28 август куни расмий матбуотда Ўзбекистон президентининг янги фармони эълон қилинди.
Янги фармон 26 августдаги ПФ-5519 сонли «Ўзбекистон Республикаси Президенти Администрациясини ташкил этиш тўғрисида»ги Фармонга мувофиқ чиқарилган ва унда Администрациядаги кадр ўзгаришлари тасдиқланган.
Фармонга мувофиқ¸ Ўзбекистон президенти девони ва Ижро этувчи аппаратида ишлаб келган жами 21 амалдор мақомига ўзгартиш киритилган.
Хусусан¸ фармонга мувофиқ¸ Низомиддинов Зайнилобиддин Шахоббидинович Ўзбекистон Республикаси Президенти Администрацияси раҳбари лавозимига тайинланган¸ Ислом Каримов давридан бери президент девони ишлар бошқарувчиси бўлиб ишлаб келган Зелимхон Ҳайдаров (расман Зилемхан Хайдаров) администрациянинг Молия-хўжалик департаменти раҳбарлигига тайинланган.
Янги фармон билан Хайриддин Султонов (расман Султанов Хайритдин) президентнинг маслаҳатчиси – Спичрайтери лавозимига тайинланган ва “шу муносабат билан Ўзбекистон Республикаси Президентининг Оммавий ахборот воситалари, маънавият ва маърифат, маданият, санъат ва ижодий ташкилотларни ривожлантириш масалалари бўйича давлат маслаҳатчиси лавозимидан озод этилган”.
Шунингдек¸ президентнинг ёшлар, фан, таълим, соғлиқни сақлаш ва спорт масалалари бўйича маслаҳатчисининг биринчи ўринбосари лавозимига тайинланган Қаҳрамон Қуронбоев (расман Куранбаев Кахрамон Кучкарович) шу муносабат билан Ўзбекистон Республикаси Президентининг ёшлар масалалари буйича давлат маслаҳатчиси лавозимидан озод этилган".