Исроил ташқи ишлар вазири Силван Шалом Миср ва Иордания билан дипломатик алоқалар қайта тикланишидан сўнг Исроил яна 10та араб мамлакати билан алоқаларни яхшилаш ниятида эканини баён қилди.

Исроил радиосига берган интервюсида Шалом Исроил ва Фаластин Мухторияти ўртасидаги алоқаларда илиқлашув туфайли жаҳоннинг Исроилга нисбатан муносабати ҳам сезиларли ўзгараётганини қайд этди.
Кеча Исроилга Иорданиянинг янги элчиси борди. Янги элчининг тайинланишидан мақсад икки давлат ўртасида бузилган алоқаларни яхшилашдир.
Олдинги элчи бундан тўрт йил олдин, фаластинликларнинг Исроилга қарши ҳаракатлари бошланганида чақиртириб олинган эди.
Яқин келажакда Миср элчисининг ҳам Исроилга қайтиши кутилмоқда.