳамкорликдаги махсус-тактик ўқув машғулотларига старт берилди.

Ўзбекистон Мудофаа вазирлиги матбуот хизмати маълумотига кўра, “Ханжар-2024” деб номланган ўн кунлик махсус-тактик ўқув давомида икки давлат ҳарбий хизматчилари турли жанговар қуроллардан отиш, шартли аҳоли яшаш ҳудудида жанг олиб бориш ва ҳаракатларни таҳлил қилиш жараёнларини амалга оширади.

Сўнгги йилларда икки давлат қуролли кучлари ҳамкорликда бир неча бор ўқув машғулотлари ташкил қилган. Масалан, ўтган йилнинг май ойида Тошкент ҳарбий округининг “Ангрен” дала ўқув майдонида, 2023 йил август ойида эса Қозоғистоннинг “Оймаша” полигонида махсус-тактик ўқувлар ўтказилган.

Озодлик жорий йил июль ойида Манғистау вилоятида Қозоғистон, Ўзбекистон, Озарбайжон, Қирғизистон ва Тожикистон ҳарбийлари иштирокида қўшма машғулотлар ўтказилгани ҳақида хабар қилганди. Бу машқлар минтақа давлатларининг умумий хавфсизлик муаммоларини Россия, Хитой, Эрон каби кучлар ёрдамисиз ҳал қилишга интилиши ўлароқ баҳоланган.

Самарқанд вилояти Пастдарғом туманида яшовчи оиланинг тўрт нафар аъзоси овқатдан заҳарланди.

Жорий йил 1 ноябрида рўй берган ва бир боланинг ўлими билан якунланган ҳодисадан жамоатчилик эндиликда хабар топмоқда.

“Севимли” телеканали орқали эфирга узатиладиган “Замон” информацион дастурида берилган лавҳада қайд этилишича, Пастдарғом тумани Манғитобод маҳалласида яшовчи оиланинг тўрт аъзоси – эр-хотин ва икки бола уй шароитида тайёрланган консерва маҳсулотларини истеъмол қилиши ортидан соғлиғи ёмонлашган.

Шундан сўнг улар шифохонага ётқизилган ва текширувларда ботулизм хасталиги аниқланган. Шифохонада оиланинг кенжа фарзанди вафот этган.

Юқумли касалликлар шифохонаси вакили бола талваса синдромидан вафот этганини айтган.

Аммо туман санитария идораси бошлиғи Бурҳон Умаров бола заҳарланишдан вафот этгани, юқумли касалликлар шифохонаси шифокорлари ташхис қўйишда адашганини таъкидлаган.

Ҳолатга доир бошқа тафсилотлар очиқланмаган.

Эслатиб ўтамиз, ботулизм касаллиги асосан уй шароитида тайёрланган сабзавот ва мева консервалари, дудланган балиқ ва гўшт маҳсулотларини истеъмол қилиш оқибатида келиб чиқади. Ботулизм умумий инфекцион интоксикация, ошқозон-ичак трактининг бузилиши ва неврологик синдромлар кўринишида намоён бўлади. Ботулизм кўп ҳолларда ўлимга олиб келади.

Озодлик аввалроқ Фарғона вилояти Ўзбекистон туманида ҳот-дог истеъмол қилгани ортидан тўрт киши заҳарлангани ҳақида хабар берганди.

Ўзбекистонда қамоққа олиш эҳтиёт чораси оммавий қўлланаётгани сабаб вақтинчалик сақлаш изоляторлари тўлиб кетган. Бу ҳақда Олий суд раиси Бахтиёр Исломов 9 ноябрь куни адвокатлар билан очиқ мулоқот чоғида гапирди, дея хабар қилди “Адвокат” журнали.

Исломовга кўра, тергов ҳибсхоналарининг тўлиб кетиши илк бор 2001 йилда кузатилган.

“Ўшанда вақтинча сақлаш жойларидаги шарт-шароитни ўрганиш учун идоралараро комиссия тузилган эди. Ҳозир ҳам ўшанга ўхшаш вазият бўляпти. Лекин муаммо янги тергов ҳибсхоналарини қуриш билан ҳал қилинмаслиги керак”, деган Олий суд раиси.

Адвокатлар қамоқ эҳтиёт чорасини қўллашда суиистеъмолчиликларга йўл қўймаслик учун айблов органи зиммасига гумонланувчи терговдан қочиши ёки гувоҳларга босим ўтказиши мумкинлигини исботлаб бериш каби аниқ мажбуриятлар юклашни таклиф қилган.

