Роппа роса чорак аср муқаддам Москвада ўзини Фавкулодда вазиятлар бўйича давлат қўмитаси, яъни ГКЧП деб эълон қилган бир ҳовуч совет амалдорлари давлат тўнтариши қилишга уринган эди. Аммо, ўша пайтдаги сиёсий вазият уларнинг бу уринишларига йўл қўймади. Лекин 25 йил аввал рўй берган август воқеалари собиқ Иттифоқни чок- чоки билан сўкилиб кетишига сабаб бўлди.
Бугун 1991 йил 19 август воқеаларига 25 йил тўлди. Қарийб 70 йиллик авторитар бошқарув, сиёсий репрессиялар ва иқтисодий турғунлик ортидан бошланган жараёнлар совет жамиятида мисли кўрилмаган очиқлик ва демократик ўзгаришларга олиб келди ва СССРнинг парчаланиб кетиши билан якун топди.
Озодлик радиоси саксонинчи йиллар сўнггида Совет Ўзбекистонига раҳбарлик қилган, тўқсонинчи йиллар бошида эса СССР Олий Кенгаши Миллатлар Кенгашининг раиси сифатида Совет раҳбари Михаил Горбачевга яқин бўлган собиқ совет арбоби Рафиқ Нишонов билан 25 йил аввалги воқеалар ҳамда чорак аср мобайнида Ўзбекистоннинг мустақил давлат сифатида босиб ўтган йўли ҳақида суҳбатлашди.
