Линклар

Шошилинч хабар
15 феврал 2025, Тошкент вақти: 23:05

Ўзбекистон хабарлари

ЖБ: Тошкентда ҳаво ифлосланиши cабаб йилига 3000 киши вафот этяпти

Архив сурати
Архив сурати

Тошкентда PM2,5 майда заррали чанглар таъсири оқибатида йилига ўртача 3042 киши бевақт вафот этмоқда. Ўлим ҳолатларининг аксари инсульт (33 фоиз), юрак ишемик касаллиги (28 фоиз) ва пастки нафас йўллари инфекциялари (23 фоиз) билан боғлиқ.

Бу ҳақда Жаҳон банки томонидан ҳозирланган “Тошкент шаҳрида ҳаво сифатини баҳолаш ва Ўзбекистонда ҳаво сифати бошқарувини такомиллаштириш бўйича “йўл харитаси” номли ҳисоботда қайд этилган.

Тадқиқотда асосий эътибор Жаҳон соғлиқни сақлаш ташкилоти (ЖССТ) томонидан инсон саломатлиги учун энг катта хавф деб баҳоланган PM2,5 заррачаларига қаратилган.

Қайд этилишича, Тошкентда PM2,5 заррачаларининг концентрацияси ЖССТ тавсия этган даражадан 6 баравар юқори бўлиб, бу ҳам аҳоли саломатлигига, ҳам пойтахт иқтисодиётига жиддий зарар етказмоқда.

Ўзбекистон пойтахтида атмосфера ҳавосининг PM2,5 ифлосланиши билан боғлиқ ўртача йиллик иқтисодий харажатлар 488,4 миллион доллар деб баҳоланган. Бу мамлакат ялпи ички маҳсулотининг 0,7 фоизи демакдир.

Экспертлар PM2,5 заррачалари билан антропоген ифлосланишнинг асосий манбалари сифатида шамол олиб келган чанг (36 фоиз), иситиш сектори (29 фоиз), транспорт (16 фоиз), енгил саноат (7 фоиз), оғир саноат (6 фоиз), шаҳар чанги (6 фоиз) ва чиқиндиларни ёқиш (1 фоиз) кабиларни кўрсатишган.

Ҳисоботга кўра, Тошкент аҳолисининг 83 фоизи ҳавоси юқори даражада ифлосланган ҳудудларда истиқомат қилади.

Ҳужжатда ҳаво сифатини бошқариш механизмини миллий даражада такомиллаштириш бўйича тавсиялар берилган.

Маълумот ўрнида, Тошкент жорий йилнинг 21 февраль куни ҳавонинг ифлосланиш даражаси бўйича дунёнинг йирик шаҳарлари орасида 1-ўринга чиққан.

IQAir порталига кўра, ўша куни пойтахт ҳавосида PM2,5 дисперс зарраларининг концентрацияси 171 мкг/м3 ни ташкил этган. Бу ЖССТ тавсия этган ўртача ҳаво сифати кўрсаткичидан 34,2 баробарга кўп.

Кун янгиликлари

Фарғонада уч болали онани ўлдирган шахс 17 йилга қамалди

Иллюстратив сурат
Иллюстратив сурат

Фарғонада уч фарзанднинг онаси бўлган аёлни ўлдирган 25 ёшли йигит суд ҳукми билан 17 йилга қамалди. Бу ҳақда Миллий ТВнинг “Миллар” дастурида берилган лавҳада сўз боради.

Жиноят ишлари материалларида айтилишича, судланувчи онлайн ўйинлар туфайли қарзга ботган ва яқинларидан олган пулларни вақтида қайтара олмаган. Шундан сўнг у ўзига яқин бўлган ҳудуддаги хонадонга ўғриликка тушган.

Хонадон бекаси бўлган аёл уйғониб кетиб, ўғрига қаршилик қилмоқчи бўлган, у эса аёлни “ўткир тиғли жисм билан” вояга етмаган фарзандлари кўз ўнгида ўлдирган.

Жиноят ишлари бўйича Фарғона шаҳар суди судланувчини Ўзбекистон Жиноят кодексининг 97-моддаси 2-қисми (Қасддан одам ўлдириш) ва 164-моддаси 3-қисми “в” банди (Босқинчилик) бўйича айбдор деб топиб, уни 17 йилга озодликдан маҳрум этиш ҳақида ҳукм чиқарган.

АҚШда 65 ёшли ўзбекистонлик эркак жинсий жиноятда айбланмоқда

Иллюстратив сурат
Иллюстратив сурат

АҚШнинг Мэриленд штатида 4 февраль куни муқаддам жинсий жиноят учун судланган ўзбекистонлик эркак ҳибсга олинган. Бу ҳақда АҚШ Иммиграция ва божхона хизмати (ICE) маълумот тарқатди.

