Ўзбекистонда президент ҳузуридаги Давлат хизматини ривожлантириш агентлиги муассислигида Раҳбар кадрларни баҳолаш маркази ташкил этилди.

Вазирлар Маҳкамасининг жорий йил 4 октябридаги 629-сонли қарорига мувофиқ, марказнинг асосий вазифалари ўлароқ қуйидагилар белгиланган:

• ижтимоий-психологик тадқиқотлар асосида давлат фуқаролик хизматчилари учун базавий, алоҳида лавозим ёки лавозимлар гуруҳи учун компетенциялар модели ҳамда индикаторларини ишлаб чиқиш;
• давлат фуқаролик хизматчиларини шахсий-профессионал диагностика қилиш, компетенциялар модели асосида комплекс баҳолаш;
• компетенцияларни баҳолаш жараёнида фойдаланиш учун доимий равишда янги услубларни ишлаб чиқиш, ўзлаштириш ва жорий қилиш;
• компетенцияларни баҳолаш натижалари асосида раҳбар кадрлар учун шахсий-профессионал ривожланиш траекториясини ишлаб чиқиш ва замонавий технологиялардан фойдаланган ҳолда амалга ошириш;
• раҳбарлик лавозимига номзодларнинг умумий касбий билими, қадриятлари ва ақлий салоҳиятини аниқлаш бўйича тест синовларини ҳамда психологик сўровномалар ўтказиш;
• раҳбар кадрлар фаолияти самарадорлигини баҳолаш ва мониторинг қилиш, кадрларга бўлган эҳтиёжни прогноз қилиш, уларни саралаб олиш ва жой-жойига қўйиш жараёнларига рақамли технологияларни ва замонавий усулларни кенг жорий этиш;
• фаолиятининг асосий йўналишлари бўйича эксперт-таҳлилий фаолият, илмий тадқиқот ва изланишларни олиб бориш.

Бош вазир Абдулла Арипов томонидан имзоланган қарорда айтилишича, Раҳбар кадрларни баҳолаш маркази Давлат хизматини ривожлантиришни қўллаб-қувватлаш жамғармаси маблағлари,шартнома асосида хизматлар кўрсатишдан тушадиган тушумлар,халқаро молия институтлари ва хорижий ҳукумат молия ташкилотларининг грантлари ва техник кўмаклари, жисмоний ва юридик шахсларнинг ҳомийлик хайриялари, вақтинча бўш турган маблағларни белгиланган тартибда тижорат банклари депозитларига жойлаштиришдан тушадиган даромадлар ҳамда қонунчилик ҳужжатлари билан тақиқланмаган бошқа манбалар ҳисобидан молиялаштирилади.

Марказга ўз фаолиятини самарали амалга ошириши учун тегишли соҳа бўйича малакали мутахассислар ва экспертларни, шу жумладан, хорижий экспертларни белгиланган тартибда тўғридан-тўғри шартнома асосида жалб қилиш, Давлат хизматини ривожлантириш агентлиги ва бошқа буюртмачилар билан тўғридан-тўғри тузиладиган хизмат кўрсатиш шартномаси асосида фаолиятининг асосий йўналишлари доирасида даромад келтирадиган фаолият билан шуғулланиш, давлат фуқаролик хизматида замонавий рақамли технологияларни жорий этиш бўйича ахборот дастурларини ишлаб чиқиш каби ҳуқуқлар берилган.

Ҳукумат қарорида янги марказнинг манзили ўлароқ Тошкент шаҳри Чилонзор тумани Ислом Каримов кўчасидаги 55-уй (Тошкент шаҳар ҳокимлиги ҳузуридаги “Муниципал активларни бошқариш маркази” ДУКга тегишли бино) кўрсатилган.

Ўзбекистонда 12 та мактабгача таълим ташкилотида Kokoro lingua платформаси ёрдамида бепул француз тилини ўқитиш йўлга қўйилади.

