Ukraina prezidenti Vladimir Zelenskiy 6-noyabr oqshomida AQSHdagi prezident saylovida g‘olib chiqqan Donald Tramp bilan telefon orqali so‘zlashib, uni Oq uyga qaytishi bilan tabriklagan. Bu haqda Zelenskiyning X ijtimoiy tarmog‘idagi sahifasida bildirilgan.
Ukraina prezidenti Tramp bilan bo‘lib o‘tgan suhbatni “ajoyib” deb, uning g‘alabasini esa “tarixiy” va “ishonchli” deb atagan. Zelenskiyga ko‘ra, u Tramp bilan tig‘iz muloqot va hamkorlikni rivojlantirish haqida kelishib olgan, shuningdek, “adolatli dunyo uchun” AQSHning liderligi muhimligini urg‘ulagan.
Zelenskiy avvalroq boshqa dunyo liderlari qatorida Trampni g‘alaba bilan tabriklagan edi. U Trampning “kuch vositasida tinchlikka erishish”ga oid tezisi o‘ziga yoqayotgani va bu tezis Ukrainadagi urushga nisbatan ham qo‘llanilishi mumkinligini qayd etgan.
Tramp va uning saylov kampaniyasi vakillari Zelenskiy bilan bo‘lib o‘tgan suhbat yuzasidan hali izoh berganlaricha yo‘q.