Муҳаммад Бекжонга Чегара билмас мухбирлар мукофоти топширилди
Мукофотни Муҳаммад Бекжоннинг қизи қабул қилиб олди.
Муҳаммад Бекжонга Чегара билмас мухбирлар мукофоти топширилди
Чегара билмас мухбирлар ташкилоти 3 май - халқаро матбуот эркинлиги куни арафасида Ўзбекистонда қамоқда қолаётган мухолифатчи журналист Муҳаммад Бекжонни матбуот эркинлиги халқаро мукофоти билан тақдирлади.
АҚШда бўлиб ўтган тақдирлаш маросимида мукофотни Муҳаммад Бекжон номидан унинг қизлари Ойгул ва Иноят қабул қилиб олди. Муҳаммад Бекжон 2013 йилда Чегара билмас мухбирлар ташкилотининг Матбуот эркинлиги мукофоти билан тақдирланган эди.
Қароргоҳи Парижда бўлган "Чегара билмас мухбирлар" ташкилоти февраль ойида эълон қилинган жаҳон мамлакатларидаги матбуот эркинлигини баҳоловчи навбатдаги йиллик ҳисоботида ҳам Муҳаммад Бекжон тақдиридан ташвиш билдирган.
Ҳуқуқ фаоли Надежда Атаева АҚШда Муҳаммад Бекжоннинг қизига Чегара билмас мухбирлар мукофотини топширмоқда.
Чегара билмас мухбирлар ташкилотининг Европа ва Марказий Осиё бўйича бўлими раҳбари Йоҳан Биҳр “Ўзбекистонда камида 10 журналист ҳамон қамоқда қолмоқда. Тўрт нафари журналистик фаолияти учун қамоқда азоб чекмоқда, қолгани инсон ҳуқуқларини ҳимоя этиб чиққани учун қамалган. Қамоқда қолаётган журналистларнинг бири Муҳаммад Бекжон”, деб билдирган.
60 ёшли Муҳаммад Бекжон 1999 йил 16 февраль куни Тошкентда содир бўлган портлашларга алоқадорликда айбланиб, 12 йилга озодликдан маҳрум қилинган ва бу муддат 2012 йилда тугаши керак эди. Аммо унинг қамоқ муддати узайтирилиб келинмоқда.
“Муҳаммад Бекжон 15 йилдан буён қамоқда қолмоқда ва у дунёдаги энг узоқ қамоқда қолаётган журналистларнинг бири”, дейилади Журналистларни ҳимоя қилиш қўмитасининг 29 апрель куни эълон қилинган ҳисоботида.
28 апрель куни Вашингтонда уюштирилган "Матбуотни озод қилинг" номли кампания доирасида АҚШ Давлат Департаменти матбуот вакили Жэн Псаки Муҳаммад Бекжон тақдирига эътибор қаратганди.
- Унинг соғлигига сўнгги 15 йил мобайнида жиддий путур етди. У ҳозир зудликда тиббий муолажага муҳтож. Ўзбекистон ҳукуматини зудликда унга тиббий ёрдамни кўрсатишга чақирамиз, - деганди Псаки.
Ҳозирда Муҳаммад Бекжон Навоийдаги Зарафшон қамоқхонасида сақланмоқда.
Қамалишидан олдин Муҳаммад Бекжон мухолифат нашри ҳисобланган “Эрк” газетасига бош муҳаррирлик қилган.
Халқаро ташкилотлар Ўзбекистонни сўз эркинлиги бўғилаётган мамлакатлар рўйхатига киритиб келади. Чегара билмас мухбирлар ташкилотининг 180 мамлакатдаги вазиятга баҳо берилган ҳисоботида Ўзбекистон сўз эркинлиги борасида ўтган йилгига нисбатан икки поғона пастлаб, 166-ўринни эгаллагани қайд этилади.
Ўтган йили Ўзбекистон бу рейтингда 164-ўринни эгаллаб турганди, ундан аввалги йили эса 157-ўринда эди.
------------------------------------------------------------------------------------------
Habar, foto va videoni Ozodlik radiosiga +420724971539 WhatsApp, Telegram raqamiga yuboring!
Jonli efirlarimizda qatnashmoqchi bo'lsangiz har Dushanba va Chorchanba kunlari Toshkent vaqti bilan 19:00 dan boshlab ozodovoz, ozodlikonline va ozodskype Skype manzillariga qo'ng'iroq qiling!
60 yildan beri habarchilik qilayotgan Ozodlik radiosi shaxsingiz sir qolishini kafolatlaydi.