Мактабгача ва мактаб таълими вазирлиги маълумотига кўра, вазир Ҳилола Умарова Францияда бўлиб ўтган Халқаро Франкофония ташкилотининг 19-саммити доирасида Kokoro lingua компанияси асосчиси Натали Ласслет билан бу борада келишув имзолаган.

Kokoro lingua 4-8 ёшдаги болаларга чет тилларни ўргатишга мўлжалланган халқаро онлайн таълим платформасидир. Дарслар асосан видео орқали, ўйин форматида ташкил этилади.

Мактабгача ва мактаб таълими вазирлиги Ниццадаги Франкофония университети билан педагогларнинг малакасини ошириш бўйича ҳам битим имзолаган. Унга кўра, 2025 йил давомида 200 нафар ўзбекистонлик француз тили ўқитувчилари грант асосида Францияга малака оширишга юборилади.

Daryo.uz нашри қайдича, Ўзбекистонда француз тили 600 га яқин мактабда хорижий тил сифатида, 100 га яқин мактабда эса иккинчи хорижий тил сифатида ўқитилади.

Мамлакат таълим вазирлиги кейинги йилларда АҚШ билан ҳам инглиз тилини ўқитиш бўйича йирик лойиҳаларни амалга оширмоқда. Қўшма Штатлар кўмагида 10 мингдан зиёд мактаб учун юқори сифатли инглиз тили дарсликлари харид қилинган, 15 минг нафар инглиз тили ўқитувчиси малака ошириш дастурларида қатнашган.

Озодлик аввалроқ Ўзбекистон хорижда таҳсил олаётган талабалар сони бўйича дунёда бешинчи эгаллагани ҳақида хабар қилганди.

Экспертлар хорижда ўзбекистонлик талабалар сони ортиб бораётгани чет тилларни ўқитиш кўлами кенгайиши билан ҳам боғлиқ эканини айтади.

Бухоро шаҳрида яшовчи 28 ёшли Ш.Р. 3 яшар ўғлини калтаклаб, унга тан жароҳати етказган, бунинг оқибатида бола вафот этган.

Бош прокуратура матбуот котиби Ҳаёт Шамсутдиновнинг маҳаллий матбуотга билдиришича, жорий йилнинг 4 октябрь куни мазкур ҳолат юзасидан аёлга нисбатан Ўзбекистон Жиноят кодексининг 97-моддаси 2-қисми билан жиноят иши қўзғатилган ва у қамоққа олинган.

Ҳодисани ўрганган Xabar.uz нашрига кўра, аёл фарзандини тунги соат 01:00 ларда калтаклаган. Норасида бола талоқ ёрилиши оқибатида икки соатча қийналган ва соат 03:00 ларда жон берган.

Аёл Бухоро шаҳри Гулшан маҳалласида ижарада яшаб келган, турмуш ўртоғи эса Россия Федерацияда ишлайди.

Маълум бўлишича, қотилликда гумонланиб қамоққа олинган аёл олдин ҳам 5 яшар фарзандини калтаклаб ўлдирган. Ушбу жиноят ишини кўриб чиққан суд аёлнинг қилмишидан пушаймонлиги ва қарамоғида 1 ёшли фарзанди бўлгани важидан унга енгилроқ жазо тайинлаган. Аёл аввалги жинояти учун берилган жазо муддати тугамасдан туриб иккинчисига қўл ургани айтилмоқда.

Жорий йилнинг 9 июль куни Тошкент шаҳри Яшнобод туманида 30 ёшли эркак қонуний никоҳсиз яшаб келган хотини билан жанжаллашув ортидан аёлнинг биринчи турмушидан бўлган 3 яшар ўғлини чавақлаб ўлдирганди.

2022 йил 24 декабрь куни эса Самарқанд вилояти Оқдарё туманида яшовчи эркак хотини ва 5 ойлик боласини ўлдириб, сўнг ўзини осган эди.

Фарғона вилояти Қўштепа туманида яшаган 57 ёшли ватандош йўл-транспорт ҳодисаси оқибатида вафот этди.

