Toshkent shahrida fuqarolarning plastik kartalaridagi pul mablag‘lari va ularga oid shaxsiy ma’lumotlarni qo‘lga kiritish bilan shug‘ullanib kelgan call-markaz faoliyatiga chek qo‘yildi. Bu haqda poytaxt IIBB matbuot xizmati ma’lum qildi.
DXX bilan hamkorlikda o‘tkazilgan tezkor tadbir davomida bir guruh shaxslar Mirzo Ulug‘bek tumanida joylashgan uyni ijaraga olib, u yerda call-markaz faoliyatini yo‘lga qo‘ygani aniqlangan.
IIBBga ko‘ra, jinoiy guruh fuqarolarga qo‘ng‘iroq qilib, firibgarlik yo‘li bilan ularning mol-mulkini talon-toroj qilib kelgan. Ushbu jinoiy guruhda ikki nafar tashkilotchi hamda 20 ga yaqin operator faoliyat yuritgan.
Tezkor tadbirda gumonlanuvchilardan 15 mingdan ortiq fuqarolarning abonent raqamlari, shaxsga doir ma’lumotlari, giyohvandlik moddalari va 35 dona uyali aloqa vositasi ashyoviy dalil sifatida rasmiylashtirib olingan.
Holat yuzasidan jinoyat ishi qo‘zg‘atilib, gumonlanuvchilar qamoqqa olingani bildirilgan.
So‘nggi vaqtlarda O‘zbekistonda firibgarlik yo‘li bilan fuqarolarning plastik kartalaridan pul yechib olayotgan kibertovlamachilar ko‘paygan.
Avvalroq Ichki ishlar vazirligi Tesla kompaniyasi nomidan foydalanib aholidan pul undirayotgan kibertovlamachilar paydo bo‘lgani to‘g‘risida ogohlantirgandi.
