Янгийўл туман тиббиёт бирлашмасига қарашли туғруқхона шифокори янги туғилган чақалоқни юз долларга сотганликда айбланиб қўлга олинди.
Бош прокуратуранинг хабар беришича, туғруқ бўлими акушер-гинекологи Р.Х., жорий йилнинг биринчи апрелида туғилган қиз чақалоқни ўлган деб расмийлаштирган. Шундан сўнг у юз доллар эвазига чақалоқни фуқаро С.М., дунёга келтирган деб сохта ҳужжатлар билан расмийлаштирган.
Мазкур ҳолат юзасидан Ўзбекистон Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
1 апрель куни Озодлик радиоси Қўқонда ҳамширалар 5 кунлик чақалоқни 500 долларга сотаётган пайтда ушлангани ҳақида хабар берган эди.
24 март куни Тошкент вилоятининг Тошкент туманида 3 ойлик чақалоғини 8 минг АҚШ долларига сотаётган фуқаро ушланди.
27 март куни эса Навоий вилоят, Кармана туман, Мичурин дала-ҳовлилар жамиятида яшовчи аёл 14 кунлик фарзандини 5 млн. сўмга бошқа бир фуқаро сотаётган вақтда қўлга олингани хабар қилинган.