"Ўзавтосаноат" General Motorsнинг Асака автомобиль заводидаги улушини сотиб олди. Бу ҳақда Kun.uz хабар қилди. "Ўзавтосаноат"нинг расмий сайтида бу ҳақда маълумот йўқ.
kun.uz сайтига кўра, 2008 йили март ойидан GM Uzbekistan'га айланган автомобиль заводининг 25 фоиз улуши, Reuters хабарига кўра, жорий йил бошида бевосита GM'га тегишли эди. Ўша пайтда «Ўзавтосаноат» раҳбари (айни чоғда раҳбар ўринбосари) бўлган Умид Салимов «заводнинг 15 фоиз акцияси сотиб олингани, GM тасарруфида 10 фоиз акция қолаётгани»ни билдирганди.
Унинг шу йил май ойида журналистларга берган интервьюсида «йил охирига қадар барча акциялар сотиб олиниши» ҳақида айтилганди. Аммо, расмийлар акциялар қанча баҳода сотиб олингани ва келишувдаги бошқа шартларни ошкор этмаяпти.
Мамлакат шарқидаги аҳоли энг зич жойлашган Андижон вилоятида қурилган завод, дастлаб, корейслар билан ҳамкорликда ишга туширилган. 1996 йили Асакадаги завод Жанубий Кореянинг Daewoo Motors ва «Ўзавтосаноат» ҳамкорлиги ҳосиласи бўлди.
Завод бир йилда 250 минг дона автомобиль ишлаб чиқариш қувватига эга. Унинг айримлари Ravon бренди остида халқаро бозорга чиқарилади.
Давлат монополияси ўрнатилган, енгил автомобиллар ишлаб чиқаришга ихтисослашган тармоқни Президент Шавкат Мирзиёев ҳам танқид қилганди. Унга кўра, завод халқ ва давлат учун фойда келтирмайди.
