Ўзбекистоннинг Qanot Sharq авиаширкати 20 январдан 6 мартгача бўлган муддатда А320 самолётларида амалга ошириладиган қатор рейсларни бекор қилмоқда.

Компания матбуот хизмати қатновлар бекор қилинишига C-check, яъни техник кўрик ва текширувни сабаб сифатида кўрсатган.

Компания юзага келган ноқулайлик учун йўловчилардан узр сўраган ва чипталарни қайтариш ёки алмаштириш масаласида қўллаб-қувватлаш гуруҳига мурожаат қилишни тавсия этган.

Бекор қилинган парвозлар рўйхатида ички йўналишлар, шунингдек, Россиянинг Москва, Санкт-Петербург шаҳарларига рейсларни кўриш мумкин.

Qanot Sharq рейслари бекор бўлиши Қозоғистонда Azerbaijan Airlines ширкатига тегишли Embraer йўловчи учоғи ҳалокатга учрагани Озарбайжон, БАА, Исроил ва Қозоғистон авиакомпаниялари маълум муддатга Россияга парвозларни тўхтатган даврга тўғри келмоқда.

Qanot Sharq хусусий авиаширкати аввал ҳам ўз парвозларини “техник сабабларга кўра” бекор қилгани маълум.

Ўзбекистон Марказий банки бир фойдаланувчи учун расмийлаштириладиган банк карталари сонини чеклади.

Телеграмдаги “Мижозлар учун” канали маълумотига мувофиқ, регулятор ишлаб чиққан вақтинчалик тартибга кўра, битта жисмоний шахс (битта ЖШШИР учун) битта банкда кўпи билан 5 та ва умуман барча банкларда 20 тагача, шу жумладан, виртуал ва кобейжинг карталарига эга бўлиши мумкин.

Ушбу талаб хорижий валютада очилган карталарга татбиқ этилмайди.

Банкларга жисмоний шахсларнинг карталари (шу жумладан виртуал) бўйича 12 ой давомида ҳеч қандай операция амалга оширилмаган бўлса, карта эгасини хабардор қилган ҳолда уларни блоклаш топширилган.

Маълум бўлишича, ушбу тартиб хизмат доирасида фойдаланиш учун мўлжалланган бўлиб, тижорат банкларига ижро учун йўлланган. Унинг амал қилиш муддати 2025 йил 1 январидан 2025 йил 31 декабригача белгиланган.

Тармоқ фаоллари ушбу тартиб ими-жимида қабул қилинганига эътибор қаратмоқда.

МБ 2024 йил ноябрь ойи охирида бир кишига тўғри келадиган карталар сонини чеклашни режалаштираётганини маълум қилган бўлса-да, бу борада ҳужжат ишлаб чиқилгани жамоатчиликка расман эълон қилинмаган.

Ўшанда регулятор бу чорани карталар билан боғлиқ шубҳали (фирибгарлик) операцияларнинг олдини олиш мақсади билан изоҳлаганди.

Расмий статистикага кўра, банк карталари эгаларининг қарийб 97 фоизи (22 миллион киши) 5 тагача, 3 фоизи (770 минг киши) 5 тадан 20 тагача, 0,03 фоизи (7000 киши) эса 20 дан ортиқ карта очган.

Иқтисодчилар карталар сонини чеклаш ташаббусига эътироз билдирган. Жумладан, Отабек Бакиров буни “ўтган ёмон замонда қолиб кетган ойболта усули” деб атаган.

Ўзбекистондаги вазирлик, идора ва ҳокимликлар 2025 йилда тежамкорлик ва барқарорликни таъминлаш тамойили асосида бюджет маблағларини тежаш ва самарадорлигини ошириш бўйича бир қатор чораларни кўриши лозим. Президентнинг 1 январдан кучга кирган “Давлат бюджетининг 2025 йил ижросини таъминлаш чора-тадбирлари тўғрисида”ги қарорида шу каби талаблар назарда тутилган.

Қарорга асосан жорий йил охиригача қуйидагилар бўйича таклиф киритиш тақиқланади:

• республика ижро этувчи ҳокимият органларининг бошқарув ходимлари иш ҳақи миқдорини ошириш (меҳнатга ҳақ тўлашнинг энг кам миқдорини ошириш бундан мустасно);

• Қорақалпоғистон Республикаси бюджетининг, вилоятлар ва Тошкент шаҳар бюджетларининг қўшимча манбалари ҳисобидан хизмат автомобиллари (махсус автотранспорт влоситалари бундан мустасно), қимматбаҳо юмшоқ мебеллар ва офис жиҳозлари (таълим, илм-фан, соғлиқни сақлаш, қишлоқ ва сув хўжалиги соҳаларида фойдаланиладиганлардан ташқари) харид қилиш.

