O‘zbekiston maktabgacha va maktab ta’limi vaziri Hilola Umarova “Tashabbusli byudjet” doirasida pedagoglardan pul yig‘ish holatlari kuzatilsa, tizim vakillarini bu haqda xabar berishga chaqirdi.
Mulozimaga ko‘ra, oxirgi yillarda bog‘cha va maktab xodimlarini o‘z faoliyatidan boshqa ishlarga jalb qilish, ulardan asossiz pul yig‘ishlarga qarshi kurashilayotgan bo‘lsa-da, tizimda hamon shunday topshiriqlarini berayotgan mas’ullar uchramoqda.
Joriy yil 11-martidan O‘zbekistonda “Tashabbusli byudjet” loyihasining 2025-yilgi 1-mavsumi doirasida ovoz berish bosqichi boshlandi. Bu orada ijtimoiy tarmoqlarda turli soha vakillari, jumladan, o‘qituvchilar ovoz yig‘ishga majburlanayotgani haqida xabarlar tarqalmoqda.
“Yaqinda Quva tumanidagi maktablarning birida o‘qituvchilarning oylik maoshidan “Open budjet”da ovoz yig‘ish uchun 700 ming so‘mdan ushlab qolishni talab qilgan direktor bilan mehnat shartnomasini bekor qildik”, degan Hilola Umarova.
Farg‘ona viloyati Quva tumanida pedagoglarga noqonuniy talab qo‘yilayotgani haqida ilk bor Ozodlikning “Sizdan Telegram” loyihasi xabar qilgan edi.
MMTV o‘qituvchi, ta’lim xodimlarini majburiy ovoz berishga jalb etish, ular maoshidan pul yig‘ish bilan “Tashabbusli byudjet” loyihasiga soya solmaslikka undagan.
“Pedagoglarni ularning vazifasiga kirmaydigan ishlarga jalb qilish, turli maqsadlar uchun mablag‘ yig‘ish kabi holatlar bilan hech qachon murosa qilmaymiz”, deya ta’kidlagan vazir Umarova.
O‘zbekistonda “Tashabbusli byudjet” loyihasi fuqarolarga infratuzilmani yaxshilash bo‘yicha o‘z loyihalarini taklif qilish orqali mahalliy byudjetning bir qismi taqsimotida ishtirok etish uchun imkoniyat yaratish maqsadida yo‘l qo‘yilgani aytiladi.
Ozodlikka joylardan yo‘llanayotgan shikoyatlar, ijtimoiy tarmoqlardagi postlarga qaraganda, “Ochiq byudjet” uchun ovoz berishda majburlov va g‘irromliklar kuzatiladi.