Navoiy shahrida joylashgan “Navoiy azot” aksiyadorlik jamiyatida 11-mart kuni sodir bo‘lgan portlash natijasida 1 kishi halok bo‘lgan, yana 11 kishi jarohatlangan. Bu haqda Favqulodda vaziyatlar vazirligi matbuot xizmati ma’lumot tarqatdi. FVV portlash chog‘ida nobud bo‘lgan va jabrlangan kishilar shaxsini ochiqlagan emas.
Vazirlik qaydicha, seshanba kuni Toshkent vaqti bilan soat 14:10 da “Navoiy azot” zavodining 25-sexi laboratoriyasida gaz-havo aralashmasi portlagan, buning natijasida yong‘in kelib chiqqan.
Yuzaga kelgan yong‘inni o‘chirish uchun voqea joyiga 10 ta yong‘in-qutqaruv ekipaji yetib borgan. O‘t o‘chiruvchilar yong‘inni soat 14:20 da qurshab olishga, soat 14:50 da esa tamoman o‘chirishga muvaffaq bo‘lishgan.
FVV hodisa chog‘ida tan jarohati olgan fuqarolarga ayni paytda malakali tibbiy yordam ko‘rsatilayotganini bildirgan.
Shuningdek, vazirlik xabarnomasida hozirda holat yuzasidan tergovga qadar surishtiruv ishlari amalga oshirilayotgani qo‘shimcha qilingan.
Bu “Navoiy azot”da sodir bo‘layotgan ilk portlash emas. Ozodlik mazkur zavodda 2013, 2015 va 2020 yillarda ham sodir bo‘lgan portlashlar haqida xabar qilgan.