Навальнийнинг матбуот котиби унинг ўлимини тасдиқлади
Навальний жамоаси унинг қамоқхонада ўлганини тасдиқлади. Сиёсатчининг матбуот котиби Кира Ярмиш имзолаган “Теам Навальний” каналида, жумладан шундай хабар пайдо бўлди:
“Алексей Навальний ўлдирилган. Унинг ўлими 16 феврал куни маҳаллий вақт билан соат 14:17 да содир бўлган, бу ҳақда Алексейнинг онасига берилган расмий хабарномада ёзилган.
Колония ходими Навальнийнинг жасади Салехардда эканлигини айтди. Тергов қўмитаси терговчилари уни олиб кетишди. Ҳозир уни “ўрганишмоқда” экан. Биз Алексей Навалнийнинг жасади зудлик билан оиласига берилишини талаб қиламиз”
Байден: Навальнийнинг ўлимида Путин айбдор
АҚШ президенти Жо Байден Алексей Навальний Россия қамоғида ўлганидан дарғазаб бўлганини айтаркан, айни чоғда бу хабар уни ажаблантирмаганини урғулади. Байденга кўра, агар хабарлар тасдиқланса, бу ўлим учун жавобгарлик Россия президенти Владимир Путин зиммасида бўлади.
Байден россиялик мухолифат етакчисининг қамоқда вафот этганига доир хабарлар муносабати билан расмий баёнот берди.
“Биласизми, мен, бутун дунё бўйлаб миллионлаб одамлар каби, Алексей Навалнийнинг ўлими ҳақидаги хабардан ғазаблансамда, ажабланмадим. У коррупция, зўравонлик ва Путин ҳукумати қилган барча ёмон ишларга жасорат билан қарши чиқди. Бунга жавобан Путин уни заҳарлади, ҳибсга олишни буюрди. Уни сохта жиноятлар учун жавобгарликка тортди. Қамоқхонага ташлади. Ҳатто қамоқхонада ҳам у ҳақиқатнинг кучли овози эди. У 2020 йилги суиқасддан кейин қувғинда тинчгина яшаши мумкин эди. Бунинг ўрнига у Россияга қайтди. У ишини давом эттирса, қамоққа тушиши ёки ҳатто ўлдирилиши мумкинлигини билиб, Россияга қайтди. Лекин барибир ўз йўлидан қайтмади, чунки у ўз мамлакатига, Россияга жуда қаттиқ ишонган. . . . Лекин хато қилманг. Адашманг. Навалнийнинг ўлимида Путин айбдор. Унинг ўлими учун Путин жавобгар”, деди президент Байден Оқ уйда қилган махсус баёнотида.
Блинкен: Навальний ўлими учун Россия жавобгар
Навальнийга қарши маҳкама сиёсий мотивларга эга иш ҳисобланади. Сиёсатчининг адвокатлари унга нисбатан айбловни бир неча бор абсурд деб атаган. Халқаро ташкилотлар уни сиёсий маҳкум деб тан олади. Навальний қамоқхонада туриб видеоалоқа орқали судларда қатнашаркан, россияликларни Украинадаги урушга қарши чиқишга даъват этарди.
Кремл Навальний ва жамоасининг суриштирувларини кўриб кўрмасликка олди. Владимир Путин йиллардир Россия мухолифати етакчисининг исмини тилга олмади, балки “у одам” ёки “у фуқаро” деб атаб келди.
“Россиядан Алексей Навальнийнинг ўлими ҳақидаги хабарлар келди. Ўн йилдан ортиқ вақт давомида Россия ҳукумати, Путин Алексей Навальнийни таъқиб қилди, заҳарлади ва қамоққа ташлади. Бу хабарлар агар рост бўлса, биринчи навбатда, унинг рафиқаси ва оиласига ҳамдардлик билдирамиз. Унинг қамоқхонада ўлиши, бир одамнинг қўрқуви, у қурган тизимнинг ожизлиги ва чиркинлигини кўрсатади. Унинг ўлими учун Россия жавобгар. Агар бу хабарлар чин бўлса, Алексей Навальний ўлдирилишини ҳали бошқа мамлакатлар билан муҳокама қиламиз", деди АҚШ давлат котиби Энтони Блинкен.
Оқ уйнинг миллий хавфсизлик бўйича маслаҳатчиси Жейк Салливан Навальнийнинг ўлими тафсилотлари тасдиқланганидан сўнг, Вашингтон кейинги қадамларни муҳокама қилишини маьлум қилди.
Столтенберг: Навальний эркинлик овози эди
Ғарб раҳбарлари Алексей Навальний ўлими хакидаги хабардан ларзага келганликларини айтиб, мухолифатчининг ўлими учун Кремл жавобгар эканини таькидлашмокда.
“Алексей Навальний вафот этгани ҳақидаги хабарлардан чуқур қайғу ва хавотирдаман. Барча тафсилотлар аниқланиши керак, Россия жавоб бериши керак бўлган жиддий саволлар бор. Алексей Навальний эркинлик, демократиянинг кучли овози бўлди. НАТО ва унинг иттифоқчилари Навальнийни зудлик билан озод қилишга чақириб келди. Ҳозирги айтадиганларим, унинг оиласи ва яқинларига қаратилган. Биз Алексей Навальний сингари демократия ва эркинликка ишонадиган ҳар бир инсонни қўллаб-қувватлашда содиқмиз", деди НАТО Бош котиби Йенс Столтенберг.
47 ёшли Навальний ўн йилдан бери президент Владимир Путин ва рус элитасини коррупция, очкўзлик ва ноқонуний бойлик орттиришда айблаб келаётган эди.
Алексей Навальний сўнгги уч йил қамоқда эканига қарамай, Россиядаги бош мухолиф сиёсатчи бўлиб қолаётган эди. У Россия ҳукумати учун ноқулай мавзуларда гапиришда давом этди.