Нур-Султон, Олмаота ва Чимкентда митингчилар қўлга олинмоқда
4 январь куни пойтахтда полиция шаҳар акимати ёнида камида уч кишини қўлга олди. Озодлик мухбирининг воқеа жойидан хабар беришича, қўлга олиш чоғида митингчилардан бири “Чол, кет!” дея қичқирган, икки кишига нисбатан куч ишлатилган. Улар Озодлик мухбирига жанаўзенликларни дастаклаш учун акцияга чиқишганини, бироқ “уй-жой муаммоси”ни ҳал этишни талаб қилишганини билдирганлар.
Нур-Султон акимати яқинида ҳамон бир нечта автозак турибди. Ҳудудда мобил интернет узиб қўйилган.
Олмаотада 4 январь куни Республика майдони тўсилиб, мобил интернет чеклаб қўйилди. Полиция одамларни майдонга ўтказмаяпти, бу эса норозилик ортишига сабаб бўлаётир.
Чимкентда полиция ўнлаб кишиларни акимат биноси қаршисидаги эҳтимолий митинг жойидан куч билан олиб кетди. Одамлар манғистауликларга далда бўлувчи сўзлар айтишди, нарх-наво кўтарилишини тўхтатишни ва иш ҳақларини оширишни талаб қилишди.
Қўлга олиш чоғида митингчилар “Назарбоев, кет!” ва “Биз Манғистау биланмиз!” дея қичқиришди.
Фуқаро кийимидаги номаълум кишилар Озодлик мухбирининг ишлашига халал бериб, унинг воқеаларни видеотасвирга олишига имкон беришмаган.
Намойишчиларни Қозоғистоннинг турли сиёсий кучлари ва фаоллари қўллаб-қувватламоқда.
Аввалроқ, чет элда яшаётган мухолиф сиёсатчи Мухтор Аблязов ўз тарафдорларини 4 январь куни митингга чиқишга даъват қилган эди.
Полиция “профилактика тариқасида” одамларни қўлга олмоқда, митингга чиққанлар жавобгарликка тортиляпти. Хусусан, Олмаотада камида ўн нафар фаолга маъмурий қамоқ тайинланди.
Қасим-Жомарт Тоқаев твити
Қозоғистон президенти Қасим-Жомарт Тоқаев “Twitter”даги саҳифасида Ақтауда ҳукумат комиссияси иш бошлаганини ва намойишчилар “масъулиятни ҳис этиб, мулоқотга тайёрликларини кўрсатишлари лозим”лиги ҳақида хабар қолдирди.
“Шал, кет!” (“Чол, кет!”)
Ижтимоий тармоқларда ёйинланган видеоларда Ақтау майдонида тўпланган юзлаб киши “Шал, кет!” (“Чол, кет!”) деб хитоб қилаётгани акс этган. Бу шиор собиқ президент Нурсултон Назарбоевнинг сиёсатдан кетиши талаби билан ўтказиладиган кўплаб норозилик акцияларида янграйди.
Қайнаётган Жанаўзен: Ҳукумат намойишларни куч билан бостирмоқчи