Ўзбекистон ҳудудида айрим турдаги тамаки маҳсулотлари, никотинни истеъмол қилиш мосламалари, шу жумладан, электрон сигареталарни ишлаб чиқариш, тайёрлаш ва ўтказиш тақиқланиши мумкин.

Ўзбекистон Либерал-демократик партияси фракциясининг 6 январь куни бўлиб ўтган йиғилишида ушбу тақиқ кўзда тутилган қонун лойиҳаси муҳокама қилинган.

Партия матбуот хизмати қайдича, сўнгги йилларда никотинни етказиб бериш мосламалари, электрон сигареталар ва улар учун суюқликлар ҳамда қиздириладиган тамаки маҳсулотларининг Ўзбекистонга қонунга хилоф равишда олиб кириш ҳолатлари ва айланмаси ортиб бормоқда. Бундан ташқари, ушбу маҳсулотларни аҳоли, айниқса, ёшлар орасида истеъмол қилиш ҳолатлари кўпайган.

Шунга кўра бу турдаги маҳсулотларни Ўзбекистон Республикаси ҳудудига олиб кириш ёки ҳудудидан олиб чиқишга нисбатан таъсирчан чора сифатида маъмурий ва жиноий жавобгарлик белгиланиши режалаштирилган.

Gazeta.uz нашрининг аниқлик киритишича, Маъмурий жавобгарлик тўғрисидаги кодексга 186−2-модда (муомаласи тақиқланган тамаки маҳсулотлари, тамакини ҳамда никотинни истеъмол қилиш мосламалари, шунингдек, электрон сигареталар ва чилимларни ишлаб чиқариш, тайёрлаш, олиш, сақлаш, ташиш ёки ўтказиш, реализация қилиш, олиб кириш) киритилиши мумкин. Ушбу қоидабузарлик учун базавий ҳисоблаш миқдорининг 50 бараваридан 100 бараваригача миқдорда (17-34 млн сўм) жарима жазоси назарда тутилади.

Ўзбекистон Жиноят кодексини ҳам шу номдаги 186−4-модда билан тўлдириш таклиф этилмоқда. Ушбу хатти-ҳаракатларнинг оғирлик даражасига кўра жаримадан тортиб 12 йилгача озодликдан маҳрум қилиш жазоси белгиланиши кўзда тутиляпти.

Жорий йилнинг 1 февралидан эътиборан Ўзбекистонда темирйўл чипталари нархи оширилади. Бу ҳақда маълум қилган “Ўзбекистон темир йўллари” АЖ матбуот хизмати нарх қимматлашини темирйўл инфратузилмаси харажатлари, электр энергияси, ёқилғи ва транспорт харажатларини қоплаш, юқори тезликда ҳаракатланувчи электропоездларни харид қилиш ва йўловчи вагонлари паркини янгилаш каби мақсадлар билан изоҳлаган.

Янги тарифга мувофиқ, юқори тезликда ҳаракатланувчи “Афросиёб” электропоездларининг VIP, бизнес тоифадаги чипта нархлари 25 фоизга, эконом тоифадаги чипта нархлари 20 фоизга, “Шарқ”, “Насаф” ва “Ўзбекистон” поездларнинг чипта нархлари эса 30 фоизга оширилмоқда.

“Афросиёб” электропоезди йўлкираси қуйидаги кўринишда бўлади:

Тошкент–Бухоро:

• VIP – 994 000 сўм;

• бизнес – 751 000 сўм;

• эконом– 484 000 сўм;

Тошкент—Қарши:

• VIP – 854 000 сўм;

• бизнес – 634 000 сўм;

• эконом – 406 000 сўм.

Тошкент–Самарқанд:

• VIP – 619 000 сўм;

• бизнес – 450 000 сўм;

• эконом – 294 000 сўм.

“Ўзбекистон темир йўллари” 2024 йил 20 январидан “Афросиёб”, “Шарқ”, “Насаф” ва “Ўзбекистон” поездлари чипта нархини 20 фоизга кўтарган эди.

2024 йил 15 майидан эса “Афросиёб” электропоездларининг чипта нархи 20-40 фоиз миқдорида оширилганди.

Озодлик аввал хабар қилганидек, Олий Мажлис Сенатида темирйўл чипталари қимматлаб кетгани ҳолда хизмат сифати яхшиланмагани танқид қилинган. Юқори палата чипта нархи холислик, ҳалоллик мезонлари асосида белгиланганини савол остига олган.