Белгиланишича, республика ижро этувчи ҳокимият органларининг бюджетдан ташқари жамғармалари ҳисобидан хизмат автомобиллари, қимматбаҳо юмшоқ мебеллар ва офис жиҳозлари фақат Вазирлар Маҳкамаси билан келишган ҳолда харид қилинади.

Бюджет ташкилотларининг 2025 йил учун харажатлар сметасини тузишда мебель, офис жиҳозлари ҳамда товар-моддий захираларини харид қилиш харажатлари миқдорини 2024 йилга нисбатан 10 фоизга камайтирган ҳолда (боғчалар, умумтаълим мактаблари ва соғлиқни сақлаш муассасаларидан ташқари) режалаштириш топшириғи берилган.

Сўнгги вақтларда вазирлик ва ҳокимликларнинг қимматбаҳо машиналар харид қилаётгани жамоатчилик эътирозига сабаб бўлаётган эди.

Озодлик аввалроқ Самарқанд вилояти ҳокимлиги 630 миллион сўмлик автомобиль харидига оид қарорни яшириб қўйгани ҳақида хабар қилган эди.

Шунингдек, гарданидаги 6,6 миллиард сўм қарз ҳам Андижон тумани ҳокимлигини қимматбаҳо автоулов сотиб олишдан тўхтата олмаган.

Тошкент вилояти Чирчиқ шаҳрида онаси томонидан аёвсиз калтаклаган 4 яшар қизча 7 январь куни жароҳатлардан вафот этди. Бу ҳақда Qalampir.uz нашри хабар қилди.

2024 йил 23 декабрь куни Тошкент вилояти Бўстонлиқ тумани тиббиёт бирлашмасига 2020 йилда туғилган Й.М. танасидаги турли жароҳатлар билан қабул қилинган. Ҳолат юзасидан ўтказилган терговга қадар текширувда 47 ёшли аёл норасида қизини қаттиқ калтаклаб, тан жароҳати етказгани аниқланган.

2024 йил 27 декабрь куни ҳолат юзасидан Чирчиқ шаҳри ИИБ томонидан аёлга нисбатан Жиноят кодексининг 126-1-моддаси 7-қисми “б” банди (оилавий зўравонлик) билан жиноят иши қўзғатилган.

Қизчанинг вафоти ортидан онасига қўйилган айблов оғирлашади.

“Тергов вақтида жиноят натижасидаги оқибат ўзгаргани, яъни жабрланувчининг ўлими факти жиноятга ҳуқуқий баҳо бериш жараёнига таъсир қилади – оғирроқ жазони кўзда тутувчи қисмга қайта малакалаш лозим бўлади ”, деган Болалар омбудсмани ўлим фактини изоҳларкан.

Олий Мажлис Сенати 2024 йил 15 август куни “Болаларни зўравонликнинг барча шаклларидан ҳимоя қилиш тўғрисида”ги қонунни маъқуллаган эди. Ўшанда юқори палата мажлисида кейинги йилларда болаларга нисбатан зўравонлик ҳолатлари кўпайиб бораётгани, уларнинг олдини олиш, жабрланувчиларнинг ҳуқуқ ва манфаатларини ҳимоя қилишнинг амалдаги ҳуқуқий механизмлари етарли даражада самара бермаётгани қайд этилганди.

Аввалроқ Ўзбекистондаги болалар уйлари ва тутинган оилаларда тарбияланаётган 1,5 мингдан зиёд бола “зўравонлик содир этиш хавфи юқори ҳисобланган тоифа”да қолаётгани билдирилганди.

Ўзбекистонда Ислом тараққиёт банки (ИТБ) иштирокида “Кичик ва ўрта корхоналарнинг иқтисодий барқарорлигини мустаҳкамлаш” лойиҳаси амалга оширилади.

Вазирлар Маҳкамасининг 2025 йил 6 январидан кучга кирган 903-сонли қарорига мувофиқ, Иқтисодиёт ва молия вазирлиги лойиҳани ўз вақтида амалга ошириш, мувофиқлаштириш, ИТБ қарзларидан мақсадли ва самарали фойдаланиш бўйича масъул орган этиб белгиланган.

