O‘zbekistonda haydovchilarga hisoblanadigan jarima ballari faqatgina YPX inspektorlari tuzgan bayonnomalar asosida shakllanadi. Bu masalaga Ichki ishlar vazirligi YHXX boshlig‘i o‘rinbosari Erali Bozorov 25-fevral kuni Toshkentda o‘tkazilgan matbuot anjumanida to‘xtaldi.
“Xalqimizning kelib tushgan takliflari va ijtimoiy holatni inobatga olgan holda faqat yo‘l patrul xizmati inspektori tomonidan rasmiylashtirilgan ma’muriy bayonnoma asosida ballik tizimga o‘tiladi. Qoidabuzarliklarni bazada hisoblash IIV YHXX tomonidan elektron tarzda amalga oshiradi. Bu yerda inson omili bo‘lmaydi”, deya iqtibos keltirdi IIV mulozimidan Kun.uz nashri.
Kelgusida kamera va radarlarga tushganda yoziladigan jarimalarni ham 12 balli tizimga qo‘shib hisoblash rejalashtirilgan.
Ma’lumot o‘rnida: 20-fevral kuni O‘zbekiston Respublikasi Ma’muriy javobgarlik to‘g‘risidagi kodeksiga yo‘l harakati xavfsizligi tizimiga doir o‘zgartirishlar kiritildi. Unga ko‘ra, mamlakatda yo‘l harakati qoidabuzarliklari bo‘yicha 12 balli jarima tizimi joriy etiladi.
Jarima ballari belgilangan huquqbuzarliklardan biri ilk marta sodir etilgan kundan e’tiboran bir yil davomida hisoblab boriladi. Jarima ballarining har biri bir yildan so‘ng avtomatlashtirilgan tarzda yechib boriladi.
Jarima ballari 12 dan oshgan haydovchilar kamida 6 oy muddatga transport vositasini boshqarish huquqidan mahrum qilinadi.
Qoraytirilgan oynali transport vositalaridan foydalanish, transport vositalari haydovchilarining belgilangan harakat tezligini oshirib yuborishi, haydovchilarning svetofor taqiqlovchi signaliga bo‘ysunmasligi kabi o‘ndan ziyod qoidabuzarliklar uchun jarima ballari hisoblanadi.
Ozodlik avval xabar qilganidek, 20-fevral kuni imzolangan qonunga muvofiq mamlakatda yo‘l bezoriligi uchun ham javobgarlik joriy etildi.