Нефть қазиб олувчи давлатлар ташкилоти – ОПЕК ва бу ташкилотга қўшилмаган нефть қазиб олувчи давлатлар иштирокида видеоанжуман тариқасида ўтган ОПЕК+ йиғилишида томонлар нефт қазиб олишни май ва июнь ойларида суткасига 9 миллион 700 минг баррелга қисқартиришга келишиб олди.
Reuters агентлигининг ёзишича, 4 кун давом этган музокаралар марафони АҚШнинг қатъий босими остида ўтказилди. Президент Дональд Трамп бир неча ҳафтадан бери нефтнинг жаҳон нархи янада тушиб кетишининг олдини олиш мақсадида Россия ва Саудия нефть қазиб олишни қисқартириши масаласида келишиб олишини талаб қилиб келаётган эди.
ТАСС агентлиги ОПЕК+ видеоанжуманида ташкилотга аъзо барча 23 давлат нефть қазиб олишни қисқартиришга келишиб олганига эътибор қаратди. Бироқ Мексика бу масалада ўз позициясини ўзгартирмади ва нефть қазиб олишни суткасига 400 минг баррель қисқартиришга рози бўлмади.
Эрон нефть вазири Бижан Занганийнинг маълум қилишича, Мексика май ва июнь ойларида нефть қазиб олишни суткасига 100 минг баррелдан қисқартиришга рози бўлган. Мексиканингг ўрнига 300 минг баррель нефтни АҚШ қисқартиришга рози бўлди.