Joriy yilning 26-fevral kuni fuqarolik ishlari bo‘yicha Shayxontohur tumani sudida taniqli jurnalist Anora Sodiqovaning “Mufasa” taxallusi bilan sahifa yuritadigan bloger Mirsaid Haydarovga qarshi kiritgan da’vo arizasi ko‘rib chiqila boshladi.
Kun.uz nashrining yozishicha, soat 10:30 ga belgilangan sud kechikib boshlangan. Qolaversa, jarayonni yoritish uchun kelgan jurnalistlar sud boshlanguniga qadar ichkariga qo‘yilmay turli bahonalar bilan yo‘lakda ushlab turilgan.
Sudning ochiq yoki yopiq ekaniga aniqlik kiritilmay boshlangan jarayon taxminan 40 daqiqalarda yakuniga yetarkan, javobgar Mirsaid Haydarov va uning advokati sud yopiq o‘tishini talab qilgan. Bundan tashqari, da’vogar Anora Sodiqovaning advokatlari soni yetarli bo‘lgani vajidan sud zalidan inson huquqlari faoli Abdurahmon Tashanovni chiqarib yuborish bo‘yicha alohida taqdimnoma kiritilgan.
Da’vogarning advokatlari sudya noxolis ekanini bildirib, NNTdan vakil sifatida huquq faoli Abdurahmon.Tashanovning sudda qatnashishini ta’minlashni so‘rab, raddiya kiritishgan.
Anora Sodiqova o‘z shikoyatida bloger Mirsaid Haydarov turli aniq va anonim kanallarda u haqida kamsituvchi, sha’nini bulg‘aydigan va tuhmat gaplar yozganini bildirgan.
“Adolat istab sudga keldim, hech bo‘lmasa konstitutsiya ishlashidan umidvorman. Jurnalist va ayol sifatida sha’nimga aytilgan bu gaplarni qabul qilolmayman”, degan u.
Sud yopiq o‘tishi haqidagi qaror ijtimoiy tarmoqlarda sud muhokamasi oshkoraligi va axborot olish huquqini cheklash deya talqin etilgan.
Sudyalar oliy kengashi matbuot xizmati bunga raddiya bergan.
“Fuqarolik kodeksining 12-moddasiga ko‘ra, barcha sudlarda ishlar muhokamasi oshkora o‘tkazilishi belgilangan. Biroq ishda ishtirok etuvchi shaxslarning shaxsiy hayoti to‘g‘risidagi ma’lumotlar oshkor bo‘lishining oldini olish, yozishmalar sirini va qonun bilan qo‘riqlanadigan boshqa sirni saqlash maqsadida yopiq sud muhokamasi o‘tkazilishiga ham yo‘l qo‘yiladi”, deyilgan Kengash bayonotida.
Ozodlik avval xabar qilganidek, Anora Sodiqova boshchiligidagi Uzdiplomat.uz jamoasi joriy yil 8-fevral kuni Toshkent shahrida tashkil etgan “Yil tanlovi-2024” marosimi to‘sqinlikka uchragan.
Ushbu hodisa ortidan ijtimoiy tarmoqlarda O‘zbekistonda mustaqil matbuotning istiqboli xususida xavotirli fikrlar yangragan.