Наманган вилояти суди раиси ўринбосари – фуқаролик ишлари бўйича судлов ҳайъати раиси Абдураҳмон Сафоев ўзганинг эгалигида бўлган квартирани сохта ҳужжатлар билан ўз номига расмийлаштириб, бошқа бир одамга сотиб юборган бўлиши мумкин, дея хабар қилди “Kun.uz” нашри.

“Бу эҳтиёжимиздан ортиқча бўлган уй эди. Доимий яшамасак-да, йўлимиз тушганида бир кун-ярим кун туриб кетардик. Уста тушириб, таъмирлаётгандик, бошқа одам “документ” кўтариб келди. Шунда билиб қолдик. Ушбу ишга аралашган инсонларнинг ҳаммаси жавобгарликка тортиляпти”, деган Наманган шаҳри Алишер Навоий кўчасида жойлашган хонадоннинг ҳақиқий эгаси.

Судьялар олий кенгаши матбуот хизмати Сафоевга нисбатан хизмат текшируви ўтказилганини билдирган.

“Хизмат текшируви хулосаси муҳокама қилиниб, тегишли қарор қабул қилиш учун Судьялар олий малака ҳайъатига юборилган”, дейилган расмий изоҳда.

Кенгаш матбуот хизмати текширувда шикоятчининг важлари тасдиғини топган-топмаганига аниқлик киритмаган.

Озодлик жорий йилнинг 25 июль куни ҳуқуқ-тартибот идоралари ходимлари ўтказган махсус амалиётда иқтисодий ишлар бўйича Сурхондарё вилояти Қумқўрғон туманлараро суди судьяси С. А. фуқародан 3000 доллар пора олаётганида ушлангани ҳақида хабар қилганди. Ҳибсга олинган шахс аввалроқ “Ибратли судья” мукофотига сазовор бўлган.

Ўзбекистоннинг “Газли” ва “Хўжаобод” ерости газ омборларида қиш мавсуми учун 5,1 млрд куб метрдан ортиқ газ захираси жамланди, деб маълум қилди Энергетика вазири Жўрабек Мирзамаҳмудов YouTube’даги “Лолазор” подкастида.

Мулозим бу йил ўтган йилга нисбатан 1,1 млрд куб метр кўпроқ газ захираси йиғилганини урғулаган.

Ҳозирда мамлакатда “Газли” ва “Хўжаобод” ерости газ сақлаш омборидан фойдаланилмоқда. Мирзамаҳмудов маҳаллий блогерлар билан мулоқот мобайнида “Сўх” газ омбори бўйича эса ишчи гуруҳ тузилгани, ўрганиш ишлари олиб борилаётганини қайд этган. Мазкур омбор Қирғизистон ҳудудида жойлашган бўлиб, компрессорлар ва бошқа технологик ускуналар Ўзбекистон ҳудудида ҳисобланади.

Аввалроқ “Газли” қувватини 2025 йилга қадар икки баробар ошириб, 3 млрд куб метрдан 6 млрд куб метргача ошириш режаси эълон қилинганди. Вазирга кўра, ҳозирча омбор қуввати 4,5 млрд куб метргача кенгайтирилган.

Маълумот ўрнида, 2023 йили куз-қишга ҳозирлик доирасида “Газли” ва “Хўжаобод” омборлари 98 фоизга тўлдирилгани маълум қилинган, аммо ўтган йили ҳам совуқ мавсум газ тақчиллиги билан ёдда қолганди.

Умуман, кейинги уч-тўрт йилда мамлакатда куз-қиш мавсумида газ тўлдириш шохобчаларида турнақатор навбатлар пайдо бўлиши, ҳатто АЁҚШларда чекловлар жорий этилиши одатий ҳолга айланган.

Ўзбекистонда гиёҳвандлик воситалари, уларнинг аналоглари ҳамда психотроп моддаларни телекоммуникация тармоқлари ва интернетда тарқатиш, реклама қилиш, намойиш этиш учун жавобгарлик белгиланди.

