5 март куни Қозоғистоннинг Ақтўбе областидан ўтувчи Самара-Чимкент йўлининг 778-километрида рўй берган автоҳалокат оқибатида яна икки ўзбекистонлик нобуд бўлди.
Ўзбекистон Фавқулодда вазиятлар вазирлигининг маълум қилишича¸ Санкт-Петербургдан Тошкентга келаëтган Opel Astra енгил автомашинаси КАМАЗ билан тўқнашгани оқибатида 40 яшар ҳайдовчи Зоҳиджон Исоқов ва 43 яшар йўловчи Қодиржон Йўлдошев ўлган.
Россиядаги меҳнат муҳожиратидан қайтаëтган қурбонларнинг иккаласи ҳам Андижоннинг Асака туманидан бўлган¸ улар жасади Ақтўбега етказилган.
Фавқулодда вазиятлар вазирлиги эълон қилган баëнотда¸ Ташқи ишлар¸ Ички ишлар ва Соғлиқни сақлаш вазирлиги билан ҳамкорликда ўлганлар жасадини яқинларига етказиб бериш устида иш бораëтгани айтилади.
1 март куни Ақтау-Бейнау магистраль йўлида йўловчи ташувчи машина билан юк машинаси тўқнашиб кетиши оқибатида 7 нафар ўзбекистонлик муҳожир нобуд бўлди.
18 январь куни айни "Самара-Чимкент" автомобиль йўлида автобус ёниб кетиши оқибатида 52 ўзбекистонлик нобуд бўлди.