“Миллий” телеканалининг “Миллар” дастури репортажида қайд этилишича, “Lacetti” автомобилини ҳайдаб кетаётган 30 ёшли шахс бошқарувни йўқотиб, уйи дарвозаси олдида турган эркакка келиб урилган. Оғир жароҳатланган жабрланувчи воқеа жойида вафот этган.

Ҳолат юзасидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган.

Маҳаллий матбуот Тошкент вилоятида рўй берган ЙТҲда яна бир пиёда ҳалок бўлгани ҳақида хабар берди.

Саккизинчи октябрь куни Олмалиқ шаҳрида “Nexia 3” ҳайдовчиси йўлнинг белгиланган қисмидан ўтаётган 50 ёшли пиёдани уриб юборган ва ҳодиса жойидан қочиб кетган.

Ўзбекистонда ҳар йили 2000-2500 киши ЙТҲ туфайли ҳаётдан бевақт кўз юмади. Жумладан, 2023 йилда авариялар оқибатида 2282 киши ҳалок бўлган, 9209 киши жароҳатланган. Жароҳатланганларнинг 1568 нафари, ҳалок бўлганларнинг эса 263 нафари болалардир.

Таҳлилларга қараганда, пиёдаларни уриб кетиш ҳолати кўпайган. Фаоллар йўллардаги бевақт ўлимлар сабаб соҳа масъулларининг истеъфосини ҳам талаб қилгани маълум.

Африканинг Руанда давлатида Марбург геморрагик иситмаси қайд этилгани ортидан Ўзбекистон Санитария-эпидемиология қўмитаси ватандошларни эҳтиёт чораларни кўришга чақирди.

Ушбу хасталикда ўлим даражаси 90 фоизга тенг экани айтилади.

“Марбург иситмасининг манбаи кўршапалаклар ҳисобланиб, улардан касаллик соғлом одамларга юқиши мумкин. Инфекцияга чалинган беморлардан ажраладиган биологик суюқликлар (қон, тупук, пешоб) билан бевосита алоқа қилиш, шунингдек, турли жисмлар юзалари орқали ҳам фаол тарқалиши мумкин”, дейилган хабарномада.

Қўмита огоҳлантиришига кўра, касаллик белгилари тўсатдан бошланади ва беморда юқори тана ҳарорати, кучли бош оғриғи, безовталик, мушакларда оғриқ, диарея, кўнгил айниши ва қайт қилиш ҳолатлари кузатилади. Касалликнинг бешинчи кунида кўкрак, орқа ва қорин бўшлиғида қонталаш тошмалар пайдо бўлиши мумкин.

Санэпидқўмита геморрагик иситма касаллигига гумон қилинган беморлар аниқланганда уни зудлик билан иҳоталаб, тиббиёт ходимларга мурожаат қилиш, беморнинг қони, тана суюқликлари ва ифлосланган юзаларга тегмаслик кераклигини эслатган.

Инфекция хуружи эҳтимоли сабаб маҳаллий ҳайвонларнинг чала пиширилган гўштини истеъмол қилмаслик, кўршапалаклар яшайдиган ғорларга бормаслик уқтирилган.

Россия пойтахти Москвада 8 октябрь куни бўлиб ўтган МДҲ Давлат раҳбарлари кенгаши мажлисида хавфсизлик ва барқарор тараққиётни таъминлаш билан боғлиқ вазиятга алоҳида эътибор қаратилган. Бу ҳақда Ўзбекистон президенти матбуот хизмати маълумот тарқатди.

Россия президенти раислигида ўтган саммитда Озарбайжон, Беларусь, Қозоғистон, Қирғизистон, Тожикистон, Туркманистон, Ўзбекистон ва Арманистон етакчилари қатнашган.

Қайд этилишича, учрашувда МДҲ мамлакатлари махсус хизматлари ва ваколатли идораларининг тизимли ҳамкорлигини йўлга қўйиш, таҳдидларга қарши курашиш усулларини такомиллаштириш, киберхавфсизликни таъминлаш соҳасида дастурий ҳужжатларни қабул қилиш муҳимлиги таъкидланган.

