Wildberries маркетплейсининг Москвадаги офиси олдида содир бўлган отишмада бир неча киши яраланган.

Ширкат матбуот хизмати қайдича, Wildberries асосчиси Татьяна Бакальчукнинг эри Владислав қўриқчилари билан бирга ташкилот офисига киришга ҳаракат қилган. У ерда содир бўлган воқеа “бинога ноқонуний киришга уриниш” ўлароқ баҳоланган.

Владислав Бакальчук “кенг кўламли провокация” юз берганини билдирган – у ширкат офисига Wildberries учун қурилаётган янги омборлар молиялаштирилишини тўхтатиш бўйича музокараларнинг галдаги раундига келганини иддао қилмоқда.

“Мен ширкат офисига ўз ҳамкасбларим билан келдим, бироқ киришдаёқ қўриқчилик хизмати ва менга нотаниш бўлган кишилар томонидан ҳужумга учрадим, улар қуролли тўқнашув келиб чиқишига сабаб бўлишди. Можаро давом этаётган пайтда бирдан ўқ овозлари янгради, ҳамкасбларимдан бири яраланди”, дея билдирган Владислав Бакальчук.

Татьяна Бакальчук Владислав Бакальчук, Сергей Ануфриев ва Владимир Бакин бошчилигидаги кишилар гуруҳи Wildberries’нинг Москвадаги офисларини эгаллаб олишга уринишганини билдирган.

“Қуролланган гуруҳнинг гўё музокараларга келганига оид баёнот қулоққа бемаъниликдай эшитилади, чунки ҳеч ким билан ҳеч қанақа музокара ҳақида келишув бўлган эмас”, деб ёзган Татьяна Бакальчук ўз телеграм-каналида.

Кремлга алоқадорлиги тахмин қилинган “Троллар фабрикаси” АҚШ президенти лавозимига номзод Камала Ҳаррисни обрўсизлантиришга қаратилган фейк видеоларни тарқатмоқда. Бу ҳақда Microsoft ширкатининг сўнгги ҳисоботида айтилган.

Microsoft қайдича, россиялик троллар АҚШнинг амалдаги президенти Жо Байден сайловолди пойганидан чиққанидан бир ой ўтиб – август ойи охиридан бошлаб фаоллашган. Ҳисоботда Storm-1516 ва Storm-1679 деб номланган тролларнинг икки гуруҳи ҳақида сўз борган. Storm-1516 гуруҳи Ҳаррис ҳақида иккита фейк видео тайёрлаб тарқатган, уларнинг ҳар бири миллионлаб марта кўрилган. Биринчи роликда, унинг тагматнидан келиб чиқилса, “Ҳаррис тарафдорлари унинг рақиби Дональд Трампни қўллаб митингга чиққанлардан бирига ҳужум қилишмоқда”. Иккинчи ясама роликда эса унинг қаҳрамони бўлган аёл 2011 йилда Ҳаррис уни босиб кетгани, натижада у фалаж бўлиб қолганини иддао қилган. Мазкур видеоларни троллар фейк роликлари ёйинланишидан бор-йўғи бир неча кун олдин яратилган ва ўзини ОАВ сифатида тақдим этаётган сайтда ёйинлашган.

Париждаги Олимпиада ҳақида контент ишлаб чиқариш билан шуғулланиб келган Storm-1679 гуруҳи ҳам Ҳаррис сиёсати ҳақида иккита сохта видео тайёрлаган. Улардан бирида Нью-Йоркдаги реклама лавҳаси тасвирланган бўлиб, лавҳада “Бутун Америка бўйлаб минглаб боланинг олати кесилишини кутмоқда. Ҳаррис учун овоз бер! У, сизга ёқадими-йўқми, фарзандларингиз учун жинси алмаштириш бўйича бепул жарроҳлик амалиётини ваъда қилмоқда. Ўғил болаларни яна қизларга айлантирамиз!” деб ёзилган фейк ташвиқот намойиш қилинган. Ролик тўрт соат ичида X ижтимоий тармоғида 100 минг мартадан кўпроқ марта кўрилган.

Microsoft кремлпараст эски ва янги “троллар фабрикаси” АҚШда 5 ноябрь куни бўлиб ўтадиган президент сайлови арафасида ясама роликларни, шу жумладан сунъий интеллектдан фойдаланган ҳолда яратилган роликларни тарқатишда давом этиши кутилаётганини қайд этган. Microsoft ҳисоботида бу каби “троллар фабрикаси” Эрон ва Хитойда ҳам фаолият олиб бораётганига тўхталинган.

