Бугун ҳам об-ҳаво сабаб ўнлаб рейслар бекор қилинди
Uzbekistan Airways 11 январь куни ҳам ноқулай об-ҳаво шароити туфайли айрим халқаро рейслар кечикиши, баъзи маҳаллий рейслар эса бекор қилинишинимаълум қилди:
Жумладан, Тошкент-Фарғона-Тошкент, Фарғона-Истанбул-Фарғона, Тошкент-Термиз, Термиз-Москва, Тошкент-Санкт-Петербург-Тошкент, Тошкент-Самарқанд ва Наманган-Уфа-Наманган кечикиб амалга оширилади.
Наманган-Бухоро-Наманган ва Наманган-Самарқанд-Наманган қатновлари ҳам ноқулай об-ҳаво шароити сабабли бекор қилинди.
Uzbekistan Airways бекор бўлган авиақатновлар авиачипталарининг тўлиқ қийматини чипта сотиб олинган жойда қайтариб олиш ёки бошқа санага бепул қайта бронлаш мумкинлигини эслатган.
10 январь куни ҳам Ўзбекистоннинг айрим аэропортларида парвозлар бекор қилинди, баъзи рейслар кечиктирилди ёки бошқа аэропортларга йўналтирилган эди.
Етти вилоятда қор кўчиш хавфи эълон қилинди
Жорий йилнинг 11-16 январ кунлари Қашқадарё, Сурхондарё, Самарқанд , Жиззах, Наманган, Фарғона ва Тошкент вилоятларида тоғ кўчиши мумкин.
Бу ҳақда Ўзгидромет маркази хабар қилди:
- Қашқадарё вилояти: Китоб, Шаҳрисабз, Қамаши, Деҳқонобод туманларида;
- Сурхондарё вилояти: Қумқўрғон, Сариосиё, Узун, Бойсун туманларида;
- Самарқанд вилояти: Қўшработ, Нуробод, Самарқанд, Ургут, Булунғур туманларида;
- Жиззах вилояти: Зомин, Бахмал, Фориш туманларида;
- Тошкент вилояти: Паркент, Оҳангарон, Бўстонлиқ тумани ва Чотқол тизмасининг Чимён тоғларида;
- Наманган вилояти: Поп туманида;
- Фарғона вилояти: Сўх, Фарғона туманларида қор кўчиш хавфи эълон қилинди.
Ўзгидромет тоғли худудларда истиқомат қилувчи фуқаролар, дам олувчилар ҳамда тоғли худудларда ҳаракатланувчи ҳайдовчилардан эҳтиёткорлик чораларини кўришлари сўради.
4 январь куни Тошкент вилоятининг Бўстонлиқ тумани Чимён тоғолди ҳудудида 61 яшар Россия ватандоши қор кўчкиси тагида қолиб ҳалок бўлган эди.
Тошкент вилоятида “заправка”лар ноқонуний фаолият юритаётгани аниқланди
Ўзбекистон энергетика вазири Жўрабек Мирзамаҳмудов бошчилигидаги ишчи гуруҳ табиий газдан ноқонуний фойдаланиш ҳолатларини олдини олиш бўйича Тошкент вилояти Оҳангарон туманида назорат тадбири ўтказди, деб хабар берди вазирлик матбуот хизмати.
Ишчи гуруҳ 10 январь куни соат 02:10 ларда Ўзар МФЙда жойлашган “Barhayot plyus” МЧЖга қарашли автомобилларга газ тўлдириш компрессор шохобчаси (АГТКШ) белгиланган ўчириш графигига риоя этмаган ҳолда фаолият кўрсатаётганини аниқлаган.
Ушбу ҳудудда жойлашган “Metan trans servis” ҳамда “Barhayot plyus” МЧЖларига қарашли АГТКШларнинг газ ҳисоблагичлари белгиланган тартибга зид равишда ўрнатилгани маълум бўлди.
Қайд этилишича, мазкур шохобчаларнинг газ ҳисоблаш ускуналари экспертизадан сўнг фойдаланишга яроқсиз деб топилган ва охирги назорат кунидан бугунга қадар қайта ҳисоб-китоб қилинган. Натижада икки ташкилотга жами 600 млн сўм қўшимча табиий газ тўлови ҳисобланган. Шунингдек, икки ширкат электр энергияси учун жами 111 млн сўм қарздорлиги юзага чиққан.
Вазирлик хабарида ушбу ҳолатда эътиборсизлик қилган “Ўзтрансгаз” АЖ ҳудудий бошқармаси масъулларига чора кўрилган ёки кўрилмагани очиқланмаган.
Пенсия жамғармаси аномал совуқ сабаб аҳолига мурожаат йўллади
Ўзбекистонда икки кундан бери кузатилаётган аномал совуқ сабаб Молия вазирлиги ҳузуридаги Пенсия жамғармаси аҳолига мурожаат қилиб, қария ва кекса ёшдаги фуқаролардан аномал совуқда уйда қолишларини сўраган:
“Об-ҳаво шароитлари яхшилангандан сўнг пенсия тайинлаш учун мурожаат қилишни сўраб қоламиз. Бунда, кечроқ мурожаат қилиш cизнинг пенсияга бўлган ҳуқуқингизга таъсир қилмайди, яъни пенсиялар пенсия ёшига етган санадан тайинлаб берилади”.
Бола туғилганда бериладиган бир марталик суюнчи нафақаси ва фуқароннинг вафоти муносабати билан бериладиган дафн нафақаси тайинлаш учун Пенсия жамғармасига мурожаат қилмай, “Халқ банки”нинг исталган филиалига бориб, тегишли пулни олиш мумкинлиги эслатилган.
Шунингдек, фуқаролар нафақа рад этилишига доир маълумотларни маҳалла фуқаролар йиғинлари ёки Пенсия жамғармасининг 11-40 ишонч телефони орқали олиши мумкинлиги уқтирилган.
Расмий статистикага кўра, 2022 йил 1 декабрь ҳолати бўйича мамлакатда пенсия ва нафақа олувчиларнинг умумий сони 4 млн 316,7 минг нафарни ташкил қилади. Уларнинг аҳоли сонидаги улуши 12 фоизга тўғри келади.