Самарқанд вилоятининг Оқдарё туманида икки таксичи йўловчи талашиб муштлашиб кетгани оқибатида, ҳайдовчилардан бири ҳалок бўлди.
ИИВ ҳузуридаги Тергов департаментининг 3 сентябрда маълум қилишича, воқеа 30 август куни соат 11:00 да Оқдарё туманида содир этилган.
24 ёшли О.С., ва