Журналист Раҳматуллаев: Шуми инсонга ваъда қилинаётган муносиб ҳаёт?!
Шу пайтгача ҳукумат энергетик бўҳрондан чиқиш учун бир қанча чораларни эълон қилди. 12 декабрь куни Ашхободга борган президент администрацияси раҳбари Сардор Умрзоқов Туркманистон президенти Сердар Бердимуҳаммедов билан газ бўйича янги шартнома имзолаган.
Reuters агентлигига кўра, шартномада қиш ўтгунча Ўзбекистонга қўшимча равишда кунига 20 млн куб метр газ бериш кўзда тутилган. Бу жами 1,5 млрд куб.метр газни ташкил қилади.
Шунингдек, расмийлар Қирғизистондан қарзга электр энергияси ҳам олинганини маълум қилишди.
Бироқ Зимистон-уз блогига келаётган мурожаатларга қараганда, мамлакатдаги энергетик вазият яхшиланганича йўқ.
Тармоқлар ҳам норозилик постлари билан тўлган. Жумладан, бугун - 22 декабрь куни самарқандлик журналист ва маҳалла оқсоқоли бўлиб фаолият юритаётган Тошпўлат Раҳматуллаев Фейсбукдаги саҳифасида энергетик муаммоларни танқид қилди.
"Бунақаси бўлмаган эди! Уйимизда, Боғимайдон маҳалласида газ умуман йўқ" дея ёзган Раҳматуллаев музлаб қолмаслик учун "буржуйка”га ўтин ёққанини айтади:
"Қорайган қўлларни совуқ сувда юваётиб, “шуми Конституцияда ваъда қилинган фуқароларнинг муносиб ҳаёт кечиришларини таъминлашга интилиш; ўтган кунги Мурожаатда барпо этилажак ижтимоий давлатда одамлар муносиб ҳаёт кечиришига зарур шароитлар яратилиши?” деган саволни ўзимга бериб, жавобини тополмай қолдим".
Газ экспорти бўйича статистика: Қай бири тўғри?
Ўзбекистон Давлат статистика қўмитаси маълумотига кўра, жорий йил ноябрида Хитойга 39,6 млн.долларлик газ экспорт қилинган.
Бироқ Хитой томони эълон қилган рақамлар бундан кескин фарқ қилади. Хитой ўтган ой Ўзбекистондан 114,2 млн.долларлик газ импорт қилганини билдирган.
Ўтган 11 ойдаги газ экспортига оид рақамлар ҳам Хитой томони статистикасидан фарқ қилади.
Ўзбекистон Давлат статистика қўмитасига кўра, Ўзбекистон 11 ой давомида жами 910,8 млн долларлик газ экспорт қилган.
Хитой статистик маълумотларига кўра, жорий йилда Ўзбекистондан 1,03 млрд долларлик газ импорт қилинган. Бу Ўзбекистон томони эълон қилган рақамлардан 13 фоизга кўпдир.
«Газета.uz» жорий йилнинг октябрида ҳам газ экспортига оид рақамларда катта фарқ бўлгани ҳақида хабар берган: Ўзбекистон Давлат статистика қўмитаси октябрда жами 91 млн долларга газ экспорт қилинганини айтган бўлса, Хитой томони 148,5 млн долларлик ўзбек гази импорт қилинганини маълум қилган.
Давлат статистика қўмитаси ҳисоботларини шубҳа остига олиб келадиган ққтисодчи Отабек Бакиров статистик рақамларга ишонмаслигини айтади:
"Менинг ўзбек статистикасига муносабатим ишораларни илғаш билан боғлиқ холос. Чунки эълон қилинаётган рақамлар тепадагиларнинг ва бенефициарларнинг кўп хоҳиш ва иродаларини ифодалайди, реалликни эмас.
Шу маънода жиддий қарорлар қабул қилишда ҳукумат ҳам, халқаро институтлар ҳам ўзбек статистикасини жиддий қабул қилмасликлари керак. Тавтология учун узр!"
