Qashqadaryo viloyati Kasbi tumani Do‘stlik MFY hududidagi yonilg‘i quyish shoxobchasida 10-mart kuni yong‘in sodir bo‘ldi.
Favqulodda vaziyatlar vazirligi matbuot xizmatining ma’lum qilishicha, shoxobcha hududidagi ikkita 9 tonnali sig‘im yongan.
To‘rtta yong‘in qutqaruv bo‘linmasi voqea joyiga soat 22:04 da yetib borib, yarim soat ichida yong‘inni to‘liq o‘chirgani bildirilgan.
“Yong‘in oqibatida 2 nafar fuqaro kuyish tan jarohatini olgan. Hozirda ularning ahvoli yaxshi. Yong‘in sababi va zarariga aniqlik kiritilmoqda”, deyilgan FVV xabarnomasida.
Joriy yil 20-fevral kuni Andijon viloyati Shahrixon tumanida joylashgan avtomobillarga gaz quyish shoxobchasida ro‘y bergan portlashda ham ikki kishi jarohatlangandi.
2024-yil 17-dekabr kuni Farg‘ona shahridagi propan gaz quyish shoxobchasida yuz bergan portlash esa insoniy talafotlarga olib kelgan edi.