Ливанда эронпараст “Ҳизбуллоҳ” гуруҳи (АҚШ ва бошқа қатор мамлакатларда террор ташкилоти деб тан олинган) аъзолари томонидан шифрланган ички хабарлашма учун алоқа жиҳозлари бир пайтнинг ўзида портлаган. Бу ҳақда Исроилнинг Ynet портали хабар қилди.

Журналистларга кўра, гуруҳ томонидан смартфон ўрнида қўлланилган рация ва пейжерлар пойтахт Байрут, Ливан жануби ва Бақо водийсида масофадан туриб портлатилган.

“Ҳизбуллоҳ” вакили Reuters агентлигига бунинг “ташкилот ўз тарихида дуч келган энг йирик хавфсизлик бузилиши” эканини билдирган.

Дастлабки маълумотларга кўра, портлашлар чоғида бир ёш бола дохил тўққиз киши ҳалок бўлган. Улардан қанчаси “Ҳизбуллоҳ” аъзоси эканига аниқлик киритилмаган.

Ҳодиса пайтида “Ҳизбуллоҳ”нинг юқори лавозимли мулозимлари ҳам жароҳат олган. Al Hadath нашрининг ёзишича, ташкилотнинг Ливан парламентидаги вакили Али Аммарнинг ўғли ўлдирилган.

“Жабрланганлар орасида Эроннинг Ливандаги элчиси ҳам бор”, дея хабар қилди “Ал-Жазира”. Портлаш чоғида ё элчининг ҳам ёнида шундай жиҳоз бўлган, ёки “Ҳизбуллоҳ” вакиллари билан мулоқот қилаётган бўлган,

Ливан нашрларига кўра, эронлик дипломатнинг ёнида пейжер бўлмаган. Иддаога кўра, пейжер элчининг дўстларидан бирининг ёнида бўлган.

The Wall Street Journal нашри ўз манбаларидан олинган маълумотга таянган ҳолда, портлаган пейжерлар “Ҳизбуллоҳ” гуруҳи аъзоларининг қўлига яқинда теккан янги жиҳозлардан бўлганини ёзмоқда. Гуруҳ вакили тахминига кўра, пейжерлар вирусли бўлган, вирус аввал жиҳознинг қизиши, кейин эса портлашига сабаб бўлган бўлиши мумкин.

“Ҳизбуллоҳ” гуруҳи Исроил махсус хизматлари кузатувидан халос бўлиш учун смартфонлардан фойдаланишни бас қилган эди.

Эрон нашрлари содир бўлган воқеада Исроилни айбламоқда. “Ҳизбуллоҳ” ҳодисадан кейинги ўзининг илк баёнотида Исроилни айбламаган ва текширув ўтказилишини билдирган. Кейинроқ гуруҳ портлашлар учун масъулиятни “исроиллик душман”га юклаган ва бунга жавоб берилишини билдирган.

“Исроил хавфсизлик хизматлари “Ҳизбуллоҳ” тез орада ҳужумга жавоб қайтариши мумкинлигини истисно қилмаяпти”, дея хабар қилган Исроилнинг “Вести” нашри мамлакатда жанговарлик ҳолати кучайтирилганини қўшимча қилган.

Sky News Arabia манбаларига кўра, алоқа жиҳозлари детонациясига Исроилнинг “Моссад” разведка хизмати алоқадор бўлиши мумкин. Нашр манбасининг айтишича, “Моссад” пейжерлар аккумуляторига портлаш хавфи бўлган унсурлар жойлаштирган, улар эса жиҳоз қизиган пайтда детонацияга сабаб бўлган.

“Озодлик” радиосининг Исроилдаги манбаси аппаратларга портлаш мосламаси жойлаштирилган бўлиши мумкинлиги тахмин қилган, бироқ, манбага кўра, жиҳозлар ёппасига портлагани эътиборга олинса, бу ишни амалга ошириш ўта мушкул.

АҚШ Давлат департаменти Қўшма Штатларнинг Ливандаги нохуш ҳодисага ҳеч қанақа алоқаси йўқлигини ва бундай воқеалар содир бўлиши мумкинлиги ҳақида огоҳлантирилмаганини билдирган.

БМТ вакили эса ташкилот портлашлар ҳақида етарли маълумотга эга эмаслиги, бироқ тинч аҳоли вакиллари қурбон бўлганини қоралашини қайд этган.

Байрутдаги портлашлар билан бир вақтнинг ўзида Дамашқда “Ҳизбуллоҳ” автомобили портлагани ҳақида маълумот келиб тушган.

“Ташкилотнинг тўрт нафар аъзоси яраланди”, дея маълум қилган қароргоҳи Британияда бўлган Сурия инсон ҳуқуқлари маркази директори Al Hadath телеканалига. Дамашқдаги мобил жиҳозлар детонациясидан 14 киши жароҳат олган.

Кейинги йил бошидан Россиянинг Москва вилоятида мигрантларга кўплаб фаолият соҳаларида ишлаш тақиқланади.