Андижон вилояти Марҳамат туманидаги хонадонда рўй берган газ портлаши оқибатида бир киши вафот этди.

Daryo.uz нашрининг Бош прокуратура матбуот хизматидан олинган маълумотга таянган ҳолда ёзишича, 3 январь куни соат 03:00 атрофида Шомат маҳалласи Ипак йўли кўчасида яшовчи фуқаро Х.Шокиров хонадони ётоқхонасида қўлбола усулда қурилган иситиш печини ёқмоқчи бўлиб гугурт чаққан вақтида хонага тўпланган табиий газ ва ҳаво аралашмасидан чақнаш юз берган.

Оқибатда ушбу хонада бўлган Х. Шокиров танасининг 90 фоизи, турмуш ўртоғи Л. Шокирова танасининг 35-40 фоизи, ўғли Ж.Ҳамзаев танасининг 20-30 фоизи, қизи Х. Ҳамзаева танасининг 70 фоизи қисми куйиши ташхиси билан шифохонага ётқизилган.

Вояга етмаган Х. Ҳамзаева олиб борилган тиббий муолажаларга қарамай 4 январь куни вафот этган. Оиланинг қолган аъзолари шифохонада қолмоқда.

Жабрланувчиларга нисбатан суд-тиббий экспертизаси тайинланган. Ҳолат юзасидан туман прокуратураси томонидан терговга қадар текширув олиб борилмоқда.

“Ҳудудгазтаъминот” акциядорлик жамияти мулозимига кўра, 2024 йилнинг 11 ойи мобайнида Ўзбекистон бўйлаб газ билан боғлиқ 74 та бахтсиз ҳодиса қайд этилган. Оқибатда 82 нафар одам қурбон бўлган, 80 дан зиёд киши турли даражада тан жароҳати олган.

2024 йил 17 декабрь куни Фарғона шаҳри Аҳмад Яссавий кўчасида жойлашган “Petrolium” пропан газ тўлдириш шохобчасида содир бўлган портлаш ҳам ижтимоий тармоқларда қизғин муҳокама қилинган. Расмий версияга кўра, портлаш оқибатида тўрт киши ҳалок бўлган. Аммо воқеа гувоҳлари Озодликка расман хабар қилинганидан кўпроқ одам қурбон бўлганини айтган.

Сурхондарё вилояти Денов туманида ўқувчиларни совуқ ҳавода юпун кийимда тадбирга жалб қилган мансабдорлар интизомий жазога тортилди. Бу ҳақда Болалар омбудсмани матбуот хизмати маълум қилди.

Аввалроқ ижтимоий тармоқларда ўқувчилар қаҳратон совуқда юпун кийимда тадбирга олиб борилгани танқидларга сабаб бўлганди.

Аниқланишича, 2024 йил 6 декабрь куни Денов туманида кўприк очилиш маросимига тумандаги 14 ва 16-сонли мусиқа мактабларининг ўқувчилари (16 нафар қиз ҳамда 4 нафар ўғил бола) Маданият бошқармаси топшириғига кўра енгил байрамона кийимда жалб қилинган.

Болалар омбудсмани тақдимномаси асосида Маданият вазирлиги болаларнинг соғлиғи хавф остига қўйилгани юзасидан ҳудуднинг тегишли мансабдорларига нисбатан интизомий жазо қўллаган.

Kun.uz нашри кўприк очилишида Сурхондарё вилояти ҳокими Улуғбек Қосимов ҳам вилоят фаоллари билан биргаликда қалин кийимларда ҳозир бўлганига эътибор қаратган.

Ҳолат юзасидан вилоят ҳокимига бирор чора кўрилгани маълум эмас.

Болаларни совуқ об-ҳавода турли тадбирларга жалб қилиш ҳолатлари аввал ҳам кўп марта кузатилган. Озодлик бир муддат аввал совуқда ўқувчиларни юпун кийимда байроқ ҳилпиратишга олиб чиққан Андижондаги мактаб раҳбарлари ишдан олингани ҳақида хабар қилган эди.

Собиқ Олий ва ўрта-махсус таълим вазири Абдуқодир Тошқулов талаба қизларнинг меҳмонларни кутиб олиш учун совуқда адрас кўйлак кийиб гул кўтариб боришини “мажбурий меҳнатнинг бир кўриниши” ўлароқ баҳолагани маълум.

Айиқ билан машғулот ўтказиб, ҳуқуқбузарликка йўл қўйган боксчи Шаҳрам Ғиёсов базавий ҳисоблаш миқдорининг уч баравари миқдорида жаримага тортилди.

Экология, атроф-муҳитни муҳофаза қилиш ва иқлим ўзгариши вазирлиги матбуот хизматининг маълум қилишича, спортчига нисбатан Маъмурий жавобгарлик тўғрисидаги кодекснинг 111-моддасига кўра баённома расмийлаштирилган.

Шаҳрам Ғиёсов вазирликка чақиртирилиб, унга жисмоний шахслар томонидан ёввойи ҳайвонларни сақлаш ва турли мақсадларда фойдаланиш, ҳайвонларга шафқатсиз муносабатда бўлиш тақиқлангани тушунтирилган.

Қайд этилишича, боксчи узр сўраган, ўз хатосини тушуниб етгани ва бундай ҳолат бошқа такрорланмаслигини таъкидлаган.

Пировардида айиқ Фарғона ҳайвонот боғига топширилган.

2024 йил охирида ижтимоий тармоқларда тарқалган Шаҳрам Ғиёсовнинг айиқ билан “cпарринг” тушаётган акс этган видеолавҳа жамоатчиликнинг эътирозига сабаб бўлганди.

Видеода бокс бўйича жаҳон чемпиони ва Олимпиада кумуш медали совриндори Шаҳрам Ғиёсов спорт залида тумшуғбоғдаги айиқ билан жанг қилиб, жониворни бир неча бор чалқанчасига йиқитганини кўриш мумкин. Беллашув давомида бошқа бир киши айиқни жиловда ушлаб турган.

Вазирлар Маҳкамасининг “Ёввойи ҳайвонларни сақлаш тартибини такомиллаштириш чора-тадбирлари тўғрисида”ги қарорига кўра, 2025 йил 1 январидан эътиборан жисмоний шахслар томонидан ярим эркин шароитларда, сунъий яратилган яшаш муҳитида ёки тутқунликда сақланиши тақиқланган ёввойи ҳайвонлар рўйхати тасдиқланган. Бу рўйхатга айиқ ҳам киритилган.

Ҳукумат ҳужжатига мувофиқ, бошқа ҳайвонлар қатори айиқларни ҳам давлат ва мобил циркларида (шапитолар) сақлаш ҳамда улардан цирк томошаларини ўтказиш мақсадларида фойдаланиш ман этилади.

Тошкент вилояти Бекобод шаҳри ИИБ биносида фуқарони калтаклаб, унинг ўлимига сабаб бўлган ички ишлар ходими Фирдавс Мурадуллаев 9 йил муддатга озодликдан маҳрум қилинди. Бу ҳақда Kun.uz нашри суд ҳукмига таянган ҳолда хабар қилди.

Ўттиз уч ёшли Фирдавс Мурадуллаев 2022 йил январ ойидан 2024 йил 1 июлига қадар Тошкент вилояти ИИББ учинчи минтақавий ҳудуд Бекобод шаҳри ИИБ ЖХХ ҳуқуқбузарликлар профилактика бўлинмаси профилактика инспектори лавозимида ишлаб келган.

Тергов хулосасида қайд этилишича, 2024 йил 19 июнь куни соат 17:30 ларда профилактика инспекторлари томонидан ИИБ ходимларининг қонуний талабларини бажармасдан фаол қаршилик кўрсатгани сабабли ака-ука Дилмурод ва Дилшод Юсупвалиевлар ЖИБ Бекобод шаҳри суди биносидан Бекобод шаҳри ИИБ маъмурий биносига куч ишлатиб олиб келинган. Фирдавс Мурадуллаев Дилмурод Юсупвалиевнинг қўлларини орқага қайирган ҳолда қаддини буккан ҳамда қорин қисмига тиззаси билан зарба берган. Сўнгра уни ерга йиқитиб, юз ва қорин қисмларига зарба бериб, оғир тан жароҳати етказган.

Судланувчи вақтинча ушлаб туриш учун тегишли қарор қабул қилинмаганини билатуриб, ака-ука Юсупвалиевларни ИИБ биноси ичидаги ВУТХга киритишга эришган. Оқибатда Дилмурод Юсупвалиев воқеа жойида вафот этган.

Ф.Мурадуллаев жиноий ҳаракатларини давом эттириб, ВУТХ ичида Дилшод Юсупвалиевни ҳам калтаклаган.

Суд Ф.Мурадуллаев Жиноят кодексининг 104-моддаси 3-қисми “д” банди (қасддан баданга оғир шикаст етказиш жабрланувчининг ўлимига сабаб бўлиши), 109-моддаси 1-қисми (қасддан баданга енгил шикаст етказиш) ва 206-моддаси 1-қисмида (ҳокимият ёки мансаб ваколати доирасидан четга чиқиш) айбдор деб топган. Узоқ йил қамоққа ҳукм қилинган ходим 3 йил муддатга ИИБ тизимида, давлат иштирокидаги ташкилотларда раҳбарлик ҳамда моддий жавобгарлик билан боғлиқ лавозимларда ишлаш ҳуқуқидан ҳам маҳрум қилинган.

Бекобод шаҳри ИИБ биносига олиб борилган 43 ёшли эркак вафот этгани ижтимоий тармоқларда қизғин муҳокамаларга сабаб бўлганди.

Ўшанда ИИБ фуқаро ички ишлар идорасига кириш йўлагида соғлиғи ёмонлашгани оқибатида вафот этганини иддао қилганди. Фаоллар эса эркакнинг ўлимига ИИБ ходимлари томонидан калтаклангани сабаб бўлганини билдиришган эди.

Олий Мажлиснинг Инсон ҳуқуқлари бўйича вакилига кўра, 2024 йилнинг 10 ойи мобайнида ҳуқуқни муҳофаза қилувчи органлар ходимлари томонидан ҳаракатланиш эркинлиги чекланган шахслар сақланадиган жойларда сақланаётган фуқароларга нисбатан руҳий, психологик, жисмоний ёки бошқача тарзда босим ўтказилгани юзасидан 158 та шикоят келиб тушган. Шикоятларни кўриб чиқиш натижасида 10 нафар ходимга нисбатан интизомий таъсир чораси қўлланган. Учта ҳолатда ходимларга нисбатан ЖКнинг тегишли моддалари бўйича жиноят иши қўзғатилган.

Қозоғистон билан Ўзбекистон ўртасида янги темирйўл барпо этилмоқда.

“Қозоғистон темирйўллари” компанияси матбуот хизмати қайдича, 2027 йилда ишга туширилиши кутилаётган янги Дарвоза–Мақтаорол линияси Сариоғоч–Тошкент йўналишига муқобил йўл бўлиб, Сариоғоч станциясидаги юкламани камайтириш ва Ўзбекистонга экспортни кўпайтириш имконини беради.

286 миллиард тенгелик (545,8 миллион доллар) инвестиция лойиҳаси доирасида бугунги кунга қадар 203 километрдан 100 километрга яқин рельс-шпал тармоқлари йиғилди. Лойиҳани амалга ошириш учун 46 та йўл-қурилиш техникаси ва 70 дан ортиқ ишчи жалб этилган.

Қозоғистон томони янги инфратузилма лойиҳаси республиканинг транспорт-транзит салоҳиятини янада ривожлантиришга қаратилганини маълум қилган. Лойиҳа доирасида Қозоғистон–Ўзбекистон давлат чегараси орқали янги ўтказиш пункти очилиши кутилмоқда.

Сўнгги йилларда Марказий Осиё давлатлари темирйўл орқали юк ва йўловчи ташиш ҳажмини оширишга алоҳида эътибор қаратмоқда.

Озодлик янги йил арафасида узунлиги 486 километрни ташкил этувчи Хитой–Қирғизистон–Ўзбекистон темирйўлига тамал тоши қўйилгани ҳақида хабар қилган эди.

Қашғар – Торугарт – Макмал – Жалолобод – Андижон йўналиши бўйлаб ўтадиган халқаро темирйўлнинг йиллик юк ташиш ҳажми 15 миллион тоннагача етиши, товарни якуний истеъмолчига етказиш муддати 7 кунга қисқариши кутилмоқда.

2024 йил 16 ноябридан Олмаота – Туркистон – Тошкент – Олмаота йўналиши бўйича илк темирйўл саёҳат дастури ҳам йўлга қўйилганди.

Қашқадарё вилояти Қарши шаҳри ҳокими Нормўмин Холбоев тадбиркорга тегишли савдо дўкони фаолиятини асоссиз тўхтатгани учун жавобгарликка тортилди.

Daryo.uz нашрининг хабар қилишича, ҳоким “Тадбиркорлик фаолияти эркинлигининг кафолатлари тўғрисида”ги қонун талабларини бузиб, савдо дўкони фаолиятини тўхтатиш ҳақида ноқонуний топшириқ бергани ортидан Президент ҳузуридаги тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил девонининг вилоят шўъбаси бош инспектори қарори билан базавий ҳисоблаш миқдорининг (БҲМ) 40 баравари миқдорида (15 миллион сўм) жаримага тортилган.

Жиноят ишлари бўйича Қарши шаҳри судининг 2024 йил 4 ноябридаги қарорига асосан бизнес омбудсманнинг ушбу қарори ўзгартирилиб, жарима миқдори Маъмурий жавобгарлик тўғрисидаги кодекснинг 33-моддасига асосан БҲМнинг 5 бараварига (1 миллион 875 минг сўм) туширилган.

Мазкур иш 2024 йил 27 декабрь куни Қашқадарё вилоят судининг Жиноят ишлари бўйича судлов ҳайъати кассация инстанциясида ҳам кўриб чиқилган. Судья Махфират Очилова раислигидаги ҳайъат ҳуқуқбузар Нормўмин Холбоевнинг шикоятини рад этган.

Кузатувчиларга кўра, ўз ҳудудида чексиз ваколатга эга ҳокимларнинг тадбиркорлар фаолиятига аралашуви одатий ҳолга айланган бўлса-да, уларнинг бу сира қилмиши учун жазоланиши камёб воқеа саналади.

Озодлик аввалроқ ҳокимларнинг тадбиркорлар ишига аралашуви муаммосини таҳлил қилганди.

2025 йил 1 январидан эътиборан Германия бутун дунё бўйлаб Консуллик хизматлари порталини ишга туширди. Бу ҳақда мамлакат ташқи ишлар вазирлиги маълум қилди.

Шу тариқа Германиянинг жаҳон бўйлаб 167 та виза бўлими рақамли тизимга ўтмоқда. Бу эса кўплаб давлатлар фуқаролари Германия визасига онлайн ариза топшириши мумкинлигини англатади. Мазкур имконият тақдим этилган давлатлар сафида Ўзбекистон ҳам бор.

Биринчи январдан бошлаб Германияда ишлаш ёки ўқиш истагида бўлган Ўзбекистон фуқаролари Консуллик хизматлари портали ёрдамида виза олиш учун онлайн тарзда мурожаат қилиши мумкин. Эндиликда виза учун почта орқали ҳужжат юборишга ҳожат қолмайди.

Германия ташқи ишлар вазири Анналена Бербок баёнотига кўра, мамлакат иқтисодиётига ҳар йили камида 400 минг нафар малакали ишчи керак бўлади. Рақамли хизмат кўрсатувчи Консуллик хизматлари порталининг ишга туширилиши ҳам хориждан малакали ишчиларни жалб этишга қаратилган чоралардан бири саналади.

ТИВ раҳбари таъкидича, онлайн виза тартиби узоқ вақт давом этадиган қоғозбозликка барҳам бериб, Германияни ишчи кучи ва талабалар учун янада жозибадор қилади.

Бербок виза учун онлайн мурожаат қилиш имкони яратилганини “чинакам маъмурий инқилоб” деб атаган.

Озодлик аввалроқ Ўзбекистон президенти Шавкат Мирзиёев мамлакат Ташқи ишлар вазирлигига бир қатор Ғарб давлатлари, жумладан, Германияда ўқиш, малака ошириш ҳамда ишлаш истагида бўлган фуқароларга енгиллик бўлиши учун виза тартибини соддалаштириш бўйича зарур чоралар кўришни топширгани ҳақида хабар қилган эди.

Ўтган йилнинг кузида Самарқандда ўзбек расмийлари билан ўтказилган музокара ортидан Германия ички ишлар вазири Нэнси Фезер ўзбекистонликлар учун ишчи визасини бериш тартиби енгиллаштирилиши мумкинлигини айтганди.

Жиноят ишлари бўйича Андижон шаҳри суди Россия армияси сафида Украинага қарши жанг қилган Ўзбекистон фуқаросига нисбатан ҳукм чиқарган. 2024 йил 4 декабрь куни ўқилган ҳукмдан жамоатчилик қарийб бир ой ўтиб хабар топмоқда.

Gazeta.uz нашрининг тергов-суд ҳужжатларига таянган ҳолда ёзишича, 2023 йил апрель ойида мавсумий иш топиш мақсадида Москвага борган 39 ёшли Т.А. Россия Федерацияси Қуролли кучлари сафига қўшилиш ҳамда Украинага қарши ҳарбий ҳаракатларда қатнашишга қарор қилган.

2023 йил 21 июлида Россия Қуролли кучлари билан 625-сонли шартнома тузган судланувчи ўша йилнинг декабригача Украинанинг Шахтёрск ва Бахмут шаҳарларида олиб борилган жангларда қатнашган.

39 ёшли Т.А.га жанговар ҳаракатларда қатнашгани учун ойига 450 минг рубль (ўша пайтдаги курс бўйича тахминан 4950 доллар/57,5 миллион сўм) ваъда қилинган. Аввалига у 150 минг рублдан икки бор мояна олган, аммо кейин тўловлар тўхтаган.

2023 йил 31 декабрь куни фуқаро Қозоғистон чегарасини кесиб ўтиб, Ўзбекистонга қайтган. Шундан сўнг у ўз ихтиёри билан ҳуқуқ-тартибот идораларига мурожаат қилган ва Россия Қуролли кучларида хизмат қилганини тасдиқловчи барча ҳужжатларни тақдим этган, дейилган тергов ҳужжатида.

Суд йиғилишида судланувчи қилмишидан пушаймонликни билдириб, буни оғир моддий аҳволи ва оиласининг ягона боқувчиси экани билан изоҳлаган.

Судланувчи жанговар ҳаракатлар мобайнида ўндан ортиқ украиналик ҳарбийни ўлдирганини тан олган.

Суд уни Ўзбекистон Жиноят кодекси 154-моддасининг 1-қисми (ёлланиш / 5 йилдан 10 йилгача озодликдан маҳрум қилиш билан жазоланади) ва 154−1-моддасининг 1-қисми (хорижий давлатларнинг ҳарбий хизматига кириш, ёлланиш / БҲМнинг 300 бараваригача жарима ёки 3 йилгача ахлоқ тузатиш ишлари билан жазоланади) билан айбдор деб топган.

Қайд этилишича, суд жазони енгиллаштирувчи ҳолатларни (айбига тўлиқ иқрорлиги, пушаймонлиги, муқаддам судланмагани, оилавий аҳволи ва уч фарзанди борлиги) инобатга олиб, унга 4 йилу 2 ой муддатга озодликдан чеклаш жазосини тайинлаган.

Таҳлилларга қараганда, Украинада Россия қўшини сафида жанг қилаётганлар орасида ўзбекистонликлар кўпчилик ташкил қилади. Улар асосан Россияда судланиб, қамоқхонада жазо ўтаётган кишилардир. Бироқ ёлланмалар орасида РФ фуқаролигини олиш ёки пул ишлаш мақсадида ўз ихтиёри билан урушга кетганларни ҳам учратиш мумкин.

Озодлик аввал хабар қилганидек, 2024 йил октябрь ойида рус армиясига ёлланган самарқандлик эркакка 3 йил озодликдан маҳрум қилиш жазоси тайинланган.

Россиянинг “Вагнер” хусусий ҳарбий ширкати сафида ярим йил мобайнида Украинада жанг қилган фуқаро Ш.Йўлдошевга нисбатан Оҳангарон тумани суди томонидан 2 йилу 6 ой муддатга ахлоқ тузатиш ишлари жазоси тайинлангани ҳам маълум.

Ўтган йили Ўзбекистонда йиллик инфляция кўрсаткичи 9,8 фоизни ташкил қилган. Бу 2023 йилдаги кўрсаткичдан 1,03 фоизга (бир йил муқаддам 8,77 фоиз эди) кўпдир. Бу ҳақда Статистика агентлиги мамлакатдаги истеъмол нархлари индексига оид ҳисоботида билдирган.

2024 йилнинг сўнгги ойида (декабрь) мамлакатда инфляция 1,04 фоизни ташкил қилган. Агентлик қайдича, бу охирги беш йил ичида энг паст кўрсаткич бўлиб ҳисобланади.

Ҳисоботдан келиб чиқилса, декабрь ойида озиқ-овқат маҳсулотлари нархи 1,8 фоизга ошган. Айни пайтда ноозиқ-овқат маҳсулотлари 0,7 фоизга қимматлаган, пулли хизматлар қиймати эса 0,4 фоизга ошган.

Ўзбекистон Марказий банки биринчи ярим йилликда мамлакатда умумий инфляция йиллик 10,6 фоиз даражасида шаклланаётгани ҳақида маълум қилган эди.

Ўзбекистонда хорижий ўлкалар автотранспорт воситаларининг мамлакатга кириши ва унинг ҳудуди орқали транзити учун йиғимлар ставкалари қайта кўриб чиқилди. 2025 йилга мўлжалланган Давлат бюджети тўғрисидаги қонундаги бу ўзгаришга Gazeta.uz нашри эътибор қаратган.

Ҳужжатда Туркманистонда рўйхатдан ўтган юк машиналарининг кириши учун тўловлар сезиларли даражада оширилганини кўриш мумкин. Жорий йилнинг 1 январидан эътиборан улардан тоннасига қараб тўлов олинади, хусусан, 10 тоннагача — битта юк машинаси учун 130 доллар (аввал 50 доллар бўлган), 10 тоннадан 20 тоннагача — 180 доллар (аввал 100 доллар бўлган), 20 тоннадан ортиқ — 250 доллар (аввал 150 доллар бўлган).

Туркманистоннинг юк автотранспорт воситаларидан учинчи мамлакатлардан юкларни ташиш ва Ўзбекистон ҳудудидан юкларни олиб чиқиш учун эса қўшимча йиғим суммаси 200 долларга (175 доллардан 375 долларга) оширилади.

Европа Иттифоқи давлатлари ва Озарбайжон учун мамлакатда бўлиш вақти бўйича табақалаштирилган тарифлар жорий этилган: 14 кунгача киришда 80 доллар, 14 кундан ортиқ — 280 доллар.

“Ушбу йиғимнинг транспорт воситасини Ўзбекистон ҳудудига киришда ҳисобланган суммаси транспорт воситасини Ўзбекистондан чиқишда қайта ҳисобланиши мумкин. Қайта ҳисоблаш транспорт воситасининг мамлакатда ҳақиқатда бўлиш муддатига боғлиқ”, дейилган нашр хабарида.

Шунингдек, Ўзбекистонга киришда хорижий давлатлар ташувчиларига юкларни автомобилда халқаро ташишга доир рухсатномаларнинг миллий ташувчилар эҳтиёжидан ортиқчасининг ҳар бир донасини реализация қилиш учун 400 АҚШ доллари миқдоридаги йиғим белгиланиши кўзда тутилган. Бунда транзит рухсатномаси учун ушбу йиғим ставкасига нисбатан 0,5 камайтирувчи коэффициент, учинчи мамлакатларга (дан) юк ташиш рухсатномаси учун 2,0 кўпайтирувчи коэффициент қўлланилади.

Эрон автотранспорт воситаларидан Ўзбекистон ҳудудига киргани ва унинг ҳудуди орқали транзити учун йиғимлар ставкаси тенглик асосида “0” этиб белгиланади.

Қолган мамлакатлар учун тўловлар аввалги даражада сақлаб қолинган, хусусан, Тожикистон — тоннаcига қараб 100−150−200 доллар, Қозоғистон — 300 доллар, Қирғизистон — 300 доллар, Афғонистон — 50 доллар, қолган давлатлар эса 400 доллар миқдорида.

Октябрь ойида Ўзбекистон ва Туркманистон транспорт хизматлари учун тўловларни тенг ва шаффоф асосда олишга келишишган. Маълумотларга кўра, 2025 йилдан бошлаб миллий ташувчилар учун йиғимлар тенглаштирилади.

2025 йилнинг 1 январь куни Тошкент вақти билан соат 17:00 ҳолатига кўра Ўзбекистонда жами 1040 нафар чақалоқ дунёга келган. Бу ҳақда Соғлиқни сақлаш вазирлиги маълумот тарқатди.

Вазирлик қайдича, туғилган чақалоқларнинг 492 нафари ўғил, 548 нафари қиз.

Энг кўп туғилиш Фарғона вилоятида (154 нафар) қайд этилган. Айни куни Қашқадарё вилоятида 119 нафар, Тошкент шаҳрида 112 нафар, Самарқанд вилоятида эса 101 нафар бола туғилган. Туғилиш бўйича энг паст кўрсаткич Навоий вилоятида — 18 нафар.

Чақалоқларнинг орасида еттитаси эгизак (олтитаси икки ҳомилали, биттаси уч ҳомилали).

Ўзбекистонда аҳоли сони ўсиб бораётганига қарамай, туғилиш йилдан йилга қисқариб бораётганини кузатиш мумкин. Бу ҳолатни сўнгги йиллардаги Янги йил биринчи кунида туғилган чақалоқлар сонида ҳам кўриш мумкин. ССВ маълумотига кўра, 2020 йилнинг илк кунида 1111 нафар, 2021 йилда — 1086 нафар, 2022 йилда — 1448 нафар, 2023 йилда — 1312 нафар, 2024 йилда эса 1043 нафар чақалоқ дунёга келгани қайд этилган.

Ўзбекистоннинг Россиядаги элчихонаси томонидан РФ ҳудудида ота-она қарамоғисиз қолган 15 нафар вояга етмаган бола ватанига қайтарилган. Бу ҳақда хабар қилган “Дунё” ахборот агентлиги бу ишни дипломатик ваколатхона Ижтимоий ҳимоя миллий агентлиги, Ички ишлар ва Соғлиқни сақлаш вазирликлари билан биргаликда амалга оширганини урғулади.

Қайд этилишича, Ўзбекистондан Россияга бор ишчи гуруҳ қаровсиз қолган болаларга оид зарур ҳужжатларини йиғиш мақсадида икки ҳафта давомида РФнинг турли ҳудудларида бўлган.

Ҳудудлардан йиғилган ёрдамга муҳтож ўзбекистонлик болаларнинг барчаси аввалига Москва шаҳридаги вояга етмаганлар учун мўлжалланган ижтимоий реабилитация марказига жойлаштирилган, кейин эса улар Ўзбекистонга қайтарилган.

Хабарга мувофиқ, вояга етмаган болалар Ўзбекистонда яқин қариндошларига ёки мамлакатдаги махсус болалар муассасаларига топширилади.

Бу Россияда қаровсиз қолган болаларнинг Ўзбекистонга илк бора қайтарилиши эмас. Дейлик, шу йилнинг сентябрь ойи бошида Россияда ота-она қарамоғисиз қолган қийин вазиятга тушиб қолган 14 нафар, август ойида эса 31 нафар бола Ўзбекистонга олиб келингани ҳақида хабар қилинган.

Бухоро нефтни қайта ишлаш заводи ишлаб чиқараётган автобензин дохил барча турдаги нефть маҳсулотлари 2025 йилнинг 1 январидан бошлаб фақат биржа савдолари орқали сотувга чиқарилади. Бу ҳақда “Ўзбекнефтгаз” матбуот хизмати маълумот тарқатди.

Хабарномада бугунги кунда Ўзбекистонда товарлар ва хизматлар бозорида рақобат муҳитини пайдо қилиш, монополияни босқичма-босқич камайтириш, тақсимлаш тизими унсурларини тугатиш, хўжалик юритувчи барча субъектларнинг моддий-техника ресурслар билан таъминланишида тенг шарт-шароитларни яратиш юзасидан амалий ишлар олиб борилаётгани қайд этилган.

Айни пайтда унда мамлакат аҳолисининг автобензинга бўлган талабини бир маромда қондириш масаласи давлат назоратига олингани урғуланган.

“Ўзбекнефтгаз” АЖ октябрь ойи охиридан АИ-92 бензинини товар-хом ашё биржасига чиқаришни бошлаган. Ўшанда Бухоро НҚИЗда ишлаб чиқариладиган бензиннинг бир тоннаси 11,5 миллион сўмдан сотилаётгани, бироқ бензин нархини пасайтиришга уринилаётгани айтилган эди.