Айни пайтда 65 ёшли Ислом Ғозиев иши ҳуқуқ-тартибот идоралари томонидан кўриб чиқилмоқда.

Маълумотларга кўра, ўзбекистонлик И. Ғозиев 2015 йил октябрида АҚШга қонуний йўллар билан кириб борган. Кейинроқ у мамлакат миграция тартибини бузган.

Бу Ғозиев томонидан АҚШ ҳудудида содир этилган илк жиноят эмас. 2024 йил августида у тўртинчи даражали жиноятда (жинсий жиноят) гумонланиб қўлга олинган эди. Ўша йил декабрида у айбдор деб топилиб, шартли равишда уч йилга озодликдан маҳрум қилинган эди.

Февраль ойи бошида у яна шу каби жиноятда айбланиб, қўлга олинган.

ICEнинг Балтимордаги дала офиси директори в.б. Мэтью Эллистон “бу каби ҳибсга олишларнинг ҳар бири кўчаларимизда битта йиртқич ва бир муҳтамал қурбон камайганини англатади”, деб айтган.

ЕИ–Марказий Осиё илк саммити апрель ойи бошида Самарқандда бўлиб ўтади

Иллюстратив сурат
Иллюстратив сурат

Европа Кенгаши президенти Антониу Кошта ва Европа Комиссияси президенти Урсула фон дер Ляйен Европа Иттифоқи билан Марказий Осиёнинг илк саммитида иштирок этиш учун 3–4 апрель кунлари Ўзбекистонда бўлишади. Бу ҳақда ЕИнинг Ўзбекистондаги делегацияси матбуот хизмати маълумот тарқатди.

Ўзбекистон президенти Шавкат Мирзиёев мезбонлик қиладиган мазкур саммитда Қозоғистон, Қирғизистон, Тожикистон ва Туркманистон етакчилари қатнашиши кутилмоқда. Аввалдан 2024 йилда ўтказилиши режаланган бу анжуман ЕИдаги сайловлар туфайли 2025 йилга кўчирилган эди.

Хабарномада саммит Европа Иттифоқи учун Марказий Осиё билан икки томонлама ҳамкорликни чуқурлаштириш ва минтақавий ҳамкорликни кенгайтириш борасидаги геосиёсий манфаатларини намойиш этиш учун муҳим имконият экани урғуланган.

“Геосиёсий вазият ўзгариб бораётган ҳозирги шароитда, хусусан, Россиянинг Украинага қарши ноқонуний уруши ва Афғонистондаги воқеалар содир бўлаётган бир пайтда, Европа Иттифоқи ва Марказий Осиё ўртасидаги муносабатлар йилдан йилга стратегик жиҳатдан янада муҳим аҳамият касб этмоқда”, дейилган хабарномада.

Европа Кенгаши президенти Антониу Кошта айни пайтда дунёда “тартибсизлик ва бўлиниш кучайган”ига эътибор қаратган.

“Европа Иттифоқи учун ягона тўғри йўл – мустаҳкам ҳамкорликлар ўрнатиш орқали тинчлик ва фаровонликни таъминлашдир. Кўп қутбли дунё шароитида янада фаол ва йўналтирилган ҳамкорлик зарур. Биринчи Европа Иттифоқи – Марказий Осиё саммити халқаро ҳуқуққа тўлиқ ҳурмат қилган ҳолда, тинчлик, хавфсизлик ва барқарор ривожланиш йўлида ҳамкорликни мустаҳкамлашга бўлган қатъий ниятимизни тасдиқлайди”, деган Кошта.

Кейинги йилларда ЕИ ва МО юқори лавозимли раҳбарлари ўртасида ўзаро алоқалар фаоллашганига гувоҳ бўлиш мумкин. 2022 йилнинг октябрь ойида Қозоғистонда ва 2023 йилнинг июнь ойида эса Қирғизистонда етакчилар учрашуви бўлиб ўтган. Бундан ташқари, бир қатор вазирлик даражасидаги муҳокамалар ҳам ўтказилган. Бундай учрашувларнинг сўнггиси 2023 йили Люксембургда ўтказилган бўлиб, унда ЕИ ва МО ўртасидаги алоқаларни чуқурлаштириш бўйича қўшма йўл харитаси қабул қилинган.