“Ҳуқуқий ахборот” каналининг маълум қилишича, Ўзбекистон президенти томонидан 5 октябрь куни имзоланган 971-сонли қонунга биноан Жиноят, Жиноят-процессуал кодекслари ҳамда Маъмурий жавобгарлик тўғрисидаги кодексга тегишли ўзгартириш ва қўшимчалар киритилди.

Гиёҳвандлик воситалари, уларнинг аналоглари ва психотроп моддаларни қонунга хилоф равишда муомалага киритиш жиноятини вояга етмаганларни жалб қилган ҳолда содир этганлик учун ҳам жавобгарлик кучайтирилмоқда.

Адлия вазирлиги томонидан юритиладиган “Ҳуқуқий ахборот” канали билдиргисида бангивор моддаларнинг интернетдаги тарғиботи учун қандай жазо кўзда тутилгани очиқланмаган.

Расмий маълумотда қайд этилишича, гиёҳвандлик воситалари, уларнинг аналоглари ёки психотроп моддалар ҳисобланмайдиган алоҳида тоифадаги кучли таъсир қилувчи моддаларни ўтказиш мақсадини кўзламай қонунга хилоф равишда тайёрлаш, олиш, сақлаш, ташиш ёки жўнатиш каби ҳаракатлар учун БҲМнинг 50 бараваригача миқдорда жарима, 360 соатгача мажбурий жамоат ишлари, 3 йилгача ахлоқ тузатиш ишлари, 1 йилдан 3 йилгача озодликни чеклаш, 3 йилгача озодликдан маҳрум қилиш каби жиноий жазолар кўзда тутилган.

Кейинги йилларда Ўзбекистонда ўсмирлар ва ёшлар орасида психотроп моддалар истеъмолига ружу қўяётганлар кўпайгани борасида хавотирлар мавжуд. Жамоатчилик бангиликка қарши курашни кучайтиришни таклиф этиб келади.

Олимлар Наманган вилояти ҳудудидаги Ахсикент археология ёдгорлигида сўнгги 50 йилдаги энг нодир топилмаларни аниқлашди.

Ўзбекистон Маданий мерос агентлиги маълумотига кўра, ХI қазув объектида олиб борилаётган изланишлар давомида археологлар кенглиги 2,3 метрли зинапоя ва бус-бутун аркаларга дуч келган. Бу ердан 10 минг куб метр тупроқ чиқарилгач, йўлак 12 поғонали экани маълум бўлган.

Қадимшунослар объектдан яна иккита ноёб ерости йўлини топган. Тахминларга кўра, ҳар икки аркасимон йўлак дастлаб аниқланган катта йўлга туташади.

“Қизиқарли томони, барча йўлаклар бутун (cақланган бўлиб), аркасимон ҳолда метро услубида нафислик билан пишиқ ғиштдан қурилган”, дейилган агентлик хабарномасида.

2024 йилги қазув ишлари давомида айни шу объектдан “итальянча” дея таърифланган раковина, ерости, полости иситиш тизими, нафис сопол қувурлари ва қўл ювиш воситалари ҳам топилганди.

Маълумотларга мувофиқ, 100 гектарга яқин қисми бутун сақланган ёдгорлик Х-ХIII асрларга оид ерости сув иншоотининг кузатув пункти, мудофаа девори, тураржой қолдиқлари, деворий расм намуналари ва нодир қурилмаларни ўз ичига олади.

Қазув объектларидан бирида милоддан аввалги III-I асрларда барпо этилган маҳобатли мудофаа девори қолдиғи ҳам топилган.

Ўзбекистонда жорий йилнинг 9 ойида давлат бюджети даромадлари 186,3 триллион сўмни, харажатлари эса 223,7 триллион сўмни ташкил этган. Шу тариқа тақчиллик 37,3 триллион сўмдан ошиб кетган. Бунга Иқтисодиёт ва молия вазирлигининг ҳисоботини ўрганган “Kun.uz” нашри эътибор қаратди.

Вазирлик очиқлаган маълумотларга кўра, сентябрь ойида давлат бюджети даромадлари 26 триллион 665 миллиард сўмни, харажатлари эса 27 триллион 136 миллиард сўмни ташкил қилган. Демак, биргина сентябрь ойида даромад ва харажат ўртасидаги салбий тафовут 471 миллиард сўмга етган.

