AQSH fuqarolik atom energiyasi texnologiyalari hamda muhim foydali qazilmalar yo‘nalishida sarmoya kiritish uchun O‘zbekiston bilan hamkorlik qilish istagida.
Davlat departamenti matbuot xizmati qaydicha, O‘zbekiston tashqi ishlar vaziri Baxtiyor Saidov va AQSH davlat kotibi Marko Rubioning o‘tgan hafta bo‘lib o‘tgan telefon muloqotida shu masala ham muhokama etilgan.
Marko Rubio Baxtiyor Saidov bilan suhbatda Vashington O‘zbekistonning mustaqilligi, suvereniteti va hududiy yaxlitligini qo‘llab-quvvatlashini yana bir karra ta’kidlagan.
Vashington, shuningdek, Toshkentga noqonuniy migratsiyaga chek qo‘yish va terrorizmga qarshi kurashdagi hamkorlik uchun minnatdorlik bildirgan.
Avvalroq O‘zbekiston tashqi ishlar vazirligi tarqatgan xabarnomada “ikki va ko‘p tomonlama aloqalarning muhim mavzulari” muhokama qilingani bildirilgani holda, atom energiyasi texnologiyalari hamda muhim foydali qazilmalar masalalari ko‘tarilgani ochiqlanmagan edi.
Ozodlik avval xabar qilganidek, O‘zbekiston 2024-yil iyun oyida “Rosatom” davlat korporatsiyasi bilan kichik quvvatli AES qurilishiga doir hujjatni imzolagan. 330 MVt quvvatga ega stansiya (har biri 55 MVt quvvatga ega oltita reaktor) Jizzax viloyati hududida barpo etiladi.
O‘zbekiston Rossiya bilan birgalikda KQAES qurishga kirishayotgani mahalliy faollarning e’tiroziga sabab bo‘lgan. Jamoatchilik bu loyiha Kreml qo‘lida O‘zbekistonga qarshi “shantaj quroli” bo‘lib qolishidan xavotir bildirgan.
AQSHning O‘zbekistondagi elchisi Jonatan Xenik ham O‘zbekiston hukumatini AES qurilishida texnik hamkorlarni tanlashda o‘ta ehtiyotkor bo‘lishga chaqirgandi.