Шу йил август ойида Kun.uz журналистларига тажовуз қилган Тошкент шаҳар Олмазор тумани ҳокимининг қурилиш масалалари бўйича ўринбосари Абдурасул Ваҳобов ишдан олинган.
Бу ҳақда Ўзбекистон президенти администрацияси ҳузуридаги Ахборот ва оммавий коммуникациялар агентлиги бош директори Комил Алламжонов Facebook каналида маълум қилди.
"Хабарингиз бор, бугун «Kun.uz» мухбирига ҳужум қилган Олмазор тумани ҳокими ўринбосари Абдурасул Ваҳобов ўз лавозимидан озод қилинди.
Шу муносабат билан биз яна бир бор таъкидлаймизки, Ахборот ва оммавий коммуникациялар агентлиги ҳар бир журналист ва блогерни унинг ҳуқуқлари бузилишидан ҳимоя қилишни давом эттиради", — деб хабар қилди Алламжонов ўз Facebook каналида.
Тошкент шаҳар ҳокими Жаҳонгир Ортиқхўжаев эса Олмазор туманининг собиқ ҳоким ўринбосари Абдурасул Ваҳобов прокуратура томонидан киритилган тақдимнома асосида эмас, ўз хоҳишига кўра ишдан кетганини маълум қилди.
Абдурасул Ваҳобов шу йилнинг 14 август куни Kun.uz оператори Шерзод Эгамбердиевга ҳужум қилган эди. Орадан бир кун ўтиб у Тошкент шаҳар ҳокимлиги матбуот хизматига берган интервьюсида Kun.uz мухбири Раҳматилла Исроилов муқаддам ундан тамагирлик йўли билан ер талаб қилгани ва бунинг эвазига катта миқдорда пора таклиф этгани ҳақидаги даъвони илгари сурган эди.
Маҳаллий тадбиркор арзини ўрганиш учун ҳокимликка борган Kun.uz журналистлари Олмазор туман ҳокими ўринбосари Абдурасул Ваҳобов уларга тажовуз қилиб, таҳририятга тегишли камера штативини синдирганини даъво қилишган.
Видеода kun.uz тасвирчисини ҳоким ўринбосари "ўзбекмисан", деб қувлаб юраркан, унинг ёнида милиция ходими бефарқ юргани кўринади.
Шу йилнинг 11 сентябр куни эса Тошкент шаҳар, Олмазор туман прокуратураси Ваҳобовнинг Kun.uz журналистларига тажовуз қилгани ҳақидаги даъвони ўрганиб, ҳоким муовини ҳаракатларида жиноят аломатлари йўқ, деб қарор чиқарганди.
Kun.uz нашри ҳуқуқшуноси Зафарбек Солижонов 25 сентябрь куни Озодликка бу ҳақда маълум қилар экан, улар туман прокурори қарори юзасидан энди юқори инстанцияга арз қилажакларини айтганди.
Браузерингиз HTML5 ни қўллаб- қувватламайди
Kun.uz ҳуқуқшуноси Зафарбек Солижонов билан суҳбат
Ўзбекистон Бош прокуратура матбуот хизматининг 28 сентябр куни маълум қилишича, Тошкент шаҳар прокурори томонидан ҳолат юзасидан Тошкент шаҳар ҳокими номига тақдимнома киритилган, тақдимнома кўриб чиқилиши натижасига кўра Ваҳобов эгаллаб турган лавозимидан озод қилинган.
Шунингдек, бошқа ҳолатлар юзасидан Тошкент шаҳар прокуратураси томонидан қўшимча текшириш ҳаракатлари давом этмоқда.
Бош прокуратура шаҳар прокуратурасининг жиноят ишиқўзғатишни рад этиш тўғрисидаги қарорини бекор қилиб, ишни қайтадан кўриб чиқиш бўйича топшириқ берган.