Тоқаев: КХШТ ҳарбийларини Қозоғистондан олиб чиқиб кетиш 2 кундан сўнг бошланади
Президент Қасим-Жомарт Тоқаев парламент қуйи палатасининг 11 январь куни ўтказилган йиғилишида Коллектив хавфсизлик шартномаси ташкилотига аъзо давлатларнинг қўшинларини Қозоғистондан олиб чиқиб кетилиши шу ҳафта бошланиши ва бу жараён 10 кундан кўп вақт олмаслигини билдирди.
“КХШТ тинчликпарвар контингентининг асосий миссияси якунланди. Икки кундан сўнг тинчликпарвар контингентни олиб чиқиш бошланади. КХШТ қўшинлари 10 кун давомида олиб чиқиб кетилади”, деган Тоқаев қуйи палата мажлисида.
Россия етакчилигидаги Коллектив хавфсизлик шартномаси ташкилотига аъзо давлатлар президент Тоқаев илтимоси ортидан тартибсизликларни бостириш учун Қозоғистонга ўз қўшинларини йўллаган эдилар. Хусусан, Россия бу баҳона билан Қозоғистонга бир неча минг ҳарбий жўнатган.
Қозоғистон президенти Қасим-Жомарт Тоқаевнинг 5 январь куни ҳарбий ёрдам сўраб КХШТга мурожаат қилгани мамлакат ичкарисида ва хорижда кўплаб танқидларга сабаб бўлди. 6 январда Қозоғистонга КХШТ қўшинлари киритилиши ортидан дунёдаги қатор мамлакатлар пойтахтларида одамлар бу амалиётга қарши тинч норозилик акцияларига чиқишган эди.
Тиббиёт мулозими: Тартибсизликлар пайтида тиббий ёрдам сўраб 1200 киши мурожаат қилди
Қозоғистоннинг Олмаота шаҳрида январь воқеалари чоғида 1200 дан ортиқ киши тиббий ёрдам сўраб мурожаат қилган. Бу ҳақда брифингда шаҳар жамоат саломатлиги бошқармаси бошлиғи Нариман Табинбаев маълум қилди.
“4 январдан бугунги кунгача 1205 нафар жабрдийда мурожаат қилди. 329 нафари даволаниб, шифохонадан чиқди, 176 нафари шифохоналарда қолмоқда. Жонлантириш бўлимларида 18 бемор, жумладан уч нафар бола бор”, дея иқтибос келтирган Табинбаев сўзларидан Informburo сайти.
Бошқарма раҳбарига кўра, ҳозирда тез ёрдам хизмати одатдаги тартибда ишламоқда: чақирувлар бўйича 85 та гуруҳ хизмат кўрсатяпти, яна 18 та гуруҳ захирада турибди. Табинбаев тез ёрдам хизмати ходимларига ҳужумлар бўлганини, “шунга қарамай, тез тиббий ёрдам чақирилган манзилларга етиб бориб, беморларга ёрдам кўрсатган”ини айтган.
ТИВ расмийси Қозоғистонда ўзбекистонликлар ҳибсга олингани ҳақида маълумот йўқлигини билдирди
Қозоғистонда Ўзбекистон фуқароларининг ҳибсга олингани ҳақида маълумот йўқ. Бу ҳақда Ташқи ишлар вазирлигининг расмий вакили Юсуф Қобилжонов маълумот тарқатди.
Мулозимга кўра, Ўзбекистоннинг дипломатик ва консуллик муассасалари Қозоғистон ҳуқуқ-тартибот идоралари вакиллари билан жойларда доимий алоқада бўлиб турибди.
Хабарномада ТИВ қўшни Қозоғистондаги вазиятни мунтазам равишда кузатиб бораётгани, Ўзбекистоннинг Қозоғистондаги дипломатик ваколатхоналари – Нур-Султондаги элчихонаси, Олма-ота ва Ақтаудаги бош консулликларида тезкор штаблар ташкил этилгани, қийин аҳволда қолган фуқароларга алоҳида эътибор қаратилиб, талабалар билан алоқа ўрнатилгани, уларга зарур ёрдам кўрсатиш ишлари олиб борилаётгани, Нур-Султон шаҳридаги аэропортда парвозини кутаётган фуқаролар иссиқ овқат билан таъминлангани қайд этилган.
“Олмаотадан Ўзбекистонга қайтишни хоҳловчи фуқаролар рўйхати тузилди. Улар “Uzbekistan Airways” компаниясининг навбатдаги рейслари орқали Ватанга қайтарилади. Ҳозирда Олма-ота аэропорти ёпиқлигича қолмоқда”, дейилган 11 январь куни тушга яқин тарқатилган хабарномада.
Тоқаев парламентдаги чиқишида Нурсултон Назарбоевни танқид қилди
Қозоғистон президенти Қасим-Жомарт Тоқаев 11 январда парламентда сўзлаган нутқи давомида мамлакатнинг аввалги президенти Нурсултон Назарбоевни танқид қилди.
“Биринчи президентнинг, “Элбаси” (элбоши)нинг қўллови ортидан ўта сердаромад ширкатлар ва халқаро миқёсдаги ўта бойларнинг қатлами пайдо бўлди”, деди Тўқаев.
У сўзида давом этар экан, “иқтисодий ўсишдан фақат олигархлар гуруҳи фойда топгани”ни қўшимча қилди.
Тоқаев тоғ-кон ва нефть-газ сектори ўз даромадларини давлат билан бўлишиши шартлигини таъкидлади.
Мазкур тармоқлар Назарбоевнинг яқинлари ва унинг атрофидагиларга тегишли экани айтиб келинади.