Toshkent shahri ichki ishlar tizimi tergovchisi pora sabab jinoiy jazoga tortildi.
Kun.uz nashri sud hujjatiga tayanib yozishicha, Bektemir tumani IIO FMB tergovchisi lavozimida ishlab kelgan N.H. 2024-yil 17-sentyabr kuni ish yurituvidagi jinoyat ishi bo‘yicha ayblanuvchi tariqasida jalb etilgan fuqarodan qamoq ehtiyot chorasi qo‘llamaslik evaziga 500 dollar olganda ushlangan.
Sobiq tergovchi sudda pul minnatdorlik sifatida berilganini iddao qilib, o‘ziga nisbatan oqlov hukmi chiqarilishini so‘ragan.
“Gumonlanuvchiga Jinoyat kodeksining 276-moddasi 2-qismi bilan ayblov e’lon qilib, unga nisbatan garov ehtiyot chorasini tanlaganligi haqida qarordan bir nusxa berdim. U ishini qonun doirasida tez ko‘rib berganim uchun rahmat sifatida 500 dollar berib ketishini aytdi”, degan u o‘z ko‘rsatmasida.
Pulni xizmat xonasida olgan tergovchining aybi guvohlarning ko‘rsatmalari, sud-kimyoviy ekspertiza xulosasi va boshqa dalillar bilan isbotini topgan, deyiladi sud hujjatida.
Jinoyat ishlari bo‘yicha Mirzo Ulug‘bek tuman sudining hukmi bilan N.H. JKning 210-moddasi 1-qismida nazarda tutilgan jinoyatni sodir etganlikda aybdor deb topilgan. Unga 3 yil IIV tizimida ishlash huquqidan mahrum qilingan holda 2 yil muddatga ozodlikdan mahrum qilish jazosi tayinlangan.
Keyingi yillarda ichki ishlar tizimi vakillarining pora bilan qo‘lga olingani holatlari ko‘paygani aytiladi.
O‘tgan yil oktyabr oyida Camarqand viloyati Paxtachi tumani IIB Jinoyat qidiruv bo‘limi tezkor vakili poraxo‘rlik sabab jinoiy jazoga tortilgan edi. O‘shanda xodim sudda o‘z aybiga iqrorlik bildirarkan, “muhtoj bo‘lgani”, “turmush o‘rtog‘i va singlisi kasal bo‘lib qolgani” va “ko‘p miqdorda jarimalari borligi” vajidan pora olganini aytgan.
O‘tgan yilning oktyabrida, shuningdek, bangifurushga ko‘maklashgan IIB xodimi 10 yil 2 oy muddatga ozodlikdan mahrum qilingandi.