Ўзбекистон расмийлари жорий йилда газ экспорти тўхтатилганини бир неча марта эълон қилишган.
Дастлаб, жорий йилнинг 16 ноябрида Энергетика вазири ўринбосари Шерзод Хўжаев Хитойга газ экспорти деярли тўхтатилганини маълум қилди.
Декабрь бошида эса “Ўзтрансгаз” компанияси бошқаруви раиси Беҳзод Норматов Хитойга газ экспорти 100 фоизга тўхтатилганини эълон қилди.
Иккала мулозим ҳам ўз баёнотларига бирор ҳужжат тақдим қилганича йўқ.
Ўзбекистон Давлат статистика қўмитаси ўз рақамларининг Хитойникидан фарқ қилишига изоҳ бераркан, эълон қилган статистикаси дастлабки рақамлар экани ва улар кейинчалик яна ўзгаришини таъкидлаган. Қўмитага кўра, рақамларнинг бу каби ўзгариши Божхона низомларида қайд қилинган бўлиб, ҳаммаси қонуний ҳисобланади.
Тошкентда Қозоғистон билан энергетика лойиҳаларида ҳамкорликка келишилди
Қозоғистон президенти Қасим-Жомарт Тоқаевнинг Тошкентга ташрифи давомида жами 15та ҳужжат имзоланди. Бу ҳақда Президент.уз расмий сайтида хабар қилинди.
Ҳужжатлардан бири энергетика соҳасига тегишли бўлиб, «Ўзбекнефтгаз» АЖ ҳамда «КазМунайГаз» АЖ ўртасида Ўзбекистонга нефт етказиб бериш бўйича битим имзоланган. Ҳозирча бу битим қачондан амалга оширилиши ва Қозоғистон Ўзбекистонга қанча нефть етказиб бериши очиқланганича йўқ.
Тармоқларда бу хабар хурсандчилик билан қаршиланиб, эндиликда Ўзбекистонда бензин арзонлашига умид билдирилди.
Тоқаевнинг Тошкентга ташрифи доирасида жами 8 миллиард долларлик савдо ва инвестиция шартномалари имзоланган.
Расмий хабарга кўра, Мирзиёев билан Тоқаев энергетика қувватларини модернизация қилиш ва қуриш, геология қидируви ва табиий газни чуқур қайта ишлаш бўйича лойиҳаларни илгари суришга келишиб олишган.
«Бугун биз юк ташишларнинг барқарор ўсишига эришдик, икки томонлама ва транзит ташишлар учун қулай шароитлар яратишга келишдик. Юк ташиш ҳажмини бир неча баробар ошириш мақсадида транспорт инфратузилмасини кенгайтиришга қаратилган лойиҳаларни тезлаштиришга аҳдлашиб олдик», - деган Шавкат Мирзиёев.
Тармоқлар энергетиклар касб байрамига бағишланган ҳажвиялар билан тўлди
Ўзбекистонда 22 декабрь – Энергетиклар куни сифатида нишонланади.
Ижтимоий тармоқларнинг ўзбек сигментида энергетикларга бағишланган ҳажвий табрик ёзилган постлар пайдо бўлди.
Жумладан, риштонлик блогер Дима Қаюм энергетикларни касб байрами билан табриклаган видеосини қоп-қоронғу жойда олган. Бу билан блогер электрнинг кўп ўчишига ишора қилган.
Мамлакатда энергетик бўҳрон давом этаётган бир пайтда энергетикларга табрик йўллаган “Ўзбекнефтгаз” АЖ Бошқаруви раиси Меҳриддин Абдуллаев ўз қутловида ҳам вазиятни тилга олди.
Абдуллаев табригида айтилишича, энергия ресурслари танқисликларига мамлакат аҳолиси ва иқтисодиёт тармоқларини энергия ресурсларига бўлган талабларини кун сайин ошиб бораётганлиги сабаб бўлмоқда.