Қайд этилишича, Олий суд раиси мулоқот давомида Ўзбекистонда фаолият юритувчи судьяларда ҳақиқий айбдорларни жазолаш учун баъзан қатъият етишмаётгани, уларнинг малакаси ҳали талаб даражасида эмаслигини ҳам тан олган.

Олий суд матбуот хизмати тарқатган маълумотга кўра, очиқ мулоқот чоғида суд жараёнида жисмоний ва юридик шахсларни ишончли ва малакали ҳимоя ҳуқуқи билан таъминлаш чоғида юзага келаётган муаммолар ва уларнинг ечимлари, одил судловга эришиш борасида адвокатларнинг ўрни ва ролини янада ошириш ҳамда суд мажлисларида тортишув тамойилига тўлиқ риоя этилишига доир масалалар муҳокама қилинган.

Олий суд раиси билан учрашув ортидан адвокатлар Бош прокурорни ҳам тергов соҳасидаги тизимли муаммолар юзасидан очиқ мулоқотга чорлаган.

Ўзбекистонда “Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида”ги қонун кучга кириши ортидан Кадастр агентлиги директори Фаррух Пўлатов фуқароларига мурожаатнома йўллади.

“Узоқ йиллар давомида ўзи яшаб келаётган уйини расмийлаштириб олишни ният қилиб юрган ҳалол инсонлар кўп аммо, вазиятдан фойдаланиб, ноқонуний йўллар билан даромад қилишни режа қилиб юрган “уддабуронлар” ҳам йўқ эмас. Сизларни бундай нопок кимсаларнинг ҳар қандай сўзлари ва ваъдаларига ишонмасликка чақираман!” дейилган мулозим мурожаатида.

Кадастр агентлиги директори таъкидича, маҳаллаларда хатлов аниқ тасдиқланган режа-график асосида, ўн бешдан ортиқ вазирлик ва идора назоратида ўтказилади ва бу жараёнда “тезлаштириб бериш”, “иложини қилиб ўтказиш”, “таниш-билиш” каби ҳолатларга йўл қўйилмайди.

Кадастрга масъул мулозим фуқароларга фирибгарлик, тамагирлик ёки коррупция ҳолатлари юзасидан ҳуқуқни муҳофаза қилиш органларига хабар беришни эслатган.

“Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида”ги қонун Ўзбекистонда жорий йил 8 ноябридан кучга кирган.

Мазкур қонунга кўра, фуқаролар қуйидаги кўчмас мулкларни ўз номига (ижара ва мулк ҳуқуқи асосида) қонуний ўтказиб олиши мумкин:

• 2018 йил 1 май кунигача якка тартибдаги уй-жой қуриб ўзбошимчалик билан эгаллаган ер ҳамда ундаги бино ва иншоотлар;

• 2018 йил 1 май кунигача фуқаролар ва ташкилотлар томонидан ҳужжатда кўрсатилган майдондан ортиқча эгалланган ер ҳамда ундаги бино ва иншоотлар;

• “бир марталик акция” доирасида ҳуқуқларни эътироф этиш охирига етмаган ер ҳамда ундаги бино ва иншоотлар;

• 2021 йил 8 июнга (ҳокимларнинг ваколати бекор қилингунига) қадар туман (шаҳар) ҳокимлари қарори билан ажратилган, лекин вилоят ҳокими ёки халқ депутатлари Кенгаши томонидан тасдиқланмаган ер;

• боғдорчилик ва узумчилик ширкатлари ҳудудидаги турар жойлар ҳамда улар эгаллаган ер;

• кичик саноат зоналари ҳудудига 2020 йил 9 мартгача жойлаштирилган тадбиркорларнинг ери;

• давлат ордери билан хусусийлаштирилган бинолар ва уйлар эгаллаган ер;

• ҳоким қарори билан мулк ҳуқуқи эътироф этилган бинолар ва уйлар эгаллаган ер участкаси.

10 ноябрь куни Россиянинг Пенза вилоятида Ўзбекистон фуқаролари иштирокида йўл-транспорт ҳодисаси рўй берди.

Ўзбекистоннинг Қозондаги бош консулхонаси маълумотига кўра, М-5 федерал трассасининг 738-километрида рўй берган авария оқибатида 3 киши воқеа жойида ҳалок бўлган. Улардан бирининг ўзбекистонлик бўлгани маълум, икки марҳумнинг Ўзбекистон фуқаролигига мансублиги аниқланмоқда.

Шунингдек, жароҳатланган икки йўловчи Пенза вилояти Кузнецк туманлараро шифохонасига ётқизилган.