Президентлар саммити олдидан жорий йилнинг 4 мартида Ашхободда ЕИ ва МОнинг 20-вазирлар учрашуви бўлиб ўтиши, унда Ўзбекистондаги саммитга тайёргарлик масаласи муҳокама қилиниши кутиляпти.

Озодлик аввалроқ Ўзбекистон президенти Шавкат Мирзиёев 23 январь куни Европа Кенгаши президенти Антониу Кошта билан телефон орқали мулоқотда бўлгани ҳақида хабар қилган. Мулоқот чоғида, жумладан апрель ойида Самарқанд шаҳрида ўтказилиши кутилаётган “Марказий Осиё – Европа Иттифоқи” биринчи саммитига тайёргарлик кўриш ва уни ўтказиш бўйича қўшма режалар ҳам муҳокама қилинган эди.

Тошкентда ноқонуний диний жамоат тузишда гумонланган 17 киши ушланди

Иллюстратив сурат
Иллюстратив сурат

Ўзбекистон пойтахтида ноқонуний жамоат кўринишида йиғинлар ташкил этганликда гумонланган кишилар қўлга олинган. Бу ҳақда Ўзбекистон Давлат хавфсизлик хизмати маълумот тарқатди.

Хабарномада қайд этилишича, қўлга олинган 17 кишилик гуруҳ ичида божхона идораларининг уч нафар ходими, Тошкент давлат шарқшунослик университети талабаси, технопарк директори ўринбосари, хусусий автомактаб директори ўринбосари, “Сергели-авто” бозорида савдо билан шуғулланувчи шахслар ва бошқалар бор.

ДХХ иддаосича, қўлга олинганлар ичида бўлган Божхона қўмитасининг бошқарма бошлиғи ўринбосари “динга мутаассибларча берилиб, 2021 йилдан бошлаб мазкур норасмий диний дарсларни мунтазам равишда ташкил этиб келган”.

У ҳар бир дарс учун жамоат аъзоларидан маълум миқдорда пул йиғиб, устозларга берган”, дейилган хабарномада.

Гуруҳ аъзоларининг 1989 йилда Наманган вилоятида туғилган ва ҳозирда Миср Араб Республикасида бўлган шахсдан Телеграм мессенжери орқали онлайн тарзда сабоқ олишгани, уларга Тошкент давлат шарқшунослик университети талабаси ҳам оффлайн тарзда диний маърузалар ўтгани айтилган.

Ҳозирда Божхона қўмитаси бошқарма бошлиғи ўринбосари, божхона органлари тезкор ходими ва катта инспектори, шунингдек, Тошкент давлат шарқшунослик университети талабаси ҳамда жамоат аъзоларига Миср давлатидан туриб, онлайн тарзда диний сабоқ берган фуқарога нисбатан Жиноят Кодексининг 216-моддаси (Жамоат бирлашмалари ёки диний ташкилотларни қонунга хилоф равишда тузиш) билан жиноят иши қўзғатилиб, тергов ҳаракатлари олиб борилмоқда”, дейилган хабарномада қолган фуқаролар жиноят иши доирасида гумонланувчи сифатида терговга жалб қилингани қўшимча қилинган.

Аввалроқ Озодлик парламент қуйи палатасида “Ўзбекистон Республикасида фуқароларнинг виждон эркинлигини таъминлаш ва диний соҳадаги давлат сиёсати концепциясини тасдиқлаш тўғрисида”ги қонун лойиҳаси қабул қилиниб, тасдиқ учун Сенатга юборилгани ҳақида хабар қилганди. Диний соҳадаги концепция қабул қилинаётган бир пайтда фуқароларнинг ноқонуний жамоат тузганлик айблови билан қўлга олиниши жамоатчилик орасида қатор фаразлар урчишига йўл очди.

Ҳьюман Райтс Уотч халқаро ташкилотининг дунёда инсон ҳуқуқларининг аҳволига доир ўтган ойда ёйинлаган галдаги йиллик ҳисоботида Ўзбекистонда расмийлар диний жамоаларни рўйхатдан ўтказишга тўсқинлик қилиш, собиқ диний маҳбусларни ўзбошимчалик билан назорат қилиш ва мусулмонларни экстремизм билан боғлиқ кенг ва ноаниқ айбловлар билан жиноий жавобгарликка тортиш орқали дин эркинлигини чеклаётгани танқид қилинган эди.

Ўзбекистон қишки Осиё ўйинларида иккинчи бор олтин олди

Хитойда ўтаётган қишки Осиё ўйинларидан лавҳа (иллюстратив сурат)
Хитойда ўтаётган қишки Осиё ўйинларидан лавҳа (иллюстратив сурат)

Ўзбекистон делегацияси Хитойнинг Харбин шаҳрида ўтаётган қишки Осиё ўйинларида олтин медални қўлга киритди.

