Санкт-Петербург метросида бўлган портлаш ортида Москва метросида кучайтирилган хавфсизлик чоралари кўрилмоқда.
ТАСС портлаш “Сенная плошчадь” метро бекатида турган поезд вагонларидан бирида содир бўлганини хабар қилаётган бўлса, айрим ҳодиса гувоҳлари яна бир портлаш “Технология институти” станциясида ҳам бўлганини хабар қилди. Ҳодиса жойига қутқарувчилар, “тез ёрдам” шифокорлари ва полиция етиб келди- қутқарув ишлари давом этмоқда.
Россиянинг бошқа шаҳарларидаги метрополитенларда, хусусан Москвада, хушёрлик чоралари кучайтирилди.
Портлаш бўлган жойга Россия Тергов қўмитасининг Санкт-Петербург бўйича Бош тергов бошқармаси ходимлари етиб келди.
Гувоҳларга кўра, портлаш маҳаллий вақт билан соат 15ларда рўй берган.
Айни пайтда, «Парк Победы», «Электросила», «Московские ворота», «Фрунзенская», «Технологический институт», «Сенная площадь» ва «Гостиный двор» метро бекатлари ёпилган.
Интерфакс агентлиги ўз манбасига таяниб, "Петербург метросидаги портлашни худкуш содир этмаган, афтидан, вагонга ўрнатилган портловчи мослама ишга тушган", деб хабар қилди.