Kreml vakillari AQSHdagi saylov natijalari bo‘yicha Vladimir Putin bilan Donald Tramp o‘rtasida hech qanaqa telefon muloqoti o‘tkazilmaganini bildirishdi. The Washington Post gazetasining Putin va Tramp 7-noyabr kuni qo‘ng‘iroqlashib, Ukrainadagi urush mavzusini muhokama qilganiga oid xabari “g‘irt uydirma”, deya bildirdi Rossiya prezidentining matbuot kotibi Dmitriy Peskov 11-noyabr kungi brifingda.
“Hech qanaqa suhbat bo‘lgani yo‘q. Bu hozirda hatto ancha hurmatli nashrlarda ham ayrim paytlarda chop etilayotgan xabarlar sifatiga yaqqol dalildir. Bu haqiqatga mutlaqo to‘g‘ri kelmaydi. Bu g‘irt uydirma, bu shunchaki yolg‘on axborot”, dedi Peskov.
Jurnalistlarning “Rossiya prezidenti AQSHning saylangan prezidenti bilan biror-bir muloqotni rejalayaptimi?” degan savoliga Peskov: “hozircha aniq bir reja yo‘q”, deya javob bergan.
Avvalroq The Washington Post nashri AQSHning saylangan prezidenti Donald Tramp payshanba kuni Rossiya prezidenti Vladimir Putin bilan telefon orqali suhbatlashgan, ular Ukrainadagi urush mavzusini muhokama qilishgani haqida xabar qilgan edi.
Gazeta maqolasida Tramp Putinni bundan buyongi eskalatsiyaga yo‘l qo‘ymaslik choralarini ko‘rishga chaqirgani hamda unga “Vashington Yevropada sezilarli darajada harbiy hozirlikka ega” ekanini eslatgani aytilgan.
Saylovoldi kampaniyasi chog‘ida Tramp, prezidentlik lavozimiga saylangan taqdirda, Ukrainadagi urushni bir kun ichida yakunlashga imkon beradigan yo‘lni topishini bir necha marta ta’kidlagan edi. Ayni paytda respublikachilar nomzodi bo‘lgan siyosatchi qanaqa konkret qadamlar qo‘ymoqchi ekaniga aniqlik kiritgan emasdi.
Vladimir Putin 7-noyabr kuni Valday forumidagi matbuot anjumanida Donald Trampni AQSH prezidenti lavozimiga saylangani bilan oshkora tabriklagan edi. U Trampni jasoratli odam deb atagan.
O‘shanda Putin “Agar Tramp sizga inauguratsiyagacha qo‘ng‘iroq qiladigan bo‘lsa, AQSHning saylangan prezidenti bilan gaplashishga tayyormisiz?” degan savolga “ha” deya javob bergan va hatto Trampga o‘zi qo‘ng‘iroq qilishga ham tayyor ekanini bildirgan edi.