O‘zbekistonda haydovchilar tomonidan transport vositalarini agressiv boshqarish, drift, shaxmat shaklida harakatlanish kabi yo‘l bezoriliklari uchun javobgarlik joriy etilmoqda. Mamlakat prezidenti 20-fevral kuni imzolagan va 21-fevraldan kuchga kirgan qonunda ana shu talab ilgari surilgan.
Hujjatga muvofiq, Ma’muriy javobgarlik to‘g‘risidagi kodeks yangi 128−10-modda (yo‘l bezoriligi) bilan to‘ldirilgan.
Qonun hujjatida transport vositalari haydovchilarining boshqa transport vositalarining harakatiga qasddan to‘sqinlik qilishi, transport vositasini sababsiz sirpantirish (drift), o‘z yo‘nalishida harakatlanish bo‘lagini sababsiz keskin ravishda uch va undan ortiq marta uzluksiz o‘zgartirish yoki yo‘l harakati ishtirokchilarining xavfsiz harakatlanishiga tahdid soluvchi boshqa xatti-harakatlar yo‘l bezoriligi deb baholangan.
Mazkur huquqbuzarlik uchun bazaviy hisoblash miqdorining (BHM) 25 baravari (9 million 375 ming so‘m) miqdorida jarima solish yoki 1 yildan 2 yilgacha muddatga transport vositasini boshqarish huquqidan mahrum qilish tarzidagi jazo nazarda tutilgan.
Ushbu huquqbuzarlik transport vositalarini boshqarish huquqi bo‘lmagan yoki transport vositalarini boshqarish huquqidan mahrum etilgan shaxs tomonidan sodir etilsa, BHMning 50 baravari (18 million 750 ming so‘m) miqdorida jarima yoki 15 sutkagacha ma’muriy qamoqqa sabab bo‘ladi.
Ozodlik avvalroq Qashqadaryo viloyati Qarshi shahrida ikki yigit drift qilishga urinish oqibatida halok bo‘lgani haqida xabar qilgan edi.