Расмий Тошкент Ўзбекистон ташаббуси билан 2025–2027-йиллар учун МДҲ давлатларининг Дерадикализация соҳасида ҳамкорлик дастури қабул қилинганини “саммитнинг муҳим натижаси” деб баҳолаган.

Машваратда интернет технологиялари ва “Катта маълумот” (Big Data) индустриясини ривожлантириш, рақамли ечимларни жадал жорий этиш, креатив иқтисодиёт, яшил энергетика ва ядро технологиялари, иқлим муаммолари каби йўналишларни қўллаб-қувватлаш муҳимлиги ҳам қайд этилган.

Москвадаги саммит Россия президенти Владимир Путиннинг туғилган кунига мўлжаллаб уюштирилган. Ҳар йили 7 октябрь куни Кремлга “дўст” мамлакатлар президентларининг Москвага бориб, Путинни шахсан табриклаб келиши ўзига хос анъанага айланиб улгурган.

Ўзбекистонда якка тартибдаги уй-жойлар ҳудудида қўшимча кўп қаватли тураржойлар қурилишига рухсат берилиши натижасида аҳолининг шикоятлари кундан-кун кўпаймоқда.

Қурилиш ва уй-жой коммунал хўжалиги вазирлиги матбуот хизмати маълумотига кўра, 7 октябрь куни вазир в.б. Шерзод Ҳидоятов бошчилигидаги йиғилишда шу каби муаммоли ҳолатларга эътибор қаратилган.

Қайд этилишича, низоли масалалар кўпроқ аҳоли яшаш уйлари билан оралиқ масофа сақланмаслиги оқибатида юзага келмоқда. Бундай зиддиятли вазиятлар Самарқанд, Фарғона ва Тошкент вилоятларида кескин ошган.

Вазирлик, шунингдек, ҳудудий Архитектура-шаҳарсозлик кенгашига киритилган лойиҳаларни кўриб чиқиш ва келишиш муддатлари сурункали равишда бузилаётганини ҳам тан олган.

Туман (шаҳар) қурилиш бўлимлари объектнинг ихтисослигини ўзгартиришга рухсатнома беришда ҳам хатоларга йўл қўйгани аниқланган.

Ижтимоий тармоқлардан аҳолининг ноқонуний қурилишлардан норози бўлиб йўллаган мурожаатларини кўплаб топиш мумкин.

Экспертларга кўра, катта пул айланадиган қурилиш соҳасида коррупция илдиз отиб кетган.

Жорий йил январь ойида президент Шавкат Мирзиёев қурилишни “коррупциясиз соҳа”га айлантириш учун бир қатор вазифаларни белгилаганди.

Жамоатчилик фаоллари Ўзбекистонда қурилиш сифатига доир талабларни кучайтириш зарурлигини айтиб келишади.

Жорий йил 1 октябрь ҳолатига кўра Ўзбекистоннинг олтин-валюта захира активлари 41,14 миллиард долларни ташкил этмоқда.

Марказий банк ҳисоботида келтирилишича, сентябрь ойида захиралар 1,98 миллиард долларга ёки 5 фоизга ошган.

Маҳаллий нашр қайдича, бу ҳолат 2013 йилдан бери юритиладиган статистик маълумотларнинг бутун даври учун навбатдаги рекорд кўрсаткичдир.

Марказий банк захиралари кетма-кет учинчи ой ўсиб бормоқда. Июль (1,06 миллиард доллар) ва август (1,75 миллиард доллар) ойларида ҳам ижобий натижа қайд этилган.

Сентябрь ойида олтин котировкалари унцияси учун 2502,8 дан 2647,1 долларга ошгани қўл келган.

Олтин-валюта захираси ҳар бир мамлакатнинг “қора кун”га асралган мулки саналади.

Аввалроқ Озодлик жорий йилнинг 1 августига келиб Ўзбекистоннинг олтин-валюта захиралари 37 миллиард 402 миллион 200 минг АҚШ долларини ташкил қилгани ҳақида хабар қилган эди.

