Францияда актёр Ален Делон 88 ёшида вафот этди. Бу ҳақда AFPга таянган ҳолда Le Monde нашри хабар бермоқда. Агентлик Делоннинг уч фарзанди баёнотини эълон қилган. Баёнотда улар оталарининг ўлими сабабини очиқламаганлар.
“Ален-Фабъен, Анушка, Энтони, шунингдек [унинг кучуги] Лубо ўз оталарининг ўлими ҳақидаги хабардан чексиз қайғуга чўмдилар. У Душидаги ўз уйида, уч фарзанди ва оиласи қуршовида тинчгина жон берди. […] Делонлар оиласи ушбу аламли мотам онларида уларнинг хусусий ҳаётини ҳурмат қилишни сўрайди”, дейилади пресс-релизда.
Делон сўнгги пайтларда жиддий хаста бўлиб, якка-ёлғиз яшар ва оиласи билан алоқалари узилганидан изтироб чекарди. Унинг бошқа-бошқа никоҳдан туғилган болалари бир-бирларини оталарининг соғлиғига доир бўҳтон ва ғийбат гапларни тарқатишда айблашар эди.
Актёр 2019 йилда инсулт бўлган, қолаверса у саратон ва Алцҳеймер хасталикларига ҳам чалинган эди.
Ален Делон 1935 йилда Париж яқинида туғилган. Ота-онаси ажрашганидан сўнг ўгай ота қўлида вояга етган.
Бўлажак актёр мактабда ёлчитиб ўқимаган, кейинчалик армияга хизматга кирган. У Ҳиндихитой урушида десантчи сифатида иштирок этиб, кўп вақтини гауптвахтада (ҳарбий қамоқда) ўтказган ва кейинроқ жип ўғирлагани учун трибуналга тортилган.
Францияга қайтганидан сўнг Делон официант бўлиб ишлаган ва майда жиноятчиларга қўшилган.
Делон кинога 50-йилларнинг иккинчи ярмида тасодифан кириб келади. Унга яқинда вафот этган Жеймс Дин ўрнини эгаллашга уриниб кўриш учун Ҳолливудга боришни тавсия қиладилар, аммо режиссёр Ив Аллегре уни Францияда қолишга кўндиради.
Делон 1957 йилда унинг “Аёл аралашганда” номли фильмида илк ролини ўйнайди.
Шу билан Делоннинг ишлари юришиб кетади, 1962 йилда у Микеланжело Антониони ва Лукино Висконти каби машҳур режиссёрларнинг фильмларида суратга тушади, яна 3 йилдан кейин эса Ҳолливудда дебют қилади. Расмий актёрлик маълумоти бўлмаса-да, у мураккаб драматик ролларни маҳорат билан ижро этарди.
Делон театрда ҳам ўйнаган, аммо санъатнинг бу турида омад унга кулиб боқмаган. 1961 йилда у қатнашган “Висконти” спектакли муваффақиятсиз чиққач 1968 йилдагина саҳнага қайтган, шундан сўнг яна 28 йил театрда ўйнамаган.
Ален Делон ҳаёти давомида учта фильм суратга олган, 30 дан зиёд фильмга продюсерлик қилган ва яна 10 та фильм сценарийсини ёзган.
Делоннинг тўнғич ўғли Энтони 1964 йилда туғилган, унинг онаси актриса Натали Бартелеми.
Актёрнинг модел Розали ван Бремен билан ишқий муносабатларидан эса 1990 ва 1994 йилларда Анушка ва Ален-Фабъен дунёга келган.
Делон хонанда Никодан кўрган фарзандини тан олмаган, уни актёрнинг ўгай бобоси ва бувиси тарбия қилганлар ва ўз фамилияларини берганлар.
