O‘zbekistonda so‘nggi besh yil ichida narkotik moddalarni noqonuniy sotishga doir jinoyatlar soni ikki baravarga ko‘paydi. Oliy sud e’lon qilgan statistika ana shundan dalolat beradi.
2020-yilda Jinoyat kodeksining 270, 271, 273-276-moddalariga daxldor jinoyatlarga qo‘l urganlar 3941 kishini tashkil etgan bo‘lsa, 2024-yilda bu raqam 8373 nafarga yetgan.
Hududlar kesimida giyohvandlik bilan bog‘liq jinoyatlarning eng ko‘p ulushi Toshkent shahrida qayd etilgan. 2024-yilda 1999 nafar shaxs shu turdagi jinoyatlarni sodir etgani uchun sudlangan.
Ozodlik avval xabar qilganidek, Prezident administratsiyasi huzuridagi Narkotiklarni nazorat qilish milliy markazi direktori Ravshan Mamatov ham O‘zbekistonda 2019−2024-yillar oralig‘ida narkojinoyatlar soni ikki barobarga, giyohvandlik vositalari musodarasi 8,5 barobarga, sintetik giyohvandlik vositalari musodarasi esa 400 barobarga ko‘paygani haqida ma’lum qilgandi. Mulozim kuzatilayotgan salbiy jarayon bu sohada kompleks chora-tadbirlarni belgilash hamda samarali idoralararo va xalqaro hamkorlikni yo‘lga qo‘yishni taqazo etayotganini aytgan.
Bojxona idoralari ma’lumotiga ko‘ra, 2024-yilda O‘zbekistonga bir tonnadan ortiq giyohvandlik moddalar olib kirilishining oldi olingan.