Ўзбекистонда жорий йилнинг 9 ойи мобайнида шошилинч тиббий ёрдам хизматига 9 миллион 958 минг 507 та чақириқ қайд этилди. Бу ҳақда Республика тез тиббий ёрдам маркази директори Абдувоитжон Ғафуров маълум қилган.

Қайд этилишича, чақирувларнинг 7 миллион 107 мингтасини шошилинч бетобликлар, 2 миллион 531 мингтасини сурункали касалликлар ва 64 минг 446 тасини туғуруқлар ташкил қилган.

Энг кўп мурожаатлар Фарғона (1 миллион 40 минг 546 та), Андижон (1 миллион 13 минг 131 та) вилоятлари ҳамда Тошкент шаҳрида (1 миллион 7 минг 327 та) кузатилган.

Нуфуси нисбатан оз Навоий (296 минг 46 та), Сирдарё (335 минг 10 та), Жиззах (399 минг 342 та), Бухоро (482 минг 325 та) каби вилоятларда камроқ чақириқ қайд этилган.

Республика тез тиббий ёрдам маркази директорига кўра, мамлакат бўйлаб 2 минг 853 та тез ёрдам бригадаси фаолият юритмоқда.

Расмий статистика мамлакатда “тез ёрдам”га мурожаатлар йил сайин ошиб бораётганидан далолат беради. “103” 2022 йилда хизматига 13 миллион, 2023 йилда эса 13 миллион 522 мингта қўнғироқ келиб тушганди.

Футбол бўйича Ўзбекистон миллий жамоаси ЖЧ-2026 3-босқич саралашида Эрон ва БААга қарши ўйинларни бош мураббийсиз ўтказади.

Ўзбекистон Футбол ассоциацияси матбуот хизмати қайдича, Сречко Катанец “саломатлиги ёмонлашгани сабабли шифокорлар тавсиясига кўра” жамоани вақтинча бошқара олмайди.

Икки муҳим учрашувга жамоани ёрдамчи мураббийлар Алеш Чех ҳамда Владо Радманович тайёрлайди.

Ўзбекистон 10 октябрь куни Эрон, 15 октябрда эса БАА вакилларига қарши тўп суради.

Словениялик Сречко Катанец 2021 йил август ойида Ўзбекистон миллий жамоаси бош мураббийи этиб тайинланган. У билан 2025 йилгача шартнома имзоланган.

Маҳаллий матбуот Сречко Катанец учинчи марта бетоблиги важидан терма жамоага кўмак бера олмаётганига эътибор қаратган. У айнан “соғлиғида юзага келган муаммолар” сабаб 2023 йил июнь ойида Туркманистонга қарши, 2024 йил март ойида эса Ҳонконгга қарши ўйинларни ўтказиб юборган.

“Daryo.uz” нашрининг ёзишича, словениялик мутахассис ўтган йил 5 июнь куни ўтказилган матбуот анжуманида “агар учинчи марта соғлиғи сабаб термани тарк этса, бошқа қайтиб келмаслиги”ни айтган.

Қашқадарё вилояти Қарши туманидаги автомобилларга суюлтирилган газ тўлдириш шохобчасида 7 октябрь куни портлаш содир бўлди.

Фавқулодда вазиятлар вазирлиги маълумотига кўра, душанба куни соат 15:45 да “Камаз-512” машинасидан сақлов идишига газ қуйиш вақтида газ-ҳаво аралашмасининг чақнаши рўй берган. Бунинг оқибатида ёнғин юзага келган.

Вазирлик қайдича, 4 та ёнғин-қутқарув экипажи соат 15:56 да ҳодиса жойига етиб борган ва 16:45 да ёнғинни тўлиқ ўчирган.

Ёнғин оқибатида шохобча биносининг том қисми зарарланган.

ФВВ ҳодиса оқибатида жароҳатланган ва вафот этганлар йўқлигини айтган. Ёнғин сабаби ва моддий зарар кўлами аниқланмоқда.