“1 январдан алкоголли ичимлик ва тамаки савдосига, кўчма савдо объектларида кўча таомлари сотишга, ижтимоий хизматларга ҳамда спорт, маданият, ҳордиқ, соғлиқни сақлаш ва таълим соҳаларига патент асосида хорижий ишчи кучини жалб қилишга тақиқ амал қила бошлайди”, дейилган Москва вилояти ҳукумати матбуот хизмати хабарномасида.

Москва вилояти ҳукумати раисининг ўринбосари Наталья Маслёнкина бу борада изоҳ бераркан, расмийлар қарори маҳаллий аҳолининг хорижликлар ишидан шикояти ошгани билан боғлиқлиги ва “муҳтамал зиддиятларни камайтириш”га хизмат қилиши кераклигини билдирган. Маслёнкинага кўра, келажакда Москва вилояти ҳам “Россиянинг патент бўйича ишлашга тўлиқ тақиқ киритилган 22 та минтақасига қўшилишни истайди”.

Аввалроқ “Агентство” нашри Россия минтақаларининг учдан бир қисмида мигрантлар фаолиятига чекловлар киритилгани ҳақида хабар қилган. Хориждан келганларга кўпроқ таксида ишлаш тақиқланмоқда. Шу туфайли, “Яндекс Go” хизмати раҳбарларидан бири бўлган Антон Петраков тахминига кўра, 2024 йил охирига бориб Россияда такси ҳайдовчилари танқислиги 130 минг кишини ташкил қилади. Петраковга кўра, бу муаммо сабабли йўлкира нархлари “ўнлаб фоизгача” ошиб кетиши мумкин.

Бирлашган Миллатлар Ташкилоти Курск вилоятининг ҳозирда Украина Қуролли кучлари назорати остида бўлиб турган қисмида гуманитар миссия ташкил қилишга тайёр. Бунинг учун халқаро ташкилотга Россиянинг розилиги керак бўлади. Бу ҳақда БМТ бош котибининг матбуот котиби Стефан Дюжаррик маълум қилган.

Аввалроқ Украина Ташқи ишлар вазирлиги Курск вилоятининг украиналик ҳарбийлар назорати остида бўлган ҳудудларда гуманитар ҳаракат чораларига қўшилиш илтимоси билан БМТ ва Халқаро Қизил хоч қўмитасига расман мурожаат қилган эди.

Ўз навбатида, Қизил хоч қўмитаси вакили Галина Балзамова РИА “Новости” агентлиги билан суҳбатда ташкилот ходимлари Украина Қуролли кучлари томонидан эгаллаб олинган ҳудудларга ташриф буюришга тайёрлиги, бироқ бу иш урушаётган ҳар иккала томондан хавфсизлик кафолати берилган тақдирдагина амалга ошиши мумкинлигини билдирган.

Россиялик расмийлар БМТ ва Қизил хоч баёнотлари юзасидан изоҳ беришган эмас. Украина ТИВ баёнотини эса Москва “провокация” деб атаган. Кремль матбуот котиби Дмитрий Песков ҳар иккала ташкилотнинг Киев баёнотига “оқилона баҳо” беришига умид билдирган.

Курск вилоятининг Украина Қуролли кучлари томонидан эгаллаб олинган ҳудудларида, турли маълумотларга кўра, мингга яқин тинч аҳоли вакили қолаётган бўлиши мумкин.

Meta ширкати ўз платформаларида (Facebook, Instagram ва Treads ижтимоий тармоқлари ҳамда WhatsApp мессенжери) Кремль назорати остидаги RT ва “Россия сегодня” медиагуруҳи эгалик қилган Россия давлат оммавий ахборот воситалари саҳифаларини блоклаб қўймоқчи. Бу ҳақда Reuters агентлиги корпорация баёнотига таянган ҳолда хабар қилди.

Баёнотда бу қарор юқорида зикр этилган ОАВ “интернетда яширин таъсир операцияларини ўтказиш учун алдов тактикасидан фойдаланганлари” ҳамда “хорижий аралашув билан боғлиқ фаолият” олиб борганлари туфайли қабул қилингани қайд этилган. Аккаунтлар блокировкаси яқин кунлар ичида бошланади.

Reuters қайдича, бу тақиқ дунёдаги энг йирик ижтимоий медиаширкат томонидан Россия давлат оммавий ахборот воситаларига қарши “чораларни кескин кучайтирилгани”ни англатади. Аввалроқ Meta реклама блокировкаси ва постлар қамровини кичрайтириш каби унча кескин бўлмаган қадамларни қўйган эди.