2025-2027 йиллар давомида амалга ошириладиган лойиҳа кичик ва ўрта тадбиркорликни молиялаштиришда қўшимча имкониятларни яратиш, молиявий хизмат турларини кенгайтириш, шунингдек, исломий молиялаштириш салоҳиятини оширишга қаратилган.

Gazeta.uz нашрининг аниқлик киритишича, 2024 йил апрель ойида имзолаган битим доирасида лойиҳа учун 30 миллион доллар қарзни ИТБ, қолган 10 миллион долларни эса Ислом бирдамлиги тараққиёт жамғармаси ажратади.

Ўттиз миллион доллар муробаҳа тамойили бўйича кичик бизнесни молиялаштиришга йўналтирилади. Қолган маблағлар кредит бўйича кафиллик, бизнес инжиниринг ва салоҳиятни ошириш ташаббуслари, бошқарув ва аудит харажатлари учун сарфланади.

2023 йилда Тошкентда ўтган инвестиция форуми доирасида ИТБ билан умумий қиймати 400 миллион долларлик битимлар имзоланганди.

Озодлик аввалроқ Ўзбекистонда ислом банки тизимини йўлга қўйиш йўлидаги муаммоларни таҳлил қилган эди.

Ўзбекистон ҳудудида айрим турдаги тамаки маҳсулотлари, никотинни истеъмол қилиш мосламалари, шу жумладан, электрон сигареталарни ишлаб чиқариш, тайёрлаш ва ўтказиш тақиқланиши мумкин.

Ўзбекистон Либерал-демократик партияси фракциясининг 6 январь куни бўлиб ўтган йиғилишида ушбу тақиқ кўзда тутилган қонун лойиҳаси муҳокама қилинган.

Партия матбуот хизмати қайдича, сўнгги йилларда никотинни етказиб бериш мосламалари, электрон сигареталар ва улар учун суюқликлар ҳамда қиздириладиган тамаки маҳсулотларининг Ўзбекистонга қонунга хилоф равишда олиб кириш ҳолатлари ва айланмаси ортиб бормоқда. Бундан ташқари, ушбу маҳсулотларни аҳоли, айниқса, ёшлар орасида истеъмол қилиш ҳолатлари кўпайган.

Шунга кўра бу турдаги маҳсулотларни Ўзбекистон Республикаси ҳудудига олиб кириш ёки ҳудудидан олиб чиқишга нисбатан таъсирчан чора сифатида маъмурий ва жиноий жавобгарлик белгиланиши режалаштирилган.

Gazeta.uz нашрининг аниқлик киритишича, Маъмурий жавобгарлик тўғрисидаги кодексга 186−2-модда (муомаласи тақиқланган тамаки маҳсулотлари, тамакини ҳамда никотинни истеъмол қилиш мосламалари, шунингдек, электрон сигареталар ва чилимларни ишлаб чиқариш, тайёрлаш, олиш, сақлаш, ташиш ёки ўтказиш, реализация қилиш, олиб кириш) киритилиши мумкин. Ушбу қоидабузарлик учун базавий ҳисоблаш миқдорининг 50 бараваридан 100 бараваригача миқдорда (17-34 млн сўм) жарима жазоси назарда тутилади.

Ўзбекистон Жиноят кодексини ҳам шу номдаги 186−4-модда билан тўлдириш таклиф этилмоқда. Ушбу хатти-ҳаракатларнинг оғирлик даражасига кўра жаримадан тортиб 12 йилгача озодликдан маҳрум қилиш жазоси белгиланиши кўзда тутиляпти.

Жорий йилнинг 1 февралидан эътиборан Ўзбекистонда темирйўл чипталари нархи оширилади. Бу ҳақда маълум қилган “Ўзбекистон темир йўллари” АЖ матбуот хизмати нарх қимматлашини темирйўл инфратузилмаси харажатлари, электр энергияси, ёқилғи ва транспорт харажатларини қоплаш, юқори тезликда ҳаракатланувчи электропоездларни харид қилиш ва йўловчи вагонлари паркини янгилаш каби мақсадлар билан изоҳлаган.

Янги тарифга мувофиқ, юқори тезликда ҳаракатланувчи “Афросиёб” электропоездларининг VIP, бизнес тоифадаги чипта нархлари 25 фоизга, эконом тоифадаги чипта нархлари 20 фоизга, “Шарқ”, “Насаф” ва “Ўзбекистон” поездларнинг чипта нархлари эса 30 фоизга оширилмоқда.

