Тошкентда аҳолига кабель телевидениеси хизматини таклиф этиш билан шуғулланувчи ширкат вакилларидан бири "Мир" телеканали айни кунларда мижозларга тақдим этилаëтган телеканаллар рўйхатида йўқлигини билдирди:
- Йўқ¸ бу рўйхатда "Мир" йўқ. Биз "Ўзбекистон кабель телевидениеси"дан сигнал оламиз ва "Мир" айнан Ўзбекистон кабель телевидениеси тарафидан ўчирилган. "Мир" билан РБК канали кўрсатмаяпти беш кундан бери¸ деди Тошкентдаги кабель телевидениеси операторларидан бири ходими.
“Ўзбекистон кабель телевидениеси” маъсулияти чекланган жамият бутун мамлакат бўйлаб кабель телевидениеси хизматларининг марказлашган провайдери ҳисобланади. Бу жамият ходими "Мир" телеканалининг эфирдан йўқолганини телеканал ва уни кўрсатиш ҳаққига эга томон ўртасидаги лицензия келишуви муддатининг тугагани билан изоҳлади:
- "Мир" ҳозирча кўрсатилмайди¸ нимагаки уларнинг лицензионний соглашениеси тугади. Кейинги муддатга тузилиб¸ иккала томон ҳам қўл қўйса¸ яна кўрсатилади. Россия тарафидан телеканал "Мир"¸ Ўзбекистон тарафидан канални ретрансляция қилиш ҳуқуқини сотиб олганлар ўзаро келишса¸ марказий студиямиздан яна қайта улаб қўямиз¸ бўлди. Агар келишув имзоланмаса¸ мижозларга янги телеканал тақдим этамиз¸ деди “Ўзбекистон кабель телевидениеси” МЧЖ вакили.
Озодлик билан суҳбатда "Мир" телеканалининг бир эмас¸ бир неча расмийси канал кўрсатувларининг бир неча кундан бери Ўзбекистонда кўрсатилмаëтганидан бехабарликларини айтдилар ва шу боис бирор шарҳ бера олмасликларини билдирдилар.
Телеканал вакиллари¸ хусусан¸ кўрсатувчларни эфирга узатиш учун маъсул муҳандислар билан суҳбатдан аëн бўлишича¸ "Мир" кўрсатувлари бутун МДҲ ҳудудида бепул тақдим этилади ва шу боис ўзбек провайдери берган изоҳнинг ўзи изоҳга муҳтож.
- Биз 24 соат давомида сунъий йўлдош воситасида тўхтовсиз эфирдамиз ва эфирга узатиш бўйича ҳеч қандай муаммо йўқ. Ўзбекистонда кўрсатилмаëтган бўлса¸ бу фақат маҳаллий провайдернинг иши. "Мир" телеканали бутун МДҲ ҳудудига бепул тарқатилади ва шу боис уни сотиб олган томон билан келишув тугади¸ деган гап тўғри эмас. Айни пайтда¸ провайдерда бизни истаган вақтда ўчириб қўйиш ҳаққи бор¸ деди "Мир" телеканали кўрсатувчиларини эфирга узатиш учун масъул муҳандислардан бири Озодлик билан суҳбатда.
"Мир" давлатлараро телерадиокомпанияси 1992 йилда Мустақил давлатлар ҳамдўстлиги аъзолари ўртасидаги сиëсий¸ иқтисодий ва гуманитар ҳамкорликни ëритиш¸ ҳамдўстлик ҳудудида ягона ахборот ҳудуди ташкил этиш ва ўзаро ахборот алмашиш мақсадида ташкил этилган.
Аксар дастурлари совет иттифоқини қўмсаш руҳида бўлган Мир телеканали¸ кузатувчилар фикрича¸ собиқ иттифоқни реабилитация қилиш лойиҳаларидан биридир.
Телеканал кўрсатувчиларининг МДҲ давлат раҳбарларининг 9-10 октябрь куни Минскда ўтказилган саммитидан сўнг Ўзбекистонда эфирда олиб ташланиши Оқсаройдан берилган сиëсий қарорми¸ ëки вақтинчалик техник муаммо¸ Озодлик ҳозирча бу ҳақда аниқ маълумотга эга эмас.
"Мие"¸ айни пайтда¸ РБК телеканалларининг Ўзбекистонда эфирдан олиб ташлангани сайловлар йилида Тошкент раҳбарияти Россия ахборот ҳудудидан бир оз узоқлашишга қарор қилгани даракчисими-йўқ¸ буниси ҳам маълум эмас.
Маълум бўлгани¸ "Ўзбекистон кабель телевидениеси" МЧЖнинг ўзбекистонликларга тақдим этилаëтган Россия телеканаллари сонини камайтириш режаси йўқлиги:
- "Мир" олиб ташлангани билан ҳозир ҳам 45 та Россия канали бор. Ўзбекистоннинг ўзиники атиги 12 та. Мабодо "Мир" қайтмаса¸ унинг ўрнига янги канал қўямиз ва бу ҳам Россияники бўлади¸ деди "Ўзбекистон кабель телевидениеси" МЧЖ вакили.
Ўзбекистонда 2011 йили Россиянинг ДТВ ва ТНТ телеканаллари трансляцияси, ундан аввал РенТВ ¸ 2013 йил августида эса "Домашний" канали дастурларини эфирдан олиб ташланган.