Миллий олимпия қўмитаси матбуот хизмати қайдича, фигурали учиш бўйича терма жамоа аъзолари Дмитрий Чигирев ва Екатерина Гейниш жуфтлиги 176,43 балл жамғариб, энг яхши натижани қайд этган ва олтин медалга сазовор бўлган.

Жуфтлик КХДР ва Япония вакилларини ортда қолдирган.

Россиялик спортчилар Дмитрий Чигирев ва Екатерина Гейниш 2024 йилдан буён халқаро мусобақаларда Ўзбекистон номидан қатнашиб келади.

Ўзбекистон терма жамоаси қишки Осиё ўйинларида 26 йиллик танаффусдан сўнг иккинчи бор олтин медалга эга чиқмоқда. Ҳозирга қадар Ўзбекистон ҳисобида ягона бўлган олтин медаль 1999 йили Жанубий Кореяда бўлиб ўтган мусобақаларда Татьяна Малинина томонидан фигурали учиш мусобақаларида олинганди.

7-14 февраль кунлари Харбин шаҳрида ўтаётган IХ қишки Осиё ўйинларида Ўзбекистон термаси 6 спорт турида 24 нафар атлет билан иштирок этмоқда. Бу ҳам спорт тури, ҳам атлетлар сони бўйича Ўзбекистон делегацияси энг катта таркибда қатнашаётган қишки Осиё ўйинлари экани айтилмоқда.

Самарқандда автобус ағдарилиши оқибатида бир киши вафот этди

Самарқанд вилояти Жомбой туманида ичида йўловчилари бўлган автобус йўл-транспорт ҳодисасига учради.

Gazeta.uz нашрининг вилоят ЙҲХБ матбуот хизмати маълумотига таянган ҳолда хабар қилишича, ҳодиса 11 февраль куни соат 7:00 ларда М-39 автомобиль йўлининг 1079-километрида содир бўлган.

Йўловчи ташувчи Zhongtong автобуси ҳаракатланиб келаётиб кўприк устида ЙТҲга учраган Cobalt билан тўқнашган.

Автобус енгил машинанинг ҳолатини инобатга олмай тезликни меъёридан ошириб келгани оқибатида тормозни кескин босгани ва ағдарилиб кетгани айтилмоқда.

Оқибатда бир йўловчи (68 ёшли эркак) тиббиёт бирлашмасида вафот этган.

Ҳолат юзасидан жиноят иши қўзғатилгани хабар қилингани ҳолда, жабрланганлар бўйича маълумот берилмаган.

ЙТҲга учраган туристик автобус Самарқанддан Тошкентга бораётган бўлган.

Озодлик аввал хабар қилганидек, 2024 йил ноябрь ойида Самарқанд шаҳрида автобус уриб кетиши оқибатида 3-синф ўқувчиси нобуд бўлганди.

Аввалроқ айнан Жомбой туманида Isuzi автобуси билан МАN юк автомашинаси тўқнашиши оқибатида автобус йўловчиларидан бири ҳалок бўлган эди.

Маҳалла раислари ваколат муддати беш йилга узайтирилди

Иллюстратив сурат
Иллюстратив сурат

Ўзбекистонда фуқароларнинг ўзини ўзи бошқариш органлари раислари ваколат муддати уч йилдан беш йилга узайтирилди.

Мамлакат президенти томонидан 11 февраль куни имзоланган ва 12 февраль куни кучга кирган қонун билан ана шу муддат белгиланмоқда.

“Фуқароларнинг ўзини ўзи бошқариш органлари тўғрисида”ги ва “Фуқаролар йиғини раиси сайлови тўғрисида”ги қонунларга киритилган ўзгартиришга мувофиқ, фуқаролар йиғинлари раислари сайловини ташкил этиш ва ўтказишга кўмаклашувчи Қорақалпоғистон Республикаси, вилоятлар ва Тошкент шаҳар комиссияларининг ваколатлари ҳам аниқлаштирилган.

Қайд этилишича, қонун амалга киритилгунга қадар сайланган фуқаролар йиғинлари раислари ўз ваколатини 3 йиллик муддат тугагунга қадар амалга оширади.

Миллий қонунчиликда раисликка номзодларга нисбатан Ўзбекистон Республикаси фуқароси бўлиш, олий маълумотлилик, бевосита сайловга қадар камида беш йил тегишли ҳудудда доимий яшаш, ташкилотчилик қобилияти, давлат органлари ёки нодавлат нотижорат ташкилотлари ёхуд тадбиркорлик ва бошқа хўжалик фаолияти соҳасида иш тажрибаси, ҳаётий тажриба ва аҳоли ўртасида обрў-эътиборга эга бўлиш каби талаблар қўйилган.