АҚШ расмийлари аввалроқ “Россия сегодня” медиагуруҳи, унинг директори Дмитрий Киселев, “ТВ-Новости” (RT телеканали ҳуқуқий шахси), шунингдек, “Евразия” ННТ ва унинг таъсисчиси Нелли Парутенкога қарши санкциялар жорий этган.

АҚШ Давлат котиби Энтони Блинкен “Россия сегодня” ва унга кирувчи “РИА Новости”, Sputnik ва RT Россия махсус хизматлари учун ишлашини билдирган. У мазкур нашрларни бутун дунё бўйлаб “дезинформация кампанияларида” иштирок этганликда айблаган.

Блинкенга кўра, RT телеканали Россия армияси учун пул тўплаган ва Молдовадаги сайловларга аралашган ҳамда пропагандистик канал ёйини Европа Иттифоқида тақиқлаганига қарамай, қароргоҳи Берлинда бўлган Red номли медиани бошқариб келмоқда.

Беларуснинг авторитар раҳбари Александр Лукашенко 16 сентябрь куни “экстремистик йўналишдаги” жиноятлар учун жазо муддатини ўтаётган 37 нафар маҳкумни афв қилиш тўғрисидаги фармонни имзолаган. Озодликнинг беларус хизмати хабарига кўра, афв қилинганларнинг олти нафари аёл, шунингдек, улар орасида пенсия ёшидаги ҳамда жиддий хасталикларга чалинган одамлар бор.

Александр Лукашенко матбуот хизмати сиёсий маҳбусларнинг озод этилишини “давлат томонидан кўрсатилган инсонпарварликнинг яна бир ишораси” деб атаган. Хабарномада афв қилинганларнинг барчаси “қилмишига пушаймон бўлиб, қонунларга риоя қилиб яшашни ваъда қилишган”и таъкидланган. Иддаога кўра, афв 17 сентябрь куни нишонланадиган Миллий бирдамлик куни муносабати билан эълон қилинган.

Бу сиёсий маҳбусларни афв қилиш бўйича июль ойидан буён Лукашенко томонидан имзоланган фармонларнинг тўртинчисидир. Июль ойи бошида 18 нафар мухолифатчи, август ойида 2020 йилдаги оммавий норозиликларда иштирок этгани ва “норозилик билан боғлиқ бошқа жиноятлар” содир этгани учун жазо муддатини ўтаётган 30 нафар маҳкум озод қилинган. Яна 30 киши сентябрь ойида афв қилинган. Уларнинг исмлари расман очиқланган эмас, Озодликнинг беларус хизмати улардан айримларини келтирган. Озод бўлганлар орасида таниқли мухолифатчилар ёки фаоллар қарийб бўлган эмас.

2020 йил августидаги сайловдан кейин Беларусь Марказий сайлов комиссияси Александр Лукашенко кетма-кетига олтинчи марта президентликка қайта сайланганини эълон қилган эди. Ўшанда мухолифат сайловда ўз номзоди Светлана Тихановская ғалаба қозонганини таъкидлаб, сайлов натижаларидан норозилик билдирган. Бутун мамлакат бўйлаб сайловдаги сохталаштиришларга қарши ва демократияни дастаклаш мақсадида оммавий норозилик намойишлари бошланган. Бу чиқишлар хавфсизлик кучлари томонидан шафқатсизларча бостирилган.

Ҳуқуқ фаолларига кўра, намойишларни тарқатиш чоғида камида саккиз киши нобуд бўлган. Расмийлар минглаб жиноят иши очишган. Мухолифат лидерлари дохил юзлаб одам узоқ муддатга озодликдан маҳрум қилинган.

Ҳуқуқбонлар маълумотига мувофиқ, ҳозирда Беларусдаги қамоқхоналарда мингдан зиёд сиёсий маҳбус сақланмоқда. Лукашенко улардан айримларини, хусусан оғир касалларни афа қилиш ҳақида қарор қабул қилинишини билдирган.

Июлдан сентябрга қадар Беларусь қамоқхоналаридан, расмий маълумотларга кўра, жами 115 нафар сиёсий маҳбус озод қилинган.

Афғонистонда ҳокимият тепасида ўтирган ва дунёдаги кўплаб мамлакатларда террор ташкилоти деб топилган “Толибон” ҳаракати болаларни полиомиелитга қарши эмлов жараёнини тўхтатиб қўйган. Бу ҳақда Бирлашган Миллатлар Ташкилоти маълумот тарқатди.

Афғонистон ва унга қўшни бўлган Покистон ўлим билан тугаши эҳтимоли бор бу касаллик ёйилишини тўхтатиш имкони бўлмаган икки мамлакат бўлиб ҳисобланади. Афтидан, толиблар қарори минтақадаги ва унинг хорижидаги бошқа мамлакатлар учун ҳам жиддий оқибатларга сабаб бўлади, деб ёзган Associated Press агентлиги.