Бош консуллик ҳалок бўлганларнинг жасадларини ватанга қайтариш ва жабрланганларга тиббий муолажа кўрсатишни назоратга олганини билдирган.

Пенза вилояти Давлат автомобиль назорати хизматининг аниқлик киритишича, 1970 йилда туғилган эркак бошқарувидаги “КамАЗ” ва 1996 йилда туғилган эркак бошқарувидаги“Cobalt автомашиналари тўқнашган. Оқибатда Cobalt ҳайдовчиси ва унинг икки йўловчиси (1980 ва 1965 йилда туғилган эркаклар) вафот этган. Яна икки йўловчи – 1995 йилда туғилган аёл ва эркак (унинг шахси аниқланмоқда) шифохонага ётқизилган.

Озодлик аввалроқ Қозоғистоннинг Манғистау вилояти ҳудудида рўй берган ЙТҲ оқибатида Ўзбекистоннинг олти фуқароси ҳалок бўлгани, яна тўрт нафари шифохонага ётқизилгани ҳақида хабар қилганди.

Daryo.uz нашри ҳисоб-китобига кўра, 2017-2022 йиллар орасида Қозоғистон ва Россияда рўй берган автоаварияларда 80 нафар ўзбекистонлик ҳалок бўлган.

Ўзбекистон президенти Шавкат Мирзиёев 11-13 ноябрь кунлари халқаро саммитларда иштирок этиш мақсадида Саудия Арабистони ва Озарбайжонга боради. Бу ҳақда президент матбуот хизмати маълум қилган.

Саудия Арабистонида Мирзиёев Ғазо ва Ливандаги вазиятнинг кескинлашуви ҳамда Яқин Шарқдаги можарога тез фурсатда ечим топиш чораларини ишлаб чиқишга бағишланган навбатдан ташқари Араб-ислом саммитида қатнашади. 11 ноябрь куни бўлиб ўтадиган бу анжуманга Ўзбекистон президенти Саудия Арабистони подшоҳи Салмон бин Абдулазиз ас-Сауд томонидан таклиф этилган. Расмий хабарномага мувофиқ, Мирзиёев душанба тонгида Ар-Риёдга жўнаб кетган.

Жорий йилнинг 12-13 ноябрь кунлари эса Шавкат Мирзиёев озарбайжонлик ҳамкасби Илҳом Алиев таклифига биноан БМТнинг Иқлим ўзгариши бўйича ҳадли конвенцияси Томонлари конференциясининг 29-сессияси (COP29) тадбирларида иштирок этиши кутилмоқда.

“Ўзбекистон Президентининг мазкур саммитларда нутқ сўзлаши, шунингдек, хорижий давлатлар ва халқаро ташкилотлар раҳбарлари билан бир қатор учрашувлар ўтказиши режалаштирилган”, дейилган президент матбуот хизмати ёйинлаган хабарномада.

Шахматчи Афруза Ҳамдамова ёшлар ўртасидаги жаҳон чемпионатида яна бир тарихий натижага эришди, дея маълумот тарқатди Ўзбекистон шахмат федерацияси.

Ўн беш ёшли Афруза Бразилияда 28 октябрдан 10 ноябрга қадар бўлиб ўтган ўсмирлар ўртасидаги FIDE жаҳон чемпионатининг 16 ёшгача қизлар баҳсларида муддатидан олдин чемпион бўлди.

У 11 та партиядан 10,5 очко тўплаган (10 та ғалаба ва 1 дуранг).

Бу Самарқанд шахмат мактаби тарбияланувчиси Афруза Ҳамдамованинг иккинчи бор шахмат шоҳсупасига кўтарилишидир. У 2023 йилда Италияда ўтказилган 14 ёшгача бўлган ёшлар ўртасидаги жаҳон чемпионатида ҳам ғолиб чиққан ва аёллар орасида ўзбекистонлик биринчи жаҳон чемпионига айланган эди.

Унга қадар Гулруҳбегим Тоҳиржонова ва Баҳора Абдусатторова қўлга киритган кумуш медаль мамлакат шахматчи аёллари эришган энг юқори натижа бўлган.

Жорий йилнинг 6 ноябрь куни Бош прокуратура ҳузуридаги Департаментнинг Фарғона вилояти Қўқон шаҳар бўлими ва Қўқон шаҳар ИИБ томонидан ўтказилган амалиёт чоғида блогер Комил Аҳмедов ҳибсга олинган. Бу ҳақда Озодликка ҳуқуқни муҳофаза қилиш органларидаги исми очиқланмасликни сўраган манба маълум қилди.