Озодлик аввалроқ маҳалла раислари сайловига ҳокимиятнинг аралашуви ҳолатларини таҳлил қилган эди.

Санэпидқўмита Умра зиёратчиларига менингитга қарши эмланиш лозимлигини эслатди

Иллюстратив сурат
Иллюстратив сурат

Ижтимоий тармоқларда тарқалган “Ҳаж ва Умра зиёратига борувчилар менингитга қарши вакцина олишига доир талаб бекор қилинди” деган мазмундаги хабар ҳақиқатдан йироқ, дея маълум қилди Ўзбекистон Санитария-эпидемиологик осойишталик ва жамоат саломатлиги қўмитаси.

Саудия Арабистони cоғлиқни сақлаш вазирлиги 2025 йил февраль ойидан эътиборан Умра ва Ҳаж амалларини бажариш учун подшоҳликка келадиган зиёратчилардан менингитга қарши эмланганлик ҳужжати талаб этилишини билдирганди.

Виза туридан қатъи назар, Саудия Арабистони ҳудудига келаётган барча хорижликлар эмлаш сертификатига эга бўлиши лозим. Бир ёшгача бўлган болалар бундан мустасно.

Сўнгги ҳафталарда ижтимоий тармоқларнинг ўзбек сегментида Саудия томони менингитга қарши эмланиш талабини бекор қилгани ҳақида хабар тарқалганди.

Мамлакатимизга юқумли касалликларни четдан кириб келишининг олдини олиш ва эпидемиологик барқарорликни сақлаб қолиш мақсадида зиёратчиларни менингитга қарши эмлаш тавсия этилади”, дейилган Санэпидқўмита хабарномасида.

Менингококк инфекцияси – ўткир юқумли касаллик бўлиб, уни бактериялар келтириб чиқаради. Бу касалликнинг назофарингит (бурун ва халқум шиллиқ пардаларининг шамоллаши), менингит (мия қобиқларининг шамоллаши), менингококк сепсиси (қоннинг заҳарланиши) каби кўринишлари мавжуд.

Озодлик аввал хабар қилганидек, Ўзбекистонда 2024 йил охирида Умра лицензияси талаблари кучайтирилди. Умра тадбирларини ноқонуний ташкил этишда айбланган туроператорлар аллақачон жавобгарликка тортилмоқда.

Гулруҳбегим Тоҳиржонова Ўзбекистон терма жамоасига қайтди

Иллюстратив сурат
Иллюстратив сурат

Сўнгги беш йил давомида АҚШ терма жамоасида дона суриб келган халқаро гроссмейстер Гулруҳбегим Тоҳиржонова Ўзбекистон терма жамоасига қайтди.

Ўзбекистон Шахмат федерацияси 2016 йилда аёл гроссмейстер, 2024 йилда халқаро спорт устаси унвонларига эришган спортчининг ушбу қарори мамлакат шахматини жаҳон миқёсида янада кучайтиришга хизмат қилишига умид билдирган.

Блогер Хушнудбек Худойбердиевнинг ёзишича, Гулруҳбегим Тохиржонова музокаралар натижасида яна Ўзбекистон байроғи остида ўйнашга рози бўлган ва мамлакатга қайтиб келган.

“Гап пулда ёки ваъдаларда эмас, мен доим Ватанимиз байроғи остида қатнашишни хоҳлаганман. Лекин орада шундай давр бўлдики, кетишга мажбур бўлдим. Агар мен Ўзбекистонда муҳит ўзгарганини, Шахмат федерациясида спортчиларга эътибор пайдо бўлганини ҳис қилмаганимда қайтмас эдим”, деган таниқли шахматчи.

АҚШ терма жамоасининг биринчи рақамли шахматчиси саналган Гулруҳбегим Тоҳиржонова 2023 йилда Қўшма Штатларда “Йилнинг энг яхши аёл шахматчиси” деб топилган.

Бир неча йил аввал Ўзбекистон тарихида аёллар ўртасида биринчи халқаро гроссмейстер мақомини олган Нафиса Мўминова ва унинг сингиллари – гроссмейстер Ҳулкар ва Гулруҳбегим Тоҳиржоновалар мамлакат терма жамоасидан четлатилган эди. Шахматчи қизларнинг отаси Алишер Мўминов АҚШ Гулруҳбегимнинг олти ойлик ўқиши учун 150 минг доллар маблағ ажратгани, малакали мураббийлар билан таъминлаб, мусобақаларга бориш харажатларини тўлиқ қоплаганини билдирганди.

