Бишкекдаги Чуй вилоят касалхонасининг Сунъий буйрак бўлимида шифокорлар берган муддати ўтган “Репетин” дориси қўлланилган 34 бемор ҳалок бўлгани иддао қилинаётир. Мазкур воқеа юзасидан Қирғизистон Ички ишлар вазирлиги шифокорларга нисбатан жиноят иши очилганини билдирди.
Бишкек шаҳар милициясининг билдиришича, Чуй вилоят шифохонаси Сунъий буйрак бўлими шифокорлари ўз ишига масъулиятсиз ёндошганликда айбланмоқда. Шифокорлар берган “Репретин” дорисини ичган 34 беморнинг дарди оғирлашиб, охир-оқибат улар вафот этган.
-Тергов жараёнида мазкур касалхона шифокорлари 2013 йилнинг февралида яроқлилик муддати тугаган дорини май ойигача беморларга бериб келгани аниқланди. Бу ҳолат юзасидан текширув ва экспертизалар давом этмоқда. Жиноят иши муддати ўтган дори қўлланилгани асосида очилди, -деди Қирғизистон ички ишлар вазирлиги расмийси Эрнист Ўсмўнбаев.
Бироқ Чуй вилоят касалхонаси раҳбарининг ўринбосари Нурали Матаипов Ички ишлар вазирлиги тарқатган хабардаги маълумотлар ёлғон эканини айтмоқда. Унга кўра, Сунъий буйрак бўлимида 34 эмас, 20 бемор оламдан ўтган.
-Уч ярим йилда бу бўлимда даволанган 20 бемор ўлган. Уч-тўрт ойда 34 бемор ўлди, деган гап ёлғон. Беморларга муддати ўтган дорини берган барча шифокорларга жазо чораларини қўллаганмиз. Одамлар ўлимига муддати ўтган дорининг алоқаси йўқ, -деди Нурали Матаипов.
Шифокорлар томонидан беморларга муддати ўтган “Репетин” дорсининг берилаётгани тўғрисидаги масалани биринчи марта парламент йиғинида депутат Ширин Айтматова кўтарган эди. У Чуй вилоят касалхонаси шифокорларига чора кўришни талаб қилган, аммо унинг талаблари бажарилмай қолган.
-Мен муайян бир дори беморларнинг ўлимига сабаб бўлган, деб тасдиқлай олмайман. Лекин бу касалхонада нималар бўлганини чуқур ўрганиш керак. Шифокорлар дориларнинг муддати ўтганини билиб туриб беморларга берган. Беморлар тажриба ўтказиладиган сичқон ёки ўйинчоқ эмас. Бу касалхонадаги вазиятни чуқур тергов қилиш лозим, -деди Ширин Айтматова.
Қирғизистон Соғлиқни сақлаш вазирлиги эса мамлакатда оғир буйрак касаллигига чалинганлар сони йилдан-йилга ўсиб бораётгани учун ҳам беморлар орасида ўлим ҳолати бўлаётганини айтмоқда.
Расмий маълумотларга қараганда Қирғизистонда буйрак касали ўтишиб кетган 1488 бемор бор. Уларнинг фақат 473 нафаригина давлат томонидан гемодиализ муолажасидан ўтади. Қолган 1015 бемор эса ўз ҳисобидан ва жуда узоқ навбат кутиб бу муолажани олади. Қирғизистонда эса қарийиб бир ярим минг беморга фақат 65 та гемодиализ аппарати бор.
Соғлиқни сақлаш вазирлигининг билдиришича, буйрак касали ўтишиб кетган беморлар 1 ойда 12 марта гемодиализдан ўтиши керак. Бу муолажанинг 1 ойлик ҳақи эса 1200 долларни ташкил қилади.