Манбага кўра, Комил Аҳмедов ўзининг ижтимоий тармоқлардаги саҳифасида Қўқон шаҳар Чархий кўчасидаги кўп қаватли уйнинг пастида жойлашган 3-сонли дорихонада таъқиқланган психотроп дорилар сотилаётгани ҳақида хабар қилган. Дорихона мутасаддилари блогер билан боғланиб, хабарни ўчиришни сўрашган.

Хабарда шаҳардаги дорихоналарда трамадол, лирика сингари таъқиқланган препаратлар яширинча сотилаётгани айтилади.

Тергов органининг дастлабки суриштирувларига кўра, дорихона эгаси ҳуқуқни муҳофаза қилиш органларига блогер хабарни ўчириш учун 5000 АҚШ доллари талаб қилганини айтган ва у пулнинг бир қисмини олаётган пайтда ушланган.

Блогер Аҳмедовга нисбатан Ўзбекистон Жиноят Кодексининг 165-моддаси 2-қисми (Товламачилик) билан жиноят иши қўзғатилиб, терговга қадар текшириш олиб борилмоқда.

Қўқон шаҳар ИИБнинг навбатчилик қисми блогерга оид бу ҳодисани тасдиқламади, бироқ инкор ҳам қилгани йўқ.

Ижтимоий тармоқларда блогер Комил Аҳмедовнинг ҳибсга олиниши жараёни акс этган видео тарқалди. Унда блогернинг қўлига кишан солингани ва ҳуқуқни муҳофаза қилиш органлари ходимлари экани англашилган кишилар ҳамроҳлигида олиб кетилаётганини кўриш мумкин.

Блогернинг ҳибсга олиниши билан боғлиқ бошқа тафсилотлар маълум эмас. Аммо ҳодиса ва расмий тергов ўтмишда бошқа блогерларга нисбатан илгари сурилган айбларни ёдга солади.

Биргина ўтган йилнинг ўзида Ўзбекистонда 10 дан зиёд блогер таъмагирлик айблови билан қамоққа ташланган.

Халқаро ташкилотлар ушбу жиноят ишлари сўз эркинлиги билан боғлиқ эканини таъкидлашади, аммо ўзбек расмийлари уларнинг блогерлик фаолияти учун эмас, балки жиноий қилмиши учун жазоланганини иддао қилиб келадилар.

Қорақалпоғистон Республикаси Тахиатош тумани ҳокимининг ўринбосари Ғулом Бектемиров 1 йил давлат идораларида мансабдорликда ишлаш ҳуқуқидан маҳрум этилган ҳолда 5 йилу 2 ой муддатга озодликдан маҳрум этилди.

Суд уни Жиноят кодексининг 167-моддаси 3-қисми “а” банди, 209-моддаси (мансаб сохтакорлиги) 1-қисми, 206-моддаси (ҳокимият ёки мансаб ваколати доирасидан четга чиқиш) 1-қисмида назарда тутилган жиноятларни содир қилганликда айбдор деб топган.

Kun.uz нашрининг суд ҳужжатларига таянган ҳолда хабар қилишича, халқ депутатлари Тахиатош тумани кенгашининг 2023 йил 23 июнидаги қарори билан “Universal Energo Ғaiz Stroy” МЧЖ тумандаги ижтимоий соҳа объектларини куз-қиш мавсумида иситиш тизимларини амалга оширишда хусусий шерик сифатида киритилган. Сўнгра туман ҳокимлиги ва МЧЖ ўртасида жами 12 миллиард 440 миллион сўмлик (шундан 6 миллиард 220 миллион сўми бюджет маблағи) давлат-хусусий шериклик битими тузилган.

Мазкур битимда тумандаги 49 та ижтимоий соҳа объектида 173 та янги иситиш қозони ўрнатилиши ва иситиш тизимлари модернизация қилиниши, кўмир учун омборхона қурилиши ҳамда бошқа таъмирлаш ишлари бажирилиши белгиланган. Аммо ҳоким ўринбосари Ғулом Бектемиров МЧЖ раҳбари Аманбай Карашаев билан тил бириктирган ҳолда лойиҳа-смета ҳужжатларида назарда тутилган ишларни тўлиқ бажармасдан, сохта ҳисоб-фактура тайёрлашган.

Шу тариқа 760 миллион сўм бюджет маблағи ўзлаштириш ва растрата йўли билан талон-торож қилинган.

Ҳоким муовини, шунингдек, ҳокимлик балансида бўлган ва режавий бузилишга тушган уйни бузиш ҳамда ундан чиққан материалларни сотиш ваколатини берувчи ҳужжатларни расмийлаштириб бериш эвазига маҳаллий фуқародан 32 миллион сўм олган.