Афғонистонда полиомиелитга қарши эмлаш тўхтатиб қўйилганига оид хабарлар сентябрь ойидаги эмлов кампанияси манзарасида келиб тушган. Толибларнинг бундай қарорга нима сабабдан келгани очиқланган эмас. Оммавий ахборот воситалари бу борада “Толибон” вакилларидан изоҳ олишолмаган.

Жорий йилда Жаҳон соғлиқни сақлаш ташкилоти Афғонистонда полиомиелитга оид 18 та ҳолатни тасдиқлаган. Ўтган йили касаллик юқтириб олиниши билан боғлиқ олтита ҳолат қайд этилган.

ЖССТ Афғонистонда эмлов ўтказилмаётгани аҳоли миграцияси юқорилиги сабабли Покистон учун хавф туғдириши мумкинлиги ҳақида огоҳлантирган.

Покистон Соғлиқни сақлаш вазирлиги вакили Associated Press ахборот агентлиги билан суҳбатда, агар эмлов кампанияси мунтазам ва ўзаро мувофиқлаштирилган ҳолда олиб борилмаса, полиомиелит вируси ҳар икки мамлакатда тарқалиб, болаларни нобуд қилишда давом этишини қайд этган.

Республикачилар партиясидан АҚШ президенти лавозимига номзод Дональд Трампга суиқасдда гумонланган Райн Рутга ноқонуний равишда қуролга эга бўлганлик айблови билдирилган. Бу ҳақда CNN хабар қилди.

Айблов икки банддан иборат бўлиб, уларнинг бири судланган бўла туриб ўқотар қурол сақлаганлик, иккинчиси эса серия рақами ўчирилган қурол сақлаганликдир.

Палм-Бич прокурори фикрича, Рутни очиқ-ойдин Трампга қарши жиноятда айблаш мушкул бўлади. Гумонланувчи муҳтамал суиқасд чоғида ундан 300 метрдан 500 метргача бўлган, бу Рут айнан собиқ президентни нишонга олганини тахмин қилиш учун жуда узоқ масофадир.

Мазкур иш бўйича тинглов 23 сентябрга белгиланган. Флорида штатининг Вест-Палм-Бич шаҳридаги гольф майдонида яқинда 15 сентябрь куни Дональд Трампга суиқасд уриниши ўлароқ кўрилган ҳодиса рўй бергани ҳақида Озодлик аввалроқ хабар қилган.

ОАВ хабарларига кўра, Рут аввал ҳам бир неча бор ҳуқуқбузарлик содир этган. У АҚШ нашрларига Афғонистон армиясининг собиқ аскарларини Украина Қуролли кучларида хизмат қилиш учун ёллашга урингани ва 2022 йилда бир неча ой Украина ҳудудида бўлгани ҳақида ҳам гапирган.

Суиқасднинг махфий хизмат агенти гольф майдонини ўраб турган буталар орасидан автомат тумшуғи чиқиб турганини кўргач, ўша томонга огоҳлантирувчи ўқ узгани ортидан олди олинган. Дональд Трамп ўша пайтда гольф ўйнаётган бўлган.

Рут автомобилда қочишга уринган, бироқ тез орада гувоҳлар кўмагида қўлга олинган. Гольф-клубни автойўлдан ажратиб турувчи панжарали тўсиқ ортидаги буталар орасидан мерган нишони ўрнатилган ярим автоматик милтиқ ҳамда видеокамера топилган.

Гумонланувчининг суиқасдга ундаган сабаб нима экани ҳозирча номаълум. Associated Press агентлиги маълумотига кўра, 2020 йилда у ижтимоий тармоқларда Дональд Трампни дастаклаши ҳақида ёзиб келган, бироқ сўнгги пайтларда Жо Байден ва Камала Ҳаррис тарафдорига айланган.

“Чегарасиз шифокорлар” халқаро ноҳукумат ташкилоти Россиядаги ўз фаолиятини тўхтатган. Ташкилот баёнотида бунинг мажбурий қадам бўлгани айтилган.

Август ойида “Чегарасиз шифокорлар” Адлия вазирлигидан унинг Россиядаги шуъбаси хорижий ноҳукумат ташкилотлари филиаллари ва ваколатхоналари реестридан чиқарилгани ва ташкилотнинг Россиядаги офисини ёпиш лозимлиги ҳақида хат олган.

Хабарларга кўра, Россия Адлия вазирлиги бунга расмий сабаб ўлароқ ташкилот филиалининг фаолияти низомга мувофиқ эмаслигини кўрсатган.

