23 март куни Тошкент вилояти ҳокими раислигида коронавирус пандемиясига қарши курашиш фавқулодда комиссиясининг ишчи йиғилиши бўлиб ўтди.
Бу ҳақда хабар қилган вилоят ҳокимлиги матбуот хизматига кўра¸ йиғилишда 24 мартдан бошлаб “Тошкент вилояти ҳудудида жойлашган ва ноозиқ-овқат маҳсулотлари савдоси билан шуғулланадиган барча бозорлар фаолиятини тўхтатиш” ҳақида қарор қабул қилинган.
Расмий хабарда шунингдек¸ карантин талабларига риоя этмай, хўрандаларни қабул қилишда давом этаётган умумий овқатланиш шохобчаларига нисбатан чоралар кучайтирилиши ҳам таъкидланган.
“Корхона ва ташкилотлар томонидан ўз ишчи-ходимлари учун тиббий-гигиеник воситалар жамғарилиши, ҳудудда санитар-тозалаш, дезинфекция ишларини амалга оширилиши мажбурий ҳисобланади.
Шаҳар ва туман ҳокимликлари томонидан уй шароитида карантинда сақланаётган фуқароларни зарур озиқ-овқат маҳсулотлари билан таъминлаш чора-тадбирлари кўрилади”¸ дейилади Тошкент вилояти ҳокимлиги расмий хабарида.
Ўзбекистондаги энг йирик чакана ва улгуржи бозорлар¸ хусусан¸ Абу Сахий ва Бек-барака бозорлари Тошкент вилояти ҳудудида жойлашган.
Давлат статистика қўмитаси эълон қилган расмий маълумотга кўра¸ республика чакана савдо товар айланмасида энг юқори улуш Тошкент шаҳри ҳиссасига тўғри келади ва 2020 йилнинг январь ойида у республикадаги жами товар айланмасининг 22,9 фоизи (2.8 триллион сўм)ни ташкил этган.
Ҳозирча пойтахтдаги буюм бозорларининг ëпилишига оид расмий қарор йўқ.