Coca-Cola Ichimligi Uzbekiston, LTD ширкатининг Бектемирда жойлашган мегазаводи ва бошқа цехларида Coca-Cola ичимлиги ишлаб чиқариш яна тўхтади. Натижада, бозорларда ичимлик нархи ошди ва пештахталардан қарийб ғойиб бўлди.
Озодликка келаëтган хабарларга кўра¸ пойтахт Тошкент ва вилоят бозорларида нархи кўтарилган Coca-Cola ва Fanta чанқоқбосди ичимлиги айни кунларда бозор ва дўконларда сийраклашиб қолган.
- Бир ярим литрлиги 6000 сўмга чиқди, янги йилда нима қилар эканмиз, - дейди тошкентликлардан бири.
Вилоятларда эса нархлар бундан ҳам баланд.
- Ҳозир тўй мавсуми, Coca-cola йўқ. Завод ишламаяпти экан. Четдан келаётгани бор, у қиммат, 7 минг сўм, - дейди Бухоро шаҳридаги озиқ-овқат дўконининг эгаси.
Ўзбекистонда яқинларгача президентнинг тўнғичи Гулнора Каримова бизнес империяси таянчларидан бири саналган Coca-Cola Ichimligi Uzbekiston, LTD ширкати вакили Озодлик билан суҳбатда "профилактика" сабаб заводда Coca-cola ишлаб чиқариш вақтинча тўхтаганини айтди.
- Ҳозир линияда профилактика, шу сабаб ишлаб чиқариш тўхтаган, айнан Coca-cola чиқмаяпти. Fanta ва бошқа ичимликлар чиқаяпти. Coca-cola ишлаб чиқариш қачон бошланишини биз билмаймиз, - деди ширкатнинг ўзини таништирмаган ходими.
Заводдаги Озодлик манбалари эса таъминот билан боғлиқ муаммолар сабаб Coca-cola ичимлигини ишлаб чиқариш тўхтаганини айтди.
Coca-Cola Ichimligi Uzbekiston, LTD ширкатида ўтган йилнинг айни даврида ҳам Coca-cola ишлаб чиқариш тўхтаган ва ўшанда ҳам профилактика сабаб қилиб кўрсатилган эди.
Тошкентликлар эса бунга кўникиб қолганликларини айтишади.
- Ҳар йили янги йил арафасида атайлаб тўхтатиб туришади. Бозорда нархи кўтарилганидан сўнг қўйиворишади, ҳар йили бўладику бу, - дейди тошкентлик Баҳодир.
Ўзбекистондаги Coca-Cola Ichimligi Uzbekiston, LTD маркази Атлантада жойлашган Coca-Cola ширкатининг франчайзи ҳисобланади.
Ўзбекистонда 1993 йилдан фаолият бошлаган бу ширкат аввалига президентнинг қудаси¸ АҚШ фуқароси Мақсудийлар оиласига қараган бўлса¸ Гулнора Каримова Мансур Мақсудий билан ажрашганидан кейин¸ бу ширкатни тўлиғича ўз назоратига олгани айтилади.
Каримова назоратида бўлиб келган Coca-Cola Ichimligi Uzbekiston, LTD ширкатининг икки бошқарувчиси Алишер Эргашев ва Шоҳруҳ Собировлар 2012 йил июлида Швейцария прокуратураси бошлаган жиноят ишда расман гумонлан қилинувчилардир.
Ўзбекистондаги Coca-Cola менежерлари¸ қолаверса¸ унинг расмий эгаларидан бири бўлган Гаяне Авакян ҳам Швейцария прокуратураси томонидан катта миқдорда пул ювиш амалиëтларида гумонланмоқда.
Ҳозирда Авакяннинг Ўзбекистон қамоғида экани айтилади.