“Чегарасиз шифокорлар”нинг Россиядаги фаолияти учун масъул бўлган вакили Норман Ситали ташкилот Россиядаги ўз филиалини “юракда оғриқ билан” ёпаётганини ва агар кейинчалик имкон бўлса, ўз ишини тиклашдан мамнун бўлишини айтган.

“Чегарасиз шифокорлар” ташкилоти Россияда 32 йил давомида фаолият олиб борган. У Россия Соғлиқни сақлаш вазирлиги билан биргаликда Москва, Санкт-Петербург шаҳарлари, Архангельск, Иваново ва Кемерово вилоятлари, Чеченистон, Ингушетия ва Доғистонда ўз дастурларини амалга оширган. Улар сил касаллигини, айниқса унинг муолажаси қийин бўлган шаклларини даволаш ва олдини олиш, ОИВ, бошқа юқумли касалликлар, хатар гуруҳлари, шу жумладан мигрантлар билан ишлаш кабилар билан шуғулланишган.

Украинада уруш бошланганидан кейин “Чегарасиз шифокорлар” Украинадан келган қочқинлар ҳамда Россиянинг чегараолди вилоятларидан хавфсиз минтақаларга кўчган россияликларга тиббий ва гуманитар ёрдам бериб келишган.

Россиянинг Красноярск шаҳрида полиция маҳаллий бозорларда ўтказилган рейд чоғида 520 кишини қўлга олган.

Россия Ички ишлар вазирлигининг Красноярск ўлкаси бўйича бош бошқармаси маълумотига кўра, рейдлар чоғида хорижликлар томонидан миграция тартибини бузганлик, чегара тартибини бузганлик, мамлакатда ноқонуний юрганлик, ноқонуний ишлаганлик ва бошқа ҳуқуқбузарликлар бўйича 24 та маъмурий баённома тузилган.

Шаҳарнинг Шахтёрлар кўчасида жойлашган “Южний” (“Жанубий”) ва “Луч” (“Нур”) бозорларида кенг кўламли рейдлар бўлиб ўтган.

Рейд чоғида қўлга олинган мигрантлар оғзидан “жиноятлар содир этганликка алоқадорликни текшириш учун” сўлак намуналари олинган. Маҳаллий полиция вакиллари рейд пайтида миграцион қонунчиликни бузган ҳолда Красноярск ҳудудида бўлган Ўзбекистон, Озарбайжон, Тожикистон ва Қирғизистон фуқаролари ушланганини билдиришган. Полиция уларни маъмурий жавобгарликка тортмоқчи, камида етти кишини эса мамлакатдан чиқариб юбориш масаласи ҳал қилинмоқда.

Хабар қилинишича, рейд чоғида қўлга олинган 92 кишининг Россия фуқаролигини олгани аниқланган, уларнинг қўлига ҳарбий комиссариатга чақирув қоғози тутқазилган.

Полициячилар ва Федерал хавфсизлик хизмати (ФСБ) ходимлари ноқонуний миграция ташкил қилганлик эҳтимолига оид ишлар бўйича 50 та текширув материалини қайдга олишган.

Россияда сўнгги ойларда мигрантларга қарши кайфиятлар кучайгани ва қонунчилик кескинлашгани кузатилмоқда. Озодликнинг “Сибирь.Реалии” лойиҳаси қайдича, бу ҳолат айниқса Москва вилоятидаги “Крокус Сити Холл”даги терактлардан кейин кучайиб кетган. Россиялик терговчилар расмий тахминига кўра, мазкур ҳужумни тожикистонлик бир гуруҳ фуқаро содир этган.

Терактдан сўнг Россиянинг турли минтақаларида ҳуқуқ-тартиботчилар хорижликлар яшайдиган ва ишлайдиган жойларда рейдлар ўтказа бошлаганлар. Айрим ҳолатларда мигрантлар ҳарбий комиссариатларда қайддан ўтказилган. Шу билан бир пайтнинг ўзида Россияда миллатчилар “рейдлари” ҳам бошланиб кетган – бу “рейдлар” давомида улар мигрантларни ишдан бўшатиш ва қизларнинг рўмолларини ечиштиришни талаб қилишган.

2023 йилнинг октябрь ойида Россия Давлат думасига хорижликларга бутун мамлакат бўйлаб мактабларда, фармацевтика соҳасида, давлат тиббиёт муассасаларида, такси ва юк ташишда ишлашни тақиқлаш кўзда тутилган қонун лойиҳаси киритилган.

2023 йил ноябрида Давлат думаси спикерининг ўринбосари Пётр Толстой “Россияда мигрантларга нисбатан позициянинг пассивлиги” юзасидан таассуф билдирган эди. Ўшанда у айрим постсовет республикаларидан келганларга курьер, такси ҳайдовчиси ва сотувчи бўлиб ишлашни тақиқлашни таклиф қилган эди.

