O‘zbekistonda qamoqqa olish ehtiyot chorasi qo‘llanmagan gumonlanuvchi, ayblanuvchi yoki sudlanuvchining O‘zbekistondan chiqish huquqini vaqtincha cheklab qo‘yish tartibi belgilanmoqda. 12-mart kuni Oliy Majlis Qonunchilik palatasi majlisida birinchi o‘qishda qabul qilingan qonun loyihasida ana shu talab ilgari surilgan.
Parlament quyi palatasi matbuot xizmati qaydicha, mazkur qonun loyihasi jabrlanuvchining konstitutsiyaviy huquq va erkinliklarini himoya qilishga, uning qonuniy huquq va manfaatlariga ziyon yetkazilishining oldini olishga xizmat qiladi.
“Jinoyat sodir etgan shaxslarga nisbatan qamoqqa olish ehtiyot chorasi qo‘llanmagan hollarda, ushbu shaxslar O‘zbekiston Respublikasi davlat chegarasini tark etib surishtiruv, tergov yoxud suddan yashirinish holatlari kuzatilmoqda. Natijada jinoyatdan jabrlangan shaxslarning huquqlarini tiklash, ularga yetkazilgan zararlarni qoplash imkoniyati pasaymoqda”, deyilgan Qonunchilik palatasi xabarnomasida.
Bosh prokuror o‘rinbosari Sherzod To‘xtaboyevga ko‘ra, 2020-2024-yillarda jinoyat sodir etib, yashiringan 23 ming 863 nafar shaxsga nisbatan qidiruv e’lon qilingan bo‘lsa, ularning 21 ming 238 nafari (89 foizi) O‘zbekiston hududidan chet elga chiqib ketgan.
Ayblanuvchi va gumonlanuvchilarning chiqish huquqini cheklash vakolati surishtiruvchi, tergovchi, prokuror yoki sud organlariga berilishi ko‘zda tutilgan.