Газ тўлдириш шохобчасида содир бўлган портлаш видеоси аввалроқ ижтимоий тармоқларда пайдо бўлган эди.

Ўзбекистонда газ тўлдириш шохобчаларида портлаш рўй бериши камёб ҳодиса эмас. Масалан, 2023 йил 25 февраль куни Самарқанд шаҳридаги шохобчада Nexia-3 машинасига ўрнатилган баллон портлаб кетган, оқибатда “заправка” ишчиси 43 ёшли М.З. воқеа жойида вафот этганди.

Ўзбекистон президенти Шавкат Мирзиёев 7 октябрь куни амалий ташриф билан Москва шаҳрига жўнаб кетган.

Президент матбуот хизмати маълумотига кўра, Мирзиёев РФ пойтахтида Мустақил давлатлар ҳамдўстлигига аъзо давлатлар раҳбарларининг галдаги саммитида иштирок этади.

Россия президенти Владимир Путиннинг туғилган кунига мўлжаллаб уюштирилаётган Москвадаги саммитда Ўзбекистон президентидан ташқари МДҲ иштирокчиси бўлган қатор давлатларнинг раҳбарлари ҳам қатнашиши кутилмоқда.

Аслида ҳар йили Путин туғилган кунида Кремлга “дўст” мамлакатлар президентларининг Москвага бориб, Россия президентини шахсан табриклаб келишлари ўзига хос анъанага айланиб улгурган. Аввалги йиллардаги учрашувлар МДҲ, КХШТ ва Евросиё иқтисодий иттифоқига аъзо давлатлар раҳбарларининг учрашувлари шаклида ташкил этилганди.

Дейлик, ўтган йилнинг шу кунида Путин Ново-Огареводаги ўз қароргоҳида Тоқаев ва Мирзиёев билан биргаликда Россия газини Қозоғистон орқали Ўзбекистонга етказиб беришга бағишланган маросимда иштирок этган эди. 7 октябрь куни 72 ёшга тўлган Владимир Путин Россия Федерациясини қарийб чорак асрдан буён бошқариб келмоқда.

Наманган вилояти суди раиси ўринбосари – фуқаролик ишлари бўйича судлов ҳайъати раиси Абдураҳмон Сафоев ўзганинг эгалигида бўлган квартирани сохта ҳужжатлар билан ўз номига расмийлаштириб, бошқа бир одамга сотиб юборган бўлиши мумкин, дея хабар қилди “Kun.uz” нашри.

“Бу эҳтиёжимиздан ортиқча бўлган уй эди. Доимий яшамасак-да, йўлимиз тушганида бир кун-ярим кун туриб кетардик. Уста тушириб, таъмирлаётгандик, бошқа одам “документ” кўтариб келди. Шунда билиб қолдик. Ушбу ишга аралашган инсонларнинг ҳаммаси жавобгарликка тортиляпти”, деган Наманган шаҳри Алишер Навоий кўчасида жойлашган хонадоннинг ҳақиқий эгаси.

Судьялар олий кенгаши матбуот хизмати Сафоевга нисбатан хизмат текшируви ўтказилганини билдирган.

“Хизмат текшируви хулосаси муҳокама қилиниб, тегишли қарор қабул қилиш учун Судьялар олий малака ҳайъатига юборилган”, дейилган расмий изоҳда.

Кенгаш матбуот хизмати текширувда шикоятчининг важлари тасдиғини топган-топмаганига аниқлик киритмаган.

Озодлик жорий йилнинг 25 июль куни ҳуқуқ-тартибот идоралари ходимлари ўтказган махсус амалиётда иқтисодий ишлар бўйича Сурхондарё вилояти Қумқўрғон туманлараро суди судьяси С. А. фуқародан 3000 доллар пора олаётганида ушлангани ҳақида хабар қилганди. Ҳибсга олинган шахс аввалроқ “Ибратли судья” мукофотига сазовор бўлган.