АҚШ Федерал қидирув бюроси 15 сентябрь куни Флорида штатининг Вест-Палм-Бич шаҳридаги гольф майдонида содир бўлган отишма бўйича тергов олиб борилаётганини маълум қилди. Ўша пайтда АҚШ собиқ президенти ва республикачилар партиясидан президентликка номзод Дональд Трамп ўша ерда бўлганини билдирган терговчилар сиёсатчига нисбатан суиқасднинг олди олинганини айтишмоқда.

Қайд этилишича, суиқасдда гумонланган шахс ушланган. Матбуот хабарларига кўра, қўлга олинган шахс 58 ёшли Раян Рут бўлиб, у аввал бир неча марта ҳуқуқбузарлик содир этгани маълум.

Рут 2023 йилда The New York Times газетасига интервью бериб, собиқ афғон армияси аскарларини Украина Қуролли Кучларида хизмат қилиш учун ёллашга ҳаракат қилгани ва 2022 йилда бир неча ой Украинада бўлгани ҳақида гапирган.

Гумонланувчининг суиқасдга ундаган сабаб нима экани ҳозирча номаълум. Associated Press агентлиги маълумотига кўра, 2020 йилда у ижтимоий тармоқларда Дональд Трампни дастаклаши ҳақида ёзиб келган, бироқ сўнгги пайтларда Жо Байден ва Камала Ҳаррис тарафдорига айланган.

Суиқасднинг махфий хизмат агенти гольф майдонини ўраб турган буталар орасидан автомат тумшуғи чиқиб турганини кўргач, ўша томонга огоҳлантирувчи ўқ узгани ортидан олди олинган. Дональд Трамп ўша пайтда тўрт юз метр нарида гольф ўйнаётган эди. Гумонланувчи машинада қочишга уринган, бироқ тез орада гувоҳлар кўмагида қўлга олинган. Буталар орасидан ярим автоматик мерганлар милтиғи ҳамда видеокамера топилган.

Бунинг ортидан АҚШдаги бир неча ОАВнинг ҳуқуқ-тартибот идораларидаги манбалари ҳодиса собиқ президентга суиқасдга уриниш ўлароқ тергов қилинаётганини тасдиқлашган.

Дональд Трамп ўз тарафдорларига ёзган электрон хатида ҳаёти учун хавф йўқлиги, ўзини яхши ҳис қилаётган ва “ҳеч қачон таслим бўлмаслиги”ни билдирган.

Трампнинг президентлик пойгасидаги рақиби, вице-президент Камала Ҳаррис “Америкада зўравонликка жой йўқ” дея баёнот берган. АҚШ президенти Жо Байден эса собиқ президент хавфсизлигини таъминлаш учун зарур бўлган барча ресурсларни ажратиш ҳақида топшириқ берган.

Дональд Трампга қарши 13 июль куни Пенсилваниядаги сайловолди ташвиқоти митинги чоғида ҳам суиқасд уюштирилган бўлиб, ўшанда у қулоғидан енгил жароҳат олган эди. Ўшанда суиқасдни уюштирган Пенсильвания штатида яшовчи Томас Мэттью Крукс экани айтилган, бироқ у отиб ўлдирилгани учун суиқасдни нима сабабдан уюштиргани номаълумлигича қолган. Крукс отиб ўлдирилишидан олдин митингга ташриф буюрганлардан бирини ўлдиришга ва яна бир неча кишини яралашга муваффақ бўлганди.

Марказий ва Шарқий Европада расмийлар ва маҳаллий аҳоли ичидан бўлган кўнгиллилар шиддатли жала ва у туфайли юзага келган тошқинлар оқибатига қарши курашиш уринишларини давом эттиришмоқда. Бир неча мамлакатда кўплаб аҳоли пунктларини сув босган, қурбонлар бор.

Руминия расмийлари ёғингарчилик натижасида мамлакатда камида тўрт киши ҳалок бўлгани, яна икки киши бедарак кетганини билдиришган. Чехияда тўрт киши бедарак йўқолган. Польшада бир киши чўкиб кетган.

Тезкор хизматлар Австрия, Чехия, Польша ва Руминиянинг пасттекисликдан иборат ҳудудларида тошқинга қарши чора-тадбирларни кучайтиришган. Польшада сув омбори тўлиб-тошиши билан боғлиқ хавфли вазият туфайли мамлакат жанубий-шарқидадаги Межигорже аҳоли пункти аҳолисини эвакуация қилган. Польшанинг Чехия чегарасидан унча узоқ бўлмаган Глухолази шаҳрида кўприк қулаб тушган. Строне-Шлёнске шаҳрида эса тошқин туфайли тўғон ўпирилган.

