Ўзбекистоннинг Хитойдаги элчиси Бахтиëр Саидов 29 январь куни Хитой Ташқи ишлар вазирлигининг Европа ва Марказий Осиë департаменти раҳбари билан учрашиб¸ хориж фуқароларининг коронавирус тарқаган Ухан шаҳридан эвакуация қилиш масаласини муҳокама қилган.
Ташқи ишлар вазирлигининг хабар қилишича¸ Хитой мутасаддиси коронавирус эпидемияси ëйилишига йўл қўймаслик мақсадида Ухандаги карантин тугамагунча¸ Ўзбекистондан ўз фуқароларини олиб кетмасликни сўраган.
Хабардан англанишича¸ Хитой расмийси нафақат Ўзбекистон¸ балки бошқа хориж фуқароларининг ҳам Ухандан чиқишига ўрнатилган жиддий чекловни олиб ташлаш ҳозирча кун тартибида эмаслигини маълум қилган.
Ўзбекистон Ташқи ишлар вазирлиги баëнотида¸ Жаҳон соғлиқни сақлаш ташкилоти бош директори бошчилигидаги ишчи гуруҳнинг ҳозирда Хитойдаги вазиятни бевосита ўрганаëтгани айтилган.
ЖСТ мутахассислари ҳам¸ коронавирус тарқаган ҳудудлардаги чет эл фуқароларини эвакуация қилишнинг мақсадга мувофиқ эмаслигини билдирган.
Айни пайтда¸ ЖСТ халқаро ҳамжамиятни хотиржамликни сақлаш ва ëлғон хабарларга аҳамият бермасликка чақирган.
Вазирлик баëнотида шунингдек¸ Ухандан Ўзбекистонга қайтиб келган талабалардан зудлик билан Соғлиқни сақлаш вазирлиги ҳузуридаги Санитария-эпидемиологик осойишталик агентлигига боғланиш сўралган.