Эслатиб ўтамиз, 2024 йил учун давлат бюджети ҳақидаги қонунда даромадлар 270,4 триллион сўмни, харажатлар эса 280,7 триллион сўмни ташкил этиши прогноз қилинган эди.

Бутунжаҳон Олтин кенгаши маълумотларига кўра, жорий йилнинг март ойида Ўзбекистон 11 тонна олтин сотиб, бу қимматбаҳо экспорти бўйича дунёда биринчи ўринни эгаллаган. Иқтисодий таҳлилчилар ҳукумат бюджет дефицитини ёпиш учун кўпроқ олтин сотаётганини айтишган.

2024 йилнинг биринчи ярмида Ўзбекистонда 3837 нафар шахс коррупцияга оид жиноят содир этгани учун суд томонидан жиноий жавобгарликка тортилган. Бу ҳақда Коррупцияга қарши курашиш агентлиги маълум қилди.

Агентлик қайдича, ўтган йил билан таққослаганда Мактабгача ва мактаб таълими вазирлиги тизими (237 нафардан 285 нафарга), давлат улуши мавжуд корхоналар (103 нафардан 153 нафарга) ва маҳаллий ҳокимликларда (133 нафардан 119 нафарга) коррупциявий жиноятлар сони ортган.

Банк, соғлиқни сақлаш, ҳуқуқни муҳофаза қилиш, олий таълим, бандлик ва камбағалликни қисқартириш, қишлоқ хўжалиги каби соҳаларда эса бу турдаги ҳуқуқбузарликлар нисбатан камайган.

Аввалроқ Озодлик 2023 йилда коррупция жинояти учун судланган 566 нафар шахс давлат хизматига қайта ишга киргани ва коррупция жиноятларини такрор содир этгани ҳақида хабар қилган эди.

Ўзбекистон Олий Мажлиси Сенати 30 сентябрь куни бўлиб ўтган йиғилишда бир қатор ҳужжатлар билан бирга Хитой билан махфий маълумотларни ўзаро ҳимоя қилиш тўғрисидаги ҳукуматлараро битим ратификациясига доир қонунни ҳам маъқуллади.

Ушбу битим 2023 йил 18 май куни президент Шавкат Мирзиёевнинг Хитойга ташрифи доирасида Сиань шаҳрида имзоланган.

Парламент юқори палатасидаги муҳокамада қайд этилишича, минтақада кузатилаётган кескин ўзгарувчан ҳарбий-сиёсий вазият ўзаро махфий ахборот хавфсизлигини таъминлаш учун қонуний асосларни кучайтиришни талаб қилади.

Ўн тўққизта моддадан иборат битимда узатилаётган ва қабул қилинаётган ҳар қандай шаклдаги махфий ахборотни ўзаро ҳимоя қилиш, шунингдек, миллий қонунчилик бўйича махфийлик даражаси ва белгиларини таққослаш назарда тутилган.

Бу борада Давлат хавфсизлик хизмати ваколатли орган этиб белгиланган.

“Gazeta.uz” нашрининг эслатишича, Ўзбекистон Қозоғистон, Украина, Германия, Беларусь, Озарбайжон, Россия, Қирғизистон ва АҚШ каби давлатлар билан махфий маълумотларни ўзаро ҳимоя қилишга доир келишувга эга.

Тошкент вилояти ИИББ Янгийўл туманида 30 дан ортиқ кобра илон очиқликка қўйиб юборилгани ҳақидаги хабарни рад этди.

2 октябрь куни ижтимоий тармоқларда Янгийўл тумани Туябўғиз қишлоғида фуқаро хонадонида сақланган бир қанча кобра илонлар қўйиб юборилгани ҳақида хабар тарқалганди.

Маҳаллий нашрлар ёзишича, илонларнинг ҳудуд бўйлаб тарқалиши оқибатида аҳоли орасида ваҳима ёйилган.

