Асқаровнинг адвокати Валериан Вахитовнинг суддаги нутқидан: "Бугун биз жиноят иши фабуласини эмас, янги тафсилотларни кўриб чиқапмиз. БМТ қўмитаси қарорини қиёслаш ёки уни шубҳа остига олиш мумкин эмас. БМТ қўмитаси Асқаровни зудликда озод этишга чақирган. Шунинг учун мен суддан зудликда ҳукмни ўзгартириб, Азимжон Асқаровни озод этишни илтимос қиламан”
Асқаровнинг жамоатчи ҳимоячиси Тўлайкан Исмаилова нутқидан: "БМТ қўмитаси қарори Қирғиз Республикасии ватандоши Азимжон Асқаровнинг 4 модда бўйича кафолатланган ҳуқуқлари бузилганини тасдиқлади”.
Шундан сўнг Исмаилова кечроқ Асқаровнинг қийноқларга солинганини тасдиқловчи тиббий экспертиза натижаларини судга тақдим этишини билдирди.
Асқаровнинг жамоатчи ҳимоячиси Тўлайкан Исмаилова нутқидан сўнг Қирғизистон Олий Суди бугун соат 15.00гача суд жараёнида танаффус эълон қилди.
Олий Суддаги жараёнга Асқаровнинг ўзини олиб келиш масаласи очиқ қолмоқда. Адвокатлар Асқаров жараёнда иштирок этиши шартлигини, унинг иштирокига тўсқинлик қилиш халқаро ҳуқуқ меъёрларининг бузилиши бўлишини айтмоқда..
Бироқ судья бу масала очиқ қолдирилганини, агар эҳтиёж пайдо бўлса, Асқаров судга олиб келинишини маълум қилди.
Асқаров ишини Олий Судда Качике Эсенканов раислигида судьялар Лепес Темирбеков, Канибек Бокоевлар кўриб чиқмоқда.
Суд жараёнида Бишкек вақти билан соат 15гача танаффус эълон қилинган.