Чехияда чорак миллионта уй электрсиз қолган. Бу, жумладан ер юмшаб кетгани туфайли электр узатиш линиясига дарахтлар қулагани билан боғлиқ. Энг қийин вазият Моравия ва Силезияда юзага келгани айтилмоқда. Тошқин важидан Опава, Есеник, Крнов аҳолисининг бир қисми эвакуация қилиняпти. Ганушовице шаҳри кўчалари қарийб бутунлай сув остида қолган, бир неча уй қулаган.

Чехия пойтахти Прагада ҳам расмийлар сув тошқинига қарши тезкор чораларни кўришмоқда.

Украина президенти Владимир Зеленский якшанба оқшомидаги видеомурожаатида Киев тошқиндан зарар кўрган мамлакатларга украиналик қутқарувчилар ёрдамини таклиф қилганини билдирган. Аввалроқ Чехия ТИВ раҳбари Ян Липавский Украинадан ёрдам таклифи тушганини маълум қилган. Чехия ва Марказий Европанинг бошқа мамлакатлари сўнгги йилларда Россия босқинидан қочиб келган юз минглаб украиналикни қабул қилган эди.

Австрияда ўнлаб муниципалитет офат ҳудуди деб эълон қилинган. Пенцинг ҳудудида Дунай дарёси тошгани туфайли пойтахт Венада ҳам тошқин бошланган. Дунайга қуйилувчи Камп ва Кремс дарёларида сув сатҳи кўтарилгани қайд этилган.

Маълумотларга кўра, Руминияда табиий офат 20 та муниципалитет ва 8 та уездда талафотларга сабаб бўлган, минглаб уйга шикаст етган. Ўн минглаб одам қийинчиликларга дуч келган, уларнинг бир қисми эвакуация қилинган. Бош вазир Марчел Чолаку табиий офатдан энг кўп зарар кўрган Галац уездига қилган сафарида одамлар учун вақтинча бошпаналар барпо этилажагини эълон қилган. Мазкур уездда кўплаб автойўллар ва кўприклар тўсилган. Қутқарувчилар ҳарбийлар ёрдамида Галацдаги ҳамда Васлуй уездидаги турғунлар ёнига етиб бориш учун қайиқлардан ва бошқа усуллардан фойдаланишмоқда. Васлуйда одамлар уйларининг томига чиқиб, ёрдам кутиб ўтиришгани айтилмоқда.

Чехия, Польша, Венгрия, Словакия, Австрия ва Германия жанубида 13 сентябрь тонгидан буён кучли жала тинмаяпти. Табиий офатга “Борис” циклони сабаб бўлгани айтилмоқда. Метеорологлар тахминича, бу ҳудудларда ёғингарчилик 17 сентябргача давом этиши мумкин.

Украинанинг ҳарбийлар ва фуқаровий шахслардан иборат 49 нафар фуқароси Россиядаги асирликдан қутулиб, ватанларига қайтишганю Бу ҳақда Украина президенти Владимир Зеленский маълум қилди.

Асирликдан қутулган украиналиклар фотосуратини ҳам ёйинлаган Зеленский уларнинг асир алмашуви натижасида озод бўлганми ёки бошқа сабаб биланми – бунга аниқлик киритмаган, бироқ унинг сўзларидан улар асир алмашиш йўли билан озод бўлгани англашилади – президент фронтда россияликларни асир тушираётган ва шу тариқа “алмашиш фонди”ни тўлдираётган украиналик ҳарбийларга миннатдорлик билдирган.

Россия томони муҳтамал асир алмашуви ҳақида ҳозирча маълумот бергани йўқ.

Айни пайтда ҳарбий блогер алмашув “49 га 49” схемаси бўйича амалга оширилгани, озод этилган россиялик ҳарбийлар орасида эса Курск вилоятида асир тушган муддатли ҳарбий хизмат ўтовчи аскарлар борлигини иддао қилмоқда.

Озод бўлган асирлар орасида Украина Қуролли кучлари ҳарбийлари, Миллий гвардия, полиция ва чегара қўшинлари ходимлари бор.

Зеленский озод этилганлар орасида 2022 йил декабрида касал отасини кўриш учун Киевдан Россия томонидан аннексия қилинган Қримга боришга уринган пайтда ҳибсга олиниб, жосусликда айбланган қрим татар миллатига мансуб Ление Умерова ҳам борлигини қайд этган. у 2022 йил охиридан буён ҳибсда тутиб турилган, аввалига у хорижий фуқаролар учун марказда, 2023 йил майидан буён эса тергов ҳибсхонасида ушлаб турилган.

Зеленскийга кўра, озод бўлган украиналиклар ичида “Азовсталь” заводи мудофаасида иштирок этганлар ҳамда Украина қаҳрамони, ҳарбий медик Виктор Ивчук ҳам бор.