Тошкент вилояти экология бошқармаси маълумотига кўра, Туябўғиз МФЙда яшовчи фуқаро Н.Ю. хонадонида 30 дан ортиқ “Осиё кобра” илонларини тегишли рухсатномасиз сақлаб келган. Номаълум сабабларга кўра жониворлар очиққа қўйиб юборилган. Маҳаллий аҳоли уларнинг иккитасини тутиб ўлдирган.

Вилоят ИИББ матбуот хизмати раҳбари Бобур Тўлаганов бу борада фарқли баёнот берган. Унга кўра, 30 дан зиёд эмас, балки 4 та илон боқилаётган жойидан қочиб кетган ва қисқа вақт ичида уларнинг ҳаммаси тутилган. Хабарномада ҳолат юзасидан ИИББ томонидан терговга қадар текширув олиб борилаётгани айтилган.

Тошкент шаҳрида жорий йилнинг 1 октябридан Америка технологиялар университети фаолият бошлади.

Ўзбекистон олий таълим, фан ва инновациялар вазирлиги матбуот хизмати маълумотига кўра, янги олий таълим муассасаси АҚШнинг “Cintana Education” компанияси ва “Times Higher Education” рейтингида 182-ўринни эгаллаб келаётган Аризона давлат университети билан ҳамкорликда очилган.

Қайд этилишича, мазкур олий таълим даргоҳида муҳандислик, соғлиқни сақлаш, ахборот технологиялари, архитектура ва дизайн, иқтисодиёт ва молия, халқаро муносабатлар соҳалари бўйича кадрлар тайёрланади.

2024/2025 ўқув йилида университетда халқаро савдо ва дастурий муҳандислик йўналишида бакалавр босқичида ўқиш ташкил этилади.

Вазирлик маълумотига қараганда, битирувчиларга Aризона давлат университети ёки АҚШда тан олинадиган ҳамкор хорижий олий таълим ташкилотининг дипломи берилади.

Маълумот ўрнида, Ўзбекистон президенти жорий йил июль ойида мазкур университетни ташкил этишга доир қарор имзолаганди.

ОТМ Тошкент шаҳри Бешёғоч кўчасидаги бинога ижара асосида жойлаштирилади. Қарорга кўра, 2025 йил 1 сентябрига қадар университет кампусини қуриш учун пойтахт ҳудудидан ер майдони ажратилиши лозим.

Ўзбекистонда 30 га яқин хориж университети ва филиали мавжуд. Хусусан, Тошкентда 2019 йилдан бери АҚШнинг Вебстер университети фаолият юритиб келади.

Ўзбекистон Яқин Шарқдаги вазият шиддат билан кескинлашаётганидан чуқур хавотирда. Бу ҳақда Ўзбекистон Ташқи ишлар вазирлиги томонидан 3 октябрь куни тарқатилган баёнотда айтилган.

“Танглик даражасининг янада ортиши кенг минтақада хавфсизликка нисбатан бўлган хатар ва таҳдидларнинг мисли кўрилмаган даражада кучайишига ва бутун халқаро ҳамжамият учун олдиндан айтиб бўлмайдиган оқибатларга олиб келиши мумкин, деб ҳисоблаймиз”, дейилган ТИВ баёнотида Ўзбекистон қарама-қарши томонларни вазминликка ва кескинликнинг янада кучайишига олиб келиши мумкин бўлган ҳаракатлардан тийилишга чақириши қайд этилган.

Баёнотга мувофиқ, Ўзбекистон томони можарони халқаро нормалар ва БМТ Хавфсизлик Кенгашининг қарорларига мувофиқ тинч йўл билан ҳал этиш учун шошилинч чоралар кўриш зарурлигини таъкидлаган.

Яқин Шарқ минтақасидаги вазият куни кеча Эрон томонидан Исроилга қарши уюштирилган ракета ҳужуми ҳамда Исроилнинг Ливан жанубида ҳарбий амалиёт бошлаши ортидан янада таранглашиб кетган. Ундан аввал Исроил авиацияси томонидан берилган ҳаво зарбалари оқибатида Ливандаги “Ҳизбуллоҳ” гуруҳи лидери Ҳасан Насруллоҳ ўлдирилган эди.