“Афросиёб” электропоезди йўлкираси қуйидаги кўринишда бўлади:

Тошкент–Бухоро:

• VIP – 994 000 сўм;

• бизнес – 751 000 сўм;

• эконом– 484 000 сўм;

Тошкент—Қарши:

• VIP – 854 000 сўм;

• бизнес – 634 000 сўм;

• эконом – 406 000 сўм.

Тошкент–Самарқанд:

• VIP – 619 000 сўм;

• бизнес – 450 000 сўм;

• эконом – 294 000 сўм.

“Ўзбекистон темир йўллари” 2024 йил 20 январидан “Афросиёб”, “Шарқ”, “Насаф” ва “Ўзбекистон” поездлари чипта нархини 20 фоизга кўтарган эди.

2024 йил 15 майидан эса “Афросиёб” электропоездларининг чипта нархи 20-40 фоиз миқдорида оширилганди.

Озодлик аввал хабар қилганидек, Олий Мажлис Сенатида темирйўл чипталари қимматлаб кетгани ҳолда хизмат сифати яхшиланмагани танқид қилинган. Юқори палата чипта нархи холислик, ҳалоллик мезонлари асосида белгиланганини савол остига олган.

Андижон вилояти Марҳамат туманидаги хонадонда рўй берган газ портлаши оқибатида бир киши вафот этди.

Daryo.uz нашрининг Бош прокуратура матбуот хизматидан олинган маълумотга таянган ҳолда ёзишича, 3 январь куни соат 03:00 атрофида Шомат маҳалласи Ипак йўли кўчасида яшовчи фуқаро Х.Шокиров хонадони ётоқхонасида қўлбола усулда қурилган иситиш печини ёқмоқчи бўлиб гугурт чаққан вақтида хонага тўпланган табиий газ ва ҳаво аралашмасидан чақнаш юз берган.

Оқибатда ушбу хонада бўлган Х. Шокиров танасининг 90 фоизи, турмуш ўртоғи Л. Шокирова танасининг 35-40 фоизи, ўғли Ж.Ҳамзаев танасининг 20-30 фоизи, қизи Х. Ҳамзаева танасининг 70 фоизи қисми куйиши ташхиси билан шифохонага ётқизилган.

Вояга етмаган Х. Ҳамзаева олиб борилган тиббий муолажаларга қарамай 4 январь куни вафот этган. Оиланинг қолган аъзолари шифохонада қолмоқда.

Жабрланувчиларга нисбатан суд-тиббий экспертизаси тайинланган. Ҳолат юзасидан туман прокуратураси томонидан терговга қадар текширув олиб борилмоқда.

“Ҳудудгазтаъминот” акциядорлик жамияти мулозимига кўра, 2024 йилнинг 11 ойи мобайнида Ўзбекистон бўйлаб газ билан боғлиқ 74 та бахтсиз ҳодиса қайд этилган. Оқибатда 82 нафар одам қурбон бўлган, 80 дан зиёд киши турли даражада тан жароҳати олган.

2024 йил 17 декабрь куни Фарғона шаҳри Аҳмад Яссавий кўчасида жойлашган “Petrolium” пропан газ тўлдириш шохобчасида содир бўлган портлаш ҳам ижтимоий тармоқларда қизғин муҳокама қилинган. Расмий версияга кўра, портлаш оқибатида тўрт киши ҳалок бўлган. Аммо воқеа гувоҳлари Озодликка расман хабар қилинганидан кўпроқ одам қурбон бўлганини айтган.

Сурхондарё вилояти Денов туманида ўқувчиларни совуқ ҳавода юпун кийимда тадбирга жалб қилган мансабдорлар интизомий жазога тортилди. Бу ҳақда Болалар омбудсмани матбуот хизмати маълум қилди.

Аввалроқ ижтимоий тармоқларда ўқувчилар қаҳратон совуқда юпун кийимда тадбирга олиб борилгани танқидларга сабаб бўлганди.

Аниқланишича, 2024 йил 6 декабрь куни Денов туманида кўприк очилиш маросимига тумандаги 14 ва 16-сонли мусиқа мактабларининг ўқувчилари (16 нафар қиз ҳамда 4 нафар ўғил бола) Маданият бошқармаси топшириғига кўра енгил байрамона кийимда жалб қилинган.

Болалар омбудсмани тақдимномаси асосида Маданият вазирлиги болаларнинг соғлиғи хавф остига қўйилгани юзасидан ҳудуднинг тегишли мансабдорларига нисбатан интизомий жазо қўллаган.

