YouTube videoxostingi ma’muriyati Ukrainadagi urushni faol dastaklab kelayotgan rossiyalik qator qo‘shiqchi va artistlarning kanallarini bloklab qo‘ydi. Ular orasida Shaman (Yaroslav Dronov), Grigoriy Leps, Polina Gagarina, Oleg Gazmanov, Yuliya Chicherina kabi ashulachilar bor.
Avvalroq dunyodagi eng yirik musiqiy striming xizmati bo‘lgan Spotify bu ijrochilar sahifalarini o‘chirib tashlagan edi.
Blokirovkaga Ukrainadagi urush bo‘yicha xalqaro sanksiyalar doirasida AQSH va Yevropa Ittifoqi tomonidan rossiyalik artistlarga qarshi kiritilgan cheklov choralari sabab bo‘lgan.
Yevropa Ittifoqi joriy hafta boshida Polina Gagarina va Shamanga qarshi sanksiya kiritgandi. Lepsga qarshi cheklovlar YI tomonidan 2022-yil dekabrida kiritilgan. Chicherina, Gazmanov va prezident Putinning sevimli guruhi bo‘lgan “Lyube” lideri Nikolay Rastorguyevlar esa 2022-yil oktyabridayoq YIning sanksiya ro‘yxatiga tushgan edi.