Гулруҳбегим Тоҳиржонованинг ўзи 2022 йилдаги видеомурожаатида Шахмат федерацияси раҳбарининг биринчи ўринбосари, истеъфодаги ДХХ генерали Ҳусан Турдиалиев сабаб Ўзбекистон терма жамоасини тарк этганини айтган.

Ўзбекистон АЭС қуриш бўйича халқаро консорциум тузади

"Ўзатом" ва "Росатом" вакиллари кичик қувватли АЭС қурилажак майдонда, Жиззах вилояти, 2024 йил 26 июни ("Ўзатом" агентлиги фотоси)
"Ўзатом" ва "Росатом" вакиллари кичик қувватли АЭС қурилажак майдонда, Жиззах вилояти, 2024 йил 26 июни ("Ўзатом" агентлиги фотоси)

Ўзбекистонда кам қувватли атом электростанцияси (КҚАЭС) қуриш лойиҳаси бўйича халқаро консорциум тузилади. Бу ҳақда “Ўзатом” агентлиги директори Азим Аҳмадхўжаев маълум қилган.

2024 йил май ойида “Ўзатом”нинг АЭС қуриш дирекцияси ва “Росатом” тизимидаги инжиниринг ширкат ўртасида Ўзбекистонда КҚАЭС барпо этиш бўйича шартнома тузилган эди. 330 МВт қувватли (ҳар бири 55 МВт қувватга эга олтита ректор) КҚАЭС Жиззах вилоятида барпо этилиши, бу лойиҳада “Росатом” бош пудратчи бўлиши билдирилганди.

“Ўзатом” агентлиги директори “Ўзбекистон 24” телеканалига берган интервьюсидан Тошкент эндиликда ушбу лойиҳага бошқа давлатларни ҳам жалб этишни кўзлаётгани англашилади.

“Президентимиз ушбу лойиҳани халқаро хусусиятга эга бўлиши ва унинг амалга оширилишида турли халқаро тузилмаларни жалб қилиш кераклигини таъкидлади. Шунинг учун бу лойиҳада нафақат Россия технологиялари, балки Хитойнинг ноядро технологиялари, Европанинг турли дастурий таъминот ва аппарат воситаларини ҳам қўлламоқчимиз. Шу йўл билан биз энг замонавий технологиялар ёрдамида ушбу лойиҳани амалга ошириш учун халқаро консорциум ташкил қиламиз”, деган Аҳмадхўжаев.

Агентлик раҳбарига кўра, сув сарфини камайтириш мақсадида лойиҳада Венгрия ёки Хитойнинг қуруқ совутгичларини татбиқ этиш режалаштирилган.

“Ўзатом” раҳбари Халқаро атом энергияси агентлиги билан малакали кадрлар тайёрлаш ва атом энергетикаси лойиҳаларини амалга ошириш жараёнида хавфсизликни таъминлаш бўйича ҳамкорлик дастури ишлаб чиқилганини ҳам қайд этган.

Озодлик аввал хабар қилганидек, расмий Тошкент КҚАЭС қуриш учун хориж банкларидан маблағ жалб этиш режасини очиқлаганди.

Дунё узра Путиннинг ядровий таҳдиди муаллақ турган паллада Ўзбекистон Россия билан биргаликда КҚАЭС қуришга киришаётгани маҳаллий фаолларнинг эътирозига сабаб бўлган. Жамоатчилик бу лойиҳа Кремль қўлида Ўзбекистонга қарши “шантаж қуроли” бўлиб қолишидан хавотирда.

АҚШнинг Тошкентдаги элчиси Жонатан Хеник ҳам Ўзбекистон ҳукуматини илк атом электростанцияси қурилишида техник ҳамкорларни танлашда ўта эҳтиёткор бўлишга чақирганди.

Профилактика инспектори эри Россияда бўлган аёл билан “дон олишган”

Иллюстратив сурат
Иллюстратив сурат

Хоразм вилояти Шовот туманидаги Идалиқалъа маҳалласи профилактика инспектори ўзи хизмат олиб борадиган ҳудудда яшовчи бегона аёл билан “дон олишиб” юргани аниқланди.

Kun.uz нашрининг хабар қилишича, ИИБ ходими ушбу маҳаллада яшовчи, Россияга пул топгани кетган эркакнинг хотини билан унинг хонадонида учрашиб юрган. У жорий йил 31 январь куни ярим тунда навбатдаги “ташрифи” чоғида эрнинг яқин қариндошлари томонидан ушлаб олинган.