Ўзбекистоннинг “Газли” ва “Хўжаобод” ерости газ омборларида қиш мавсуми учун 5,1 млрд куб метрдан ортиқ газ захираси жамланди, деб маълум қилди Энергетика вазири Жўрабек Мирзамаҳмудов YouTube’даги “Лолазор” подкастида.

Мулозим бу йил ўтган йилга нисбатан 1,1 млрд куб метр кўпроқ газ захираси йиғилганини урғулаган.

Ҳозирда мамлакатда “Газли” ва “Хўжаобод” ерости газ сақлаш омборидан фойдаланилмоқда. Мирзамаҳмудов маҳаллий блогерлар билан мулоқот мобайнида “Сўх” газ омбори бўйича эса ишчи гуруҳ тузилгани, ўрганиш ишлари олиб борилаётганини қайд этган. Мазкур омбор Қирғизистон ҳудудида жойлашган бўлиб, компрессорлар ва бошқа технологик ускуналар Ўзбекистон ҳудудида ҳисобланади.

Аввалроқ “Газли” қувватини 2025 йилга қадар икки баробар ошириб, 3 млрд куб метрдан 6 млрд куб метргача ошириш режаси эълон қилинганди. Вазирга кўра, ҳозирча омбор қуввати 4,5 млрд куб метргача кенгайтирилган.

Маълумот ўрнида, 2023 йили куз-қишга ҳозирлик доирасида “Газли” ва “Хўжаобод” омборлари 98 фоизга тўлдирилгани маълум қилинган, аммо ўтган йили ҳам совуқ мавсум газ тақчиллиги билан ёдда қолганди.

Умуман, кейинги уч-тўрт йилда мамлакатда куз-қиш мавсумида газ тўлдириш шохобчаларида турнақатор навбатлар пайдо бўлиши, ҳатто АЁҚШларда чекловлар жорий этилиши одатий ҳолга айланган.

Ўзбекистонда гиёҳвандлик воситалари, уларнинг аналоглари ҳамда психотроп моддаларни телекоммуникация тармоқлари ва интернетда тарқатиш, реклама қилиш, намойиш этиш учун жавобгарлик белгиланди.

“Ҳуқуқий ахборот” каналининг маълум қилишича, Ўзбекистон президенти томонидан 5 октябрь куни имзоланган 971-сонли қонунга биноан Жиноят, Жиноят-процессуал кодекслари ҳамда Маъмурий жавобгарлик тўғрисидаги кодексга тегишли ўзгартириш ва қўшимчалар киритилди.

Гиёҳвандлик воситалари, уларнинг аналоглари ва психотроп моддаларни қонунга хилоф равишда муомалага киритиш жиноятини вояга етмаганларни жалб қилган ҳолда содир этганлик учун ҳам жавобгарлик кучайтирилмоқда.

Адлия вазирлиги томонидан юритиладиган “Ҳуқуқий ахборот” канали билдиргисида бангивор моддаларнинг интернетдаги тарғиботи учун қандай жазо кўзда тутилгани очиқланмаган.

Расмий маълумотда қайд этилишича, гиёҳвандлик воситалари, уларнинг аналоглари ёки психотроп моддалар ҳисобланмайдиган алоҳида тоифадаги кучли таъсир қилувчи моддаларни ўтказиш мақсадини кўзламай қонунга хилоф равишда тайёрлаш, олиш, сақлаш, ташиш ёки жўнатиш каби ҳаракатлар учун БҲМнинг 50 бараваригача миқдорда жарима, 360 соатгача мажбурий жамоат ишлари, 3 йилгача ахлоқ тузатиш ишлари, 1 йилдан 3 йилгача озодликни чеклаш, 3 йилгача озодликдан маҳрум қилиш каби жиноий жазолар кўзда тутилган.

Кейинги йилларда Ўзбекистонда ўсмирлар ва ёшлар орасида психотроп моддалар истеъмолига ружу қўяётганлар кўпайгани борасида хавотирлар мавжуд. Жамоатчилик бангиликка қарши курашни кучайтиришни таклиф этиб келади.