35 ёшли Ғулом Бектемиров 2022 йил май ойидан Тахиатош тумани ҳокимининг қурилиш, коммуникациялар, коммунал хўжалиги, экология ва кўкаламзорлаштириш масалалари бўйича ўринбосари лавозимида ишлаб келган.

Аввалроқ Сирдарё вилояти Ховос тумани ҳокими ўринбосари 7 йилга қамалгани, Қашқадарё вилояти Деҳқонобод тумани ҳокими муовини эса 5 минг доллар пора билан ушлангани хабар қилинганди.

Президент Шавкат Мирзиёев 7 ноябрь куни қишлоқ хўжалигида сув ва энергия ресурсларидан унумли фойдаланиш масалалари юзасидан йиғилишда мамлакатдаги каналларни бетонлаш юзасидан топшириқ берди.

Президент матбуот хизмати ёйинлаган маълумотга кўра, йиғилишда мамлакатдаги 18 минг километр магистрал ва 94 минг километр ички каналларни бетонлаш зарурлиги, ноябрь-март ойлари бетонлаш учун энг қулай вақтлиги уқтирилган.

Ўзбекистон каналларда йилига 13 миллиард куб метр сув йўқотиляпти. Бу Андижон, Навоий, Наманган, Самарқанд ва Сирдарёнинг бир йил ишлатадиган сувига тенгдир.

Масъул идораларга 66 та магистрал канал лойиҳаси ва экспертизасини якунлаб, қурилиш ишларини тез фурсатда бошлаш, бунга арзон цемент етказиб беришни ташкил қилиш топширилган.

Ҳокимлар олдига фермер ва кластерлар билан биргаликда 1 апрелгача 15 минг километр ички ариқларни бетон қопламага ўтказиш вазифаси қўйилган.

Келгуси йилда бетонлашга 800 миллиард сўм ажратилиши белгиланган.

Таъкидланишича, мутасаддилар каналларни бетонлашга ажратилаётган ҳар бир сўмни мақсадли, тежамкорлик билан тўғри ишлатиш зарурлиги ҳақида огоҳлантирилган.

Ҳисоб-китоблар 550 километр канал ва ариқлар бетонлангани ортидан йилига 450 миллион куб метр сув иқтисод бўлаётганини кўрсатган.

Ўзбекистон Экологик партияси Тошкентда атмосфера ҳавоси ифлосланиши юзасидан хавотир билдириб, Экология вазирлиги ҳамда Бош прокуратурадан бу борада тезкор чора кўришни сўради.

Экопартияга кўра, Тошкент шаҳри ҳавосининг куз-қиш ойларида кўпроқ ифлосланаётганига зарарли ташламалар, турғун манбалар ва транспорт воситалари кўпроқ сабаб бўлмоқда. Партия иқтисодиёт тармоқлари ва аҳолининг энергия ресурсларига бўлган талаби ортиши сабаб углеводородлар ва кўмир ёқилғисидан фойдаланишнинг ошиши кузатилаётганини ҳам қўшимча қилган.

Тошкент шаҳри атрофида 1314 гектар майдонда 631 та иссиқхона фаолият юритяпти. Уларнинг 60 фоизи кўмирдан, баъзан эса резина шиналар ва бошқа ёнувчи воситалардан фойдаланяпти. Экопартия таъкидича, шаҳар ҳавосининг ёмонлашувига ушбу иссиқхоналарнинг таъсири кўп.

Шунингдек, ҳаво ифлосланишига кўп саноат корхоналарида ускуналарнинг эскиргани ва аксар корхоналар замонавий фильтрлар ўрнатмаётгани сабаб қилиб кўрсатилган.

Айни пайтда ўзбекистонлик иқтисодий таҳлилчилари ҳаво ифлосланиши муаммосининг туб илдизи энергетика соҳасидаги ислоҳотлар билан боғлиқ эканини таъкидлаб келади.

Озодлик учинчи ноябрга ўтар кечаси Тошкент шаҳри ҳавосида заҳарли заррачалар миқдори 780 мкг/м3 даражагача ошгани, ифлосланишнинг асосий сабаби бўлмиш PM2,5 заррачаси ЖССТ тасдиқлаган меъёрдан 93,2 баробардан ортиб кетгани ҳақида хабар берганди.

Жаҳон банки ҳисоботига қараганда, Тошкентда PM2,5 майда заррали чанглар таъсири оқибатида йилига ўртача 3042 киши бевақт вафот этади.