Чақирув бўйича воқеа жойига келган ИИБ масъуллари ҳолатга ойдинлик киритиш мақсадида профилактика инспектори ҳамда гувоҳларни ИИБ биносига олиб кетган.

Ички ишлар вазирлиги матбуот котиби Шохруҳ Ғиёсов ушбу ҳолат бўлганини тасдиқлаб, ҳозирда хизмат текшируви ўтказилаётгани, профилактика инспекторини ички ишлар органи ходими шаънига путур етказувчи ҳаракатлари учун ИИО сафидан бўшатиш масаласи кўриб чиқилаётганини билдирган.

Озодлик аввалроқ Тошкент вилояти Бўстонлиқ туманида профилактика нозири хотини, 7 ойлик фарзанди ва ўзини хизмат қуролидан отиб ўлдиргани ҳақида хабар қилганди. Ўшанда ҳодисага рашк сабаб бўлгани айтилганди.

Ўзбекистон коррупция индексида 121-ўринни эгаллади

Иллюстратив сурат
Иллюстратив сурат

Transparency International ташкилоти 2024 йилда жаҳон давлатларидаги коррупция даражаси бўйича ҳисобот (Corruption Perception Index) эълон қилди.

Ўзбекистон мазкур рейтингда Ангола, Эквадор, Кения, Шри-Ланка, Того каби давлатлар қаторида 32 балл тўплаб, 180 та давлат орасида 121-ўринни эгаллади.

Халқаро ташкилот 100 балли индекс бўйича (0 – коррупция даражаси ўта юқори, 100 – ўта паст) 180 та давлатдаги ҳолатни баҳолаган.

Постсовет давлатлардан Грузия (53 балл), Арманистон (47 балл), Қозоғистон (40 балл) энг яхши натижани, Қирғизистон (25), Россия (22), Озарбайжон (22), Тожикистон (19) ва Туркманистон (17) эса энг ёмон натижани қайд этган.

Transparency International йиллик ҳисобот бўйича шарҳда турли мамлакатларда демократик институтлар ва қонун устуворлигининг заифлашиши коррупциянинг гуллаб-яшнаши учун қулай муҳит яратаётганига эътибор қаратган.

Рейтингда Дания (90 балл) ва Финляндия (88 балл) етакчилик қилган бўлса, Венесуэла (10 балл), Сомали (9) ва Жанубий Судан (8) аутсайдерлар сафидан ўрин олган.

Ўзбекистон Transparency International’нинг ўтган йилги ҳисоботида ҳам 180 давлат орасида 121-ўринга қўйилганди.

Расмий Тошкент 2030 йилгача Transparency International томонидан эълон қилинадиган коррупция индексида камида 50 поғонага кўтарилиш режасини белгилаган. Бу “Ўзбекистон – 2030” стратегиясида 5 та йўналиш бўйича қўйилган юзта мақсаддан биридир.

Анора Содиқова шаънини ҳимоя қилиш учун судга шикоят йўллади

Анора Содиқова
Анора Содиқова

Ўзбекистонлик таниқли журналист, Uzdiplomat.uz сайти асосчиси Анора Содиқова “Муфаса” тахаллуси билан фаолият юритувчи блогер Мирсаид Ҳайдаров устидан судга мурожаат қилди.

“Эзгулик” инсон ҳуқуқлари жамияти раиси Абдураҳмон Ташановнинг маълум қилишича, Анора Содиқова ўз мурожаатида блогер томонидан ижтимоий тармоқ, турли аноним каналларда ўз шаъни, қадр-қиммати камситилгани ва туҳматга учраганини баён қилган ва Фуқаролик кодексининг 100-моддасига (шаън, қадр-қиммат ва ишчанлик обрўсини ҳимоя қилиш) кўра чора кўришни сўраган.

“Ижтимоий тармоқларда троллар армияси пайдо бўлган, журналистларни ҳақоратлаш, ватан хоинига чиқариш, сўкиниш билан бўҳтонлар қилиш осон бўлиб қолди. Қайсидир давлат идорасини танқид қилиш оқибатида троллар орқали ҳужумга ўтиш ҳам одатий ҳолга айланган. Назаримда, бунга қонуний чора кўриш вақти келди”, деб ёзган Анора Содиқованинг ўзи Фейсбукдаги саҳифасида.

Анора Содиқова бошчилигидаги Uzdiplomat.uz жамоаси жорий йил 8 февраль куни Тошкент шаҳрида ташкил этган “Йил танлови-2024” маросими тўсқинликка учрагани ҳақида хабар тарқалди.

