Jinoyat ishlari bo‘yicha Toshkent shahri Chilonzor tumani sudi mashina olib berish va’dasi bilan 600 ga yaqin odamni chuv tushirgan jinoiy guruhga hukm o‘qidi.
Kun.uz nashri sud hujjatlariga tayanib yozishicha, sudlanuvchilar “Ishonch Auto Leasing”, “Ishonch Leasing Car”, “Mega Avto Leasing”, “Mega Auto Leasing-Hamkor”, “Asr Auto Leasing”, “Asr Auto” kabi MCHJlar ochib, fuqarolarga 5 mlrd 240 mln so‘mdan ortiq moddiy zarar yetkazishgan.
O‘n uch nafar sudlanuvchining ikki nafari ayol bo‘lib, ulardan biri – hisobchi vazifasida ishlagan ayol bundan 6 oy oldin “Toshturma”da farzandli bo‘lgan.
Sud jinoiy guruh a’zolariga turli muddatga ozodlikdan mahrum qilish jazosi tayinlangan.
Ikki ayoldan biri 6 yil-u 6 oy, chaqalog‘i bo‘lgan sudlanuvchi esa 6 yil-u 1 oy muddatga qamalgan.
O‘zbekistonda odamlarning avtomobil olib berish va’dasiga ishonib, millionlab so‘m mablag‘idan ajralib qolishi ko‘p uchramoqda.
Joriy yil yanvar oyida jinoyat ishlari bo‘yicha Toshkent shahri Shayxontohur tuman sudi ko‘p sonli fuqarolarni chuv tushirgan avtosalonchilarga jazo tayinlagandi.
Ozodlik avvalroq Toshkent shahri Yangihayot tumani IIB “Umid avto companies” MCHJ mansabdorlariga nisbatan JKning 168-moddasi (firibgarlik) bilan jinoyat ishi qo‘zg‘atgani haqida xabar qilgan edi.
2024-yil dekabr oyida esa Shayxontohur tumanida davlat ro‘yxatidan o‘tgan “Halal Auto Leasing kompany” MCHJ mansabdorlariga ham xuddi shunday ayblov ilgari surilgandi.