Мазкур радикал гуруҳ АҚШда террор ташкилоти деб тан олинган. Европа Иттифоқи эса “Ҳизбуллоҳ”нинг фақат қуролли қанотини террор ташкилоти деб билади, депутатлари Ливан парламентида ўтирган “Ҳизбуллоҳ” партияси эса, ЕИ фикрича, террор ташкилоти эмас.

Тошкент вилоятининг Янгийўл туманида 41 ёшли эркак 4 яшар қизга жинсий тажовуз қилган. Бу ҳолат ҳақиқатан ҳам содир бўлганини Qalampir.uz нашрига Бош прокуратура матбуот котиби Ҳаёт Шамсутдинов тасдиқлаган.

Хабарда қайд этилишича, айни пайтда жабрланувчи қизча касалхонада, жинсий тажовузда гумонланган шахс эса қўлга олинган.

Ҳолат юзасидан Янгийўл шаҳар ИИБ ҳузуридаги Тергов бўлими томонидан мамлакат Жиноят кодексининг 119-моддаси (Жинсий эҳтиёжни зўрлик ишлатиб ғайритабиий усулда қондириш) ҳамда 273-моддаси (Гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) билан жиноят иши қўзғатилган.

Олий Мажлис Сенатининг 30 сентябрь кунги ялпи мажлисида темир йўл чипталари қимматлаб кетгани ҳолда хизмат сифати яхшиланмагани танқид қилинди.

“Темирйўл транспорти тўғрисида”ги қонун муҳокамасида сўз олган сенатор ва олим Абдураҳим Эркаев чипта нархи холислик, ҳалоллик мезонлари асосида белгиланганини савол остига олган.

“Аҳоли ижтимоий тармоқларда чипта нархлари хизмат кўрсатиш сифатига мос келмайди деган фикрларни билдирмоқда. Демак, аҳоли кўрсатилаётган хизматдан норози. Иккинчидан, савол туғилади, чипта нархларини белгилашда хизматлар нархи ошкора шаффоф калькуляция қилинганми, аҳоли бундан хабардорми?” дея транспорт мулозимларини саволга тутган Эркаев.

Сенат аъзоси шу пайтгача поезд чиптаси баҳоси самолётникидан қиммат бўлмаганини урғулаб, монопол мавқедаги “Ўзбекистон темир йўллари” АЖ асосланмаган нархлар белгилаётганидан баҳс этган.

“Ўзбекистон темир йўллари” жорий йил 20 январдан ички қатновдаги “Афросиёб”, “Шарқ”, “Насаф” ва “Ўзбекистон” поездларининг чипта нархини 20 фоизга оширди.

Аввалроқ “Ўзбекистон темир йўллари”да ишловчи манба Озодликка “бурнигача қарзга ботган” компаниядаги муаммоларнинг асосий сабаби тизимда авж олган коррупция эканини айтганди.

Мамлакат темир йўлларида хизмат сифати пастлиги ва нарх қимматлигини ҳам маҳаллий блогерлар, ҳам хорижлик инфлюэнсерлар танқид қилиб келади.

Тошкент шаҳри ва Самарқанд вилоятида фуқароларни хорижий давлатларга ишга юборишни ваъда қилган шахслар ушланди, деб маълум қилди Бош прокуратура ҳузуридаги Иқтисодий жиноятларга қарши курашиш департаменти.

Чилонзор туманида ДХХ ва ИИББ ходимлари ҳамкорлигида ўтказилган тезкор тадбирда фуқаролар А.Н. ва Д.И. қўлга олинган. Улар танишлари ёрдамида айланма йўллар орқали АҚШга ишга юбориш учун фуқаро А.Ж.дан 14 минг доллар олган вақтда ашёвий далиллар билан ушланган.

Самарқанд вилояти Қўшработ туманида яшовчи фуқаро эса икки ватандошдан гўёки юқори лавозимда ишловчи танишлари ёрдамида Англияга ишга юбориш эвазига 2500 доллар ва 2,5 миллион сўм олгани аниқланган.

Ҳар икки ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилган.

Кейинги йилларда ўзбекистонликларнинг ноқонуний йўл билан АҚШга боришга уриниши ҳолатлари кўпайган.

2023 йил октябрь ойида Fox News сўнгги икки йил ичида Ўзбекистон фуқаролари АҚШ чегарасини ноқонуний кесиб ўтганлар орасида учинчи ўринни эгаллагани ҳақида хабар тарқатган. Маълум бўлишича, ушбу муддат ичида 13624 нафар ўзбекистонлик АҚШга ноқонуний ўтишга ҳаракат қилган.

Озодлик радиоси ўтган йил август ойида “Ўзбекларнинг Америкага хатарли йўли” деб номланган суриштирувни эълон қилган эди. Унда ўзбекистонликларнинг Қўшма Штатларга Лотин Америкаси давлатлари, жумладан, Мексика орқали ноқонуний ўтишга уриниши ҳикоя қилинган:

Тошкент вилояти Нурафшон–Пискент автомобиль йўлининг 12-километрида кўприк қулаб тушди.

Вилоят ИИБ ЙҲХБ матбуот хизмати маълумотига кўра, ҳодиса 2 октябрь куни соат 20:00 ларда, 37 ёшли ҳайдовчи “Hovo” русумли юк машинасида кўприкни кесиб ўтаётганда рўй берган.

Кўприк қулаши оқибатида юк машинаси тиркамаси Полвонов номли каналга тушиб кетган.

Ҳодиса содир бўлганда кўприк тепасида одамлар бўлмагани, ҳайдовчи ҳам жароҳатланмагани айтилган.

Қайд этилишича, ҳолат юзасидан тегишли органлар томонидан суриштирув олиб борилмоқда.

Маҳаллий фаоллар мамлакатдаги носоз кўприкларни таъмирлаш учун кўпроқ маблағ ажратишга ундаб келади.

2023 йил ноябрь ойида Олий Мажлис Қонунчилик палатасидаги йиғилишда Ўзбекистондаги 14863 та кўприкдан 32 фоизи, яъни 4834 таси қониқарсиз, 5-6 фоизи эса яроқсиз ҳолатда экани айтилганди.

Саудия Арабистонининг Flynas ва Эроннинг Qeshm Air авиакомпаниялари Ўзбекистонга парвозларни вақтинча тўхтатди.

Uzbekistan Airports матбуот хизмати маълумотига кўра, бунга Яқин Шарқдаги вазиятнинг кескинлашуви ва Эрон ҳаво ҳудуди ёпилиши сабаб бўлган.

2 октябрь куни Flynas’нинг Жидда – Тошкент – Жидда (KNE633/634) ва Жидда – Наманган – Жидда (KNE651/652) йўналишидаги, Qeshm Air авиаширкатининг эса Теҳрон – Тошкент – Теҳрон (QSM2143/2142) йўналишидаги рейслари бекор қилинган.

Ушбу рейслар ҳақида батафсил маълумот олиш учун авиакомпания вакилларига мурожаат қилиш тавсия этилган.

Аввалроқ Озодлик 1 октябрь оқшомида Эрон Исроил ҳудудига баллистик ракеталар билан зарба бергани ҳақида хабар қилганди. Мазкур ҳужум туфайли Тель-Авивдаги Бен Гурион аэропорти бир муддатга ёпилганди.

Эрон расмийлари ҳам “минтақада парвозлар хавфсизлигини таъминлаш” важидан пайшанба тонгигача барча авиарейсларни бекор қилишга қарор қилди. Парвозлар бекор қилинганига оид қарор Эрон–Исроил можароси кескин кучайиб кетгани манзарасида эълон қилинди.

Яқин Шарқдаги таранглик Uzbekistan Airways парвозларига ҳам ўз таъсирини ўтказмоқда. Авиаширкатнинг Тель-Авив – Самарқанд – Тошкент йўналиши (HY304 рейси) бўйлаб парвоз қиладиган учоғи 1 октябрь куни белгиланган вақтдан икки соат кечикиб учган.