Фаолларга кўра, тадбир ўтиши аввалдан белгиланган “Зарафшон” концерт зали эшиклари “техник сабаблар”га кўра очилмаган ва ташкилотчилар бошқа жой қидиришга мажбур бўлган.

Ушбу ҳодиса ортидан ижтимоий тармоқларда Ўзбекистонда мустақил матбуотнинг истиқболи хусусида хавотирли фикрлар янграган.

Анора Содиқова аввал ҳам касбий фаолияти сабаб ўзига таҳдид қилинганини билдирганди.

Диний соҳадаги давлат сиёсатига доир қонун қабул қилинди

Иллюстратив сурат
Иллюстратив сурат

Олий Мажлис Қонунчилик палатасининг 11 февраль куни бўлиб ўтган ялпи мажлисида “Ўзбекистон Республикасида фуқароларнинг виждон эркинлигини таъминлаш ва диний соҳадаги давлат сиёсати концепциясини тасдиқлаш тўғрисида”ги қонун лойиҳаси иккинчи ва учинчи ўқишларда қабул қилиниб, тасдиқ учун Сенатга юборилди.

Қонунчилик палатаси томонидан ишлаб чиқилган концепция 31 январдан 9 февралга қадар жамоатчилик муҳокамасига қўйилган эди.

Қуйи палатадаги муҳокамаларда қайд этилишича, концепция лойиҳаси бўйича аҳолидан 400 тадан зиёд изоҳ, таклиф ва тавсиялар келиб тушган, уларнинг 200 дан ортиғи ижобий. Шунингдек, 6 февраль куни Қонунчилик палатасида 16 та конфессия вакиллари билан концепция лойиҳасининг муҳокамасига бағишланган учрашув бўлиб ўтган.

Қуйи палата ялпи мажлисида сўзга чиққан депутатлар ушбу муҳим ҳужжат маромига етказиб ишлангани, кенг жамоатчиликнинг таклиф-мулоҳазалари асосида янада такомиллаштирилганини таъкидлашган.

Айни пайтда Kun.uz нашри муҳокамаларда қолдирилган айрим танқидий фикрлар инобатга олинмагани ҳақида ёзган.

Жами 141 нафар депутат ҳужжат қабул қилинишга рози бўлган, 1 нафари бетараф қолган, 2 киши овоз бермаган. Концепцияни қабул қилишга бирорта ҳам депутат қарши бўлмаган.

Концепция лойиҳаси сенаторлар томонидан тасдиқланиб, президент имзолагач кучга киради.

Қирқ бир банддан иборат концепцияда диний соҳадаги давлат сиёсатининг асосий вазифа, принцип ва устувор йўналишлари белгиланган. Жумладан, диний соҳадаги давлат сиёсати қонунийлик, виждон эркинлиги, диннинг давлатдан ажратилганлиги, тенглик, эркин фикрлаш, динлараро мулоқот ва ўзаро тушуниш каби асосий принципларга таяниши қайд этилган.

Йўл-транспорт ҳодисалари сабаб 26 минг киши жазоланди

Ўзбекистонда содир бўлган автоавариялардан бири (иллюстратив сурат)
Ўзбекистонда содир бўлган автоавариялардан бири (иллюстратив сурат)

Ўзбекистонда 2024 йил мобайнида транспорт воситалари ҳайдовчиларининг йўл ҳаракати қоидаларини бузиши жабрланувчига енгил тан жароҳати ёки анча миқдорда моддий зарар етказишига олиб келиши билан боғлиқ маъмурий ҳуқуқбузарлик бўйича 40 минг 119 нафар шахсга нисбатан 39 минг 270 та иш кўриб чиқилган.

Олий суд матбуот хизматининг маълум қилишича, шундан 26 минг 63 нафар шахсга нисбатан жарима ва транспорт воситасини бошқариш ҳуқуқидан маҳрум этиш каби маъмурий жазолар қўлланган.

Жамоат фаоллари мамлакатда ЙТҲлар ва улар оқибатида ўлим ҳолатлари кўпайиб бораётгани ҳақида бонг урмоқда.

Жумладан, 2024 йилда рўй берган 9364 та ЙТҲ оқибатида 2203 киши ҳалок бўлган, 8901 киши жароҳатланган.

Таҳлилларга қараганда, пиёдаларни уриб кетиш ҳолатлари кўпайган.

Йўллардаги бевақт ўлимлар сабаб соҳа масъулларининг истеъфоси ҳам талаб этилгани маълум.

Давомини ўқинг

XS
SM
MD
LG