Kun.uz нашри кўприк очилишида Сурхондарё вилояти ҳокими Улуғбек Қосимов ҳам вилоят фаоллари билан биргаликда қалин кийимларда ҳозир бўлганига эътибор қаратган.

Ҳолат юзасидан вилоят ҳокимига бирор чора кўрилгани маълум эмас.

Болаларни совуқ об-ҳавода турли тадбирларга жалб қилиш ҳолатлари аввал ҳам кўп марта кузатилган. Озодлик бир муддат аввал совуқда ўқувчиларни юпун кийимда байроқ ҳилпиратишга олиб чиққан Андижондаги мактаб раҳбарлари ишдан олингани ҳақида хабар қилган эди.

Собиқ Олий ва ўрта-махсус таълим вазири Абдуқодир Тошқулов талаба қизларнинг меҳмонларни кутиб олиш учун совуқда адрас кўйлак кийиб гул кўтариб боришини “мажбурий меҳнатнинг бир кўриниши” ўлароқ баҳолагани маълум.

Айиқ билан машғулот ўтказиб, ҳуқуқбузарликка йўл қўйган боксчи Шаҳрам Ғиёсов базавий ҳисоблаш миқдорининг уч баравари миқдорида жаримага тортилди.

Экология, атроф-муҳитни муҳофаза қилиш ва иқлим ўзгариши вазирлиги матбуот хизматининг маълум қилишича, спортчига нисбатан Маъмурий жавобгарлик тўғрисидаги кодекснинг 111-моддасига кўра баённома расмийлаштирилган.

Шаҳрам Ғиёсов вазирликка чақиртирилиб, унга жисмоний шахслар томонидан ёввойи ҳайвонларни сақлаш ва турли мақсадларда фойдаланиш, ҳайвонларга шафқатсиз муносабатда бўлиш тақиқлангани тушунтирилган.

Қайд этилишича, боксчи узр сўраган, ўз хатосини тушуниб етгани ва бундай ҳолат бошқа такрорланмаслигини таъкидлаган.

Пировардида айиқ Фарғона ҳайвонот боғига топширилган.

2024 йил охирида ижтимоий тармоқларда тарқалган Шаҳрам Ғиёсовнинг айиқ билан “cпарринг” тушаётган акс этган видеолавҳа жамоатчиликнинг эътирозига сабаб бўлганди.

Видеода бокс бўйича жаҳон чемпиони ва Олимпиада кумуш медали совриндори Шаҳрам Ғиёсов спорт залида тумшуғбоғдаги айиқ билан жанг қилиб, жониворни бир неча бор чалқанчасига йиқитганини кўриш мумкин. Беллашув давомида бошқа бир киши айиқни жиловда ушлаб турган.

Вазирлар Маҳкамасининг “Ёввойи ҳайвонларни сақлаш тартибини такомиллаштириш чора-тадбирлари тўғрисида”ги қарорига кўра, 2025 йил 1 январидан эътиборан жисмоний шахслар томонидан ярим эркин шароитларда, сунъий яратилган яшаш муҳитида ёки тутқунликда сақланиши тақиқланган ёввойи ҳайвонлар рўйхати тасдиқланган. Бу рўйхатга айиқ ҳам киритилган.

Ҳукумат ҳужжатига мувофиқ, бошқа ҳайвонлар қатори айиқларни ҳам давлат ва мобил циркларида (шапитолар) сақлаш ҳамда улардан цирк томошаларини ўтказиш мақсадларида фойдаланиш ман этилади.

Тошкент вилояти Бекобод шаҳри ИИБ биносида фуқарони калтаклаб, унинг ўлимига сабаб бўлган ички ишлар ходими Фирдавс Мурадуллаев 9 йил муддатга озодликдан маҳрум қилинди. Бу ҳақда Kun.uz нашри суд ҳукмига таянган ҳолда хабар қилди.

Ўттиз уч ёшли Фирдавс Мурадуллаев 2022 йил январ ойидан 2024 йил 1 июлига қадар Тошкент вилояти ИИББ учинчи минтақавий ҳудуд Бекобод шаҳри ИИБ ЖХХ ҳуқуқбузарликлар профилактика бўлинмаси профилактика инспектори лавозимида ишлаб келган.

Тергов хулосасида қайд этилишича, 2024 йил 19 июнь куни соат 17:30 ларда профилактика инспекторлари томонидан ИИБ ходимларининг қонуний талабларини бажармасдан фаол қаршилик кўрсатгани сабабли ака-ука Дилмурод ва Дилшод Юсупвалиевлар ЖИБ Бекобод шаҳри суди биносидан Бекобод шаҳри ИИБ маъмурий биносига куч ишлатиб олиб келинган. Фирдавс Мурадуллаев Дилмурод Юсупвалиевнинг қўлларини орқага қайирган ҳолда қаддини буккан ҳамда қорин қисмига тиззаси билан зарба берган. Сўнгра уни ерга йиқитиб, юз ва қорин қисмларига зарба бериб, оғир тан жароҳати етказган.

Судланувчи вақтинча ушлаб туриш учун тегишли қарор қабул қилинмаганини билатуриб, ака-ука Юсупвалиевларни ИИБ биноси ичидаги ВУТХга киритишга эришган. Оқибатда Дилмурод Юсупвалиев воқеа жойида вафот этган.

Ф.Мурадуллаев жиноий ҳаракатларини давом эттириб, ВУТХ ичида Дилшод Юсупвалиевни ҳам калтаклаган.

Суд Ф.Мурадуллаев Жиноят кодексининг 104-моддаси 3-қисми “д” банди (қасддан баданга оғир шикаст етказиш жабрланувчининг ўлимига сабаб бўлиши), 109-моддаси 1-қисми (қасддан баданга енгил шикаст етказиш) ва 206-моддаси 1-қисмида (ҳокимият ёки мансаб ваколати доирасидан четга чиқиш) айбдор деб топган. Узоқ йил қамоққа ҳукм қилинган ходим 3 йил муддатга ИИБ тизимида, давлат иштирокидаги ташкилотларда раҳбарлик ҳамда моддий жавобгарлик билан боғлиқ лавозимларда ишлаш ҳуқуқидан ҳам маҳрум қилинган.

Бекобод шаҳри ИИБ биносига олиб борилган 43 ёшли эркак вафот этгани ижтимоий тармоқларда қизғин муҳокамаларга сабаб бўлганди.

Ўшанда ИИБ фуқаро ички ишлар идорасига кириш йўлагида соғлиғи ёмонлашгани оқибатида вафот этганини иддао қилганди. Фаоллар эса эркакнинг ўлимига ИИБ ходимлари томонидан калтаклангани сабаб бўлганини билдиришган эди.

Олий Мажлиснинг Инсон ҳуқуқлари бўйича вакилига кўра, 2024 йилнинг 10 ойи мобайнида ҳуқуқни муҳофаза қилувчи органлар ходимлари томонидан ҳаракатланиш эркинлиги чекланган шахслар сақланадиган жойларда сақланаётган фуқароларга нисбатан руҳий, психологик, жисмоний ёки бошқача тарзда босим ўтказилгани юзасидан 158 та шикоят келиб тушган. Шикоятларни кўриб чиқиш натижасида 10 нафар ходимга нисбатан интизомий таъсир чораси қўлланган. Учта ҳолатда ходимларга нисбатан ЖКнинг тегишли моддалари бўйича жиноят иши қўзғатилган.

Қозоғистон билан Ўзбекистон ўртасида янги темирйўл барпо этилмоқда.

“Қозоғистон темирйўллари” компанияси матбуот хизмати қайдича, 2027 йилда ишга туширилиши кутилаётган янги Дарвоза–Мақтаорол линияси Сариоғоч–Тошкент йўналишига муқобил йўл бўлиб, Сариоғоч станциясидаги юкламани камайтириш ва Ўзбекистонга экспортни кўпайтириш имконини беради.

286 миллиард тенгелик (545,8 миллион доллар) инвестиция лойиҳаси доирасида бугунги кунга қадар 203 километрдан 100 километрга яқин рельс-шпал тармоқлари йиғилди. Лойиҳани амалга ошириш учун 46 та йўл-қурилиш техникаси ва 70 дан ортиқ ишчи жалб этилган.

Қозоғистон томони янги инфратузилма лойиҳаси республиканинг транспорт-транзит салоҳиятини янада ривожлантиришга қаратилганини маълум қилган. Лойиҳа доирасида Қозоғистон–Ўзбекистон давлат чегараси орқали янги ўтказиш пункти очилиши кутилмоқда.

Сўнгги йилларда Марказий Осиё давлатлари темирйўл орқали юк ва йўловчи ташиш ҳажмини оширишга алоҳида эътибор қаратмоқда.

Озодлик янги йил арафасида узунлиги 486 километрни ташкил этувчи Хитой–Қирғизистон–Ўзбекистон темирйўлига тамал тоши қўйилгани ҳақида хабар қилган эди.

Қашғар – Торугарт – Макмал – Жалолобод – Андижон йўналиши бўйлаб ўтадиган халқаро темирйўлнинг йиллик юк ташиш ҳажми 15 миллион тоннагача етиши, товарни якуний истеъмолчига етказиш муддати 7 кунга қисқариши кутилмоқда.

2024 йил 16 ноябридан Олмаота – Туркистон – Тошкент – Олмаота йўналиши бўйича илк темирйўл саёҳат дастури ҳам йўлга қўйилганди.

Қашқадарё вилояти Қарши шаҳри ҳокими Нормўмин Холбоев тадбиркорга тегишли савдо дўкони фаолиятини асоссиз тўхтатгани учун жавобгарликка тортилди.

Daryo.uz нашрининг хабар қилишича, ҳоким “Тадбиркорлик фаолияти эркинлигининг кафолатлари тўғрисида”ги қонун талабларини бузиб, савдо дўкони фаолиятини тўхтатиш ҳақида ноқонуний топшириқ бергани ортидан Президент ҳузуридаги тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил девонининг вилоят шўъбаси бош инспектори қарори билан базавий ҳисоблаш миқдорининг (БҲМ) 40 баравари миқдорида (15 миллион сўм) жаримага тортилган.

Жиноят ишлари бўйича Қарши шаҳри судининг 2024 йил 4 ноябридаги қарорига асосан бизнес омбудсманнинг ушбу қарори ўзгартирилиб, жарима миқдори Маъмурий жавобгарлик тўғрисидаги кодекснинг 33-моддасига асосан БҲМнинг 5 бараварига (1 миллион 875 минг сўм) туширилган.

Мазкур иш 2024 йил 27 декабрь куни Қашқадарё вилоят судининг Жиноят ишлари бўйича судлов ҳайъати кассация инстанциясида ҳам кўриб чиқилган. Судья Махфират Очилова раислигидаги ҳайъат ҳуқуқбузар Нормўмин Холбоевнинг шикоятини рад этган.

Кузатувчиларга кўра, ўз ҳудудида чексиз ваколатга эга ҳокимларнинг тадбиркорлар фаолиятига аралашуви одатий ҳолга айланган бўлса-да, уларнинг бу сира қилмиши учун жазоланиши камёб воқеа саналади.

Озодлик аввалроқ ҳокимларнинг тадбиркорлар ишига аралашуви муаммосини таҳлил қилганди.

2025 йил 1 январидан эътиборан Германия бутун дунё бўйлаб Консуллик хизматлари порталини ишга туширди. Бу ҳақда мамлакат ташқи ишлар вазирлиги маълум қилди.

Шу тариқа Германиянинг жаҳон бўйлаб 167 та виза бўлими рақамли тизимга ўтмоқда. Бу эса кўплаб давлатлар фуқаролари Германия визасига онлайн ариза топшириши мумкинлигини англатади. Мазкур имконият тақдим этилган давлатлар сафида Ўзбекистон ҳам бор.

Биринчи январдан бошлаб Германияда ишлаш ёки ўқиш истагида бўлган Ўзбекистон фуқаролари Консуллик хизматлари портали ёрдамида виза олиш учун онлайн тарзда мурожаат қилиши мумкин. Эндиликда виза учун почта орқали ҳужжат юборишга ҳожат қолмайди.

Германия ташқи ишлар вазири Анналена Бербок баёнотига кўра, мамлакат иқтисодиётига ҳар йили камида 400 минг нафар малакали ишчи керак бўлади. Рақамли хизмат кўрсатувчи Консуллик хизматлари порталининг ишга туширилиши ҳам хориждан малакали ишчиларни жалб этишга қаратилган чоралардан бири саналади.

ТИВ раҳбари таъкидича, онлайн виза тартиби узоқ вақт давом этадиган қоғозбозликка барҳам бериб, Германияни ишчи кучи ва талабалар учун янада жозибадор қилади.

Бербок виза учун онлайн мурожаат қилиш имкони яратилганини “чинакам маъмурий инқилоб” деб атаган.

Озодлик аввалроқ Ўзбекистон президенти Шавкат Мирзиёев мамлакат Ташқи ишлар вазирлигига бир қатор Ғарб давлатлари, жумладан, Германияда ўқиш, малака ошириш ҳамда ишлаш истагида бўлган фуқароларга енгиллик бўлиши учун виза тартибини соддалаштириш бўйича зарур чоралар кўришни топширгани ҳақида хабар қилган эди.

Ўтган йилнинг кузида Самарқандда ўзбек расмийлари билан ўтказилган музокара ортидан Германия ички ишлар вазири Нэнси Фезер ўзбекистонликлар учун ишчи визасини бериш тартиби енгиллаштирилиши мумкинлигини айтганди.

Жиноят ишлари бўйича Андижон шаҳри суди Россия армияси сафида Украинага қарши жанг қилган Ўзбекистон фуқаросига нисбатан ҳукм чиқарган. 2024 йил 4 декабрь куни ўқилган ҳукмдан жамоатчилик қарийб бир ой ўтиб хабар топмоқда.

Gazeta.uz нашрининг тергов-суд ҳужжатларига таянган ҳолда ёзишича, 2023 йил апрель ойида мавсумий иш топиш мақсадида Москвага борган 39 ёшли Т.А. Россия Федерацияси Қуролли кучлари сафига қўшилиш ҳамда Украинага қарши ҳарбий ҳаракатларда қатнашишга қарор қилган.

2023 йил 21 июлида Россия Қуролли кучлари билан 625-сонли шартнома тузган судланувчи ўша йилнинг декабригача Украинанинг Шахтёрск ва Бахмут шаҳарларида олиб борилган жангларда қатнашган.

39 ёшли Т.А.га жанговар ҳаракатларда қатнашгани учун ойига 450 минг рубль (ўша пайтдаги курс бўйича тахминан 4950 доллар/57,5 миллион сўм) ваъда қилинган. Аввалига у 150 минг рублдан икки бор мояна олган, аммо кейин тўловлар тўхтаган.

2023 йил 31 декабрь куни фуқаро Қозоғистон чегарасини кесиб ўтиб, Ўзбекистонга қайтган. Шундан сўнг у ўз ихтиёри билан ҳуқуқ-тартибот идораларига мурожаат қилган ва Россия Қуролли кучларида хизмат қилганини тасдиқловчи барча ҳужжатларни тақдим этган, дейилган тергов ҳужжатида.

Суд йиғилишида судланувчи қилмишидан пушаймонликни билдириб, буни оғир моддий аҳволи ва оиласининг ягона боқувчиси экани билан изоҳлаган.

Судланувчи жанговар ҳаракатлар мобайнида ўндан ортиқ украиналик ҳарбийни ўлдирганини тан олган.

Суд уни Ўзбекистон Жиноят кодекси 154-моддасининг 1-қисми (ёлланиш / 5 йилдан 10 йилгача озодликдан маҳрум қилиш билан жазоланади) ва 154−1-моддасининг 1-қисми (хорижий давлатларнинг ҳарбий хизматига кириш, ёлланиш / БҲМнинг 300 бараваригача жарима ёки 3 йилгача ахлоқ тузатиш ишлари билан жазоланади) билан айбдор деб топган.

Қайд этилишича, суд жазони енгиллаштирувчи ҳолатларни (айбига тўлиқ иқрорлиги, пушаймонлиги, муқаддам судланмагани, оилавий аҳволи ва уч фарзанди борлиги) инобатга олиб, унга 4 йилу 2 ой муддатга озодликдан чеклаш жазосини тайинлаган.

Таҳлилларга қараганда, Украинада Россия қўшини сафида жанг қилаётганлар орасида ўзбекистонликлар кўпчилик ташкил қилади. Улар асосан Россияда судланиб, қамоқхонада жазо ўтаётган кишилардир. Бироқ ёлланмалар орасида РФ фуқаролигини олиш ёки пул ишлаш мақсадида ўз ихтиёри билан урушга кетганларни ҳам учратиш мумкин.

Озодлик аввал хабар қилганидек, 2024 йил октябрь ойида рус армиясига ёлланган самарқандлик эркакка 3 йил озодликдан маҳрум қилиш жазоси тайинланган.

Россиянинг “Вагнер” хусусий ҳарбий ширкати сафида ярим йил мобайнида Украинада жанг қилган фуқаро Ш.Йўлдошевга нисбатан Оҳангарон тумани суди томонидан 2 йилу 6 ой муддатга ахлоқ тузатиш ишлари жазоси тайинлангани ҳам маълум.