Isroil armiyasi (SAXAL) “Hizbulloh” ijroiya kengashi rahbari Hoshim Safiyuddin o‘lganini tasdiqladi – Safiyuddin yaqinda o‘ldirilgan Hasan Nasrulloh o‘rniga tashkilot yetakchisi bo‘lishi kutilayotgan edi.
Isroil harbiylariga ko‘ra, Hoshim Safiyuddin hamda guruhning razvedka shtabi boshlig‘i Husayn Ali az-Zayma 4-oktyabr kuni Bayrutga aviazarbalar berilgan paytda halok bo‘lgan. Saudiya Arabistoniga qarashli “Al-Hadaf” kanali Safiyuddin va yana 23 kishining jasadi 22-oktyabr kuni Livan poytaxti chekkasidan topilgani haqida xabar qilgan edi.
Sakkizinchi oktyabr kuni Isroil bosh vaziri Binyamin Netanyahu Livan fuqarolariga murojaatida Isroil harbiylari “Hizbulloh” rahnamosi Hasan Nasrullohning ikki muhtamal vorisini o‘ldirishganini aytgan.
“Biz Nasrulloh, uning vorisi va vorisining vorisiga qo‘shib minglab terrorchini yo‘q qildik. Bugun “Hizbulloh” o‘tgan ko‘p yillardagidan ko‘ra zaifroqdir”, degan Netanyahu o‘shanda “voris” so‘ziga aniqlik kiritmagan edi.
“Hizbulloh” lideri Hasan Nasrulloh 27-sentyabr oqshomida guruhning Bayrutdagi yerosti markaziy shtabiga zarba berilgan paytda vafot etgan. Livan Sog‘liqni saqlash vazirligi ma’lumotiga ko‘ra, Isroil va HAMAS o‘rtasida urush boshlangan o‘tgan yilning oktyabridan buyon Livanda kamida 2036 kishi o‘ldirilgan va 9535 kishi yaralangan.