Газ йўқлигидан шикоят қилган уч болали аёл кўчага ҳайдалмоқда
Уч ёш фарзанди ва касалманд кекса онаси билан эски ёғоч уйда совуқдан қийналиб яшаётганидан Zimiston-uz блогига шикоят қилган қашқадарёлик Гулсум Номозова маҳаллий раҳбарлар босимига учраган.
Қашқадарё вилояти Ғузор тумани Қоракўл маҳалласи Шўртан қўрғончасидаги ёғоч уйда ижарада яшовчи Гулсумдан 5 январгача уйни бўшатиб қўйиш талаб қилинган.
Гулсум табиий газдан қарздор бўлиб қолгач, уй газдан узилган. Суюлтирилган газга эса Гулсумнинг пули йўқ.
Гулсум уйи ёғочдан бўлгани сабаб, уйни ўтин ёки кўмир билан иситиш мумкин эмас, ёнғин ҳавфи бор. Шу боис уйни қиздириш учун ягона жиҳоз - бу электр печка.
Лекин электр тез-тез ўчиши сабаб бу печкадан ҳам умид кам. Болалар кўрпага ўраниб совуқдан жон сақламоқда.
Гулсум турмушидан ажрашган. У ишсиз. Оила фақат “бола пули” ва онасининг нафақасига кун кўради.
«Аҳоли чироқсиз ўтирибди, Чорвоқ дачаларида эса свет умуман ўчмайди»
Тошкент вилояти Бўстонлиқ тумани Бурчмулла қишлоғидан ZIMISTON-UZ блогига хабар йўллаган манбага кўра, қишлоқда электр энергиясидаги узилишлардан одамлар қийналмоқда:
«Туризм маркази саналган ҳудудимизда табиий газ йўқ, одамлар ток билан уй иситади. Шу кунларда чироқ кўп ўчяпти. Лекин Юсуфхона, Чорвоқдаги дачаларда доим свет бўлади. Ҳеч ким яшамайдиган Сижжак дам олиш жойида ҳам чироқ ёниқ. Электр тармоқлари корхонаси ток таъминотини яхшилаб берса миннатдор бўлар эдик”.
Тошкент тиббиёт институти бир неча соатга электрсиз қолди
Тошкент шаҳри Яшнобод тумани ҳудудида жойлашган Тошкент тиббиёт институти (эски ТошМИ) биносида электр йўқлиги ҳақида тармоқларда видеолар тарқалди.
Тасвирларда касалхонанинг қоронғу хоналари акс этган. Видеода шам кўтарган ҳамшира, телефон чироғи ёруғида бемор билан гаплашаётган шифокор, қоронғуда укол олаётган бемор тасвирланган.
«Ҳудудий электр тармоқлари» Тошкент шаҳар филиали раҳбарияти вазиятни тасдиқлаб, воқеа 18 декабрь куни содир бўлганини билдирган:
“Яшнобод туманидаги қуввати 110/35/10/6 кВ бўлган юқори кучланишли «Водил» подстанциясидан таъминланувчи ер остидан ўтган кабел тармоғи узиб юборилиши натижасида авария ҳолатида таъминотда ўчишлар кузатилди”.
Расмий хабарга кўра, аварияга сабаб бўлган носозлик тезкорлик билан таъмирланган ва шу куннинг ўзида шифохона биноси электр билан таъминланган.
Хабарда шифохонада неча соат электр бўлмаганига ойдинлик киритилмаган.
Андижон ҳокими камбағалларга қуёш панели бермоқчи
Андижон вилояти ҳокими Шуҳрат Абдураҳмонов мамлакатда энергетик бўҳрон кузатилаётган бир пайтда янги ташаббус билан чиқди.
Абдураҳмонов ҳокимликка ёрдам сўраб мурожаат қилган кам таъминланган оилаларга қуёш панели беришни таклиф қилди.
Андижонда моддий ёрдам сўраб мурожаат қилаётган фуқароларнинг аксари электр энергиясидан қарздорлик сабаб ёрдам сўраётгани қайд қилинган.
Ҳокимлик матбуот хизмати хабарига кўра, қуёш панеллари “Темир дафтар” рўйхатида бўлган аҳолига берилади. Ҳокимлик бу режасини тез орада амалга оширишини айтган:
«Панеллар президентимиз номидан топширилади ва хонадонларга ўрнатиб ҳам берилади. Бу орқали ўша хонадоннинг электр энергияси барқарорлашади, харажати камаяди, тўловдаги етишмовчиликлар ортда қолади, хонадонни иситиш осонлашади ва оиланинг ҳозирдаги асосий муаммоларидан бир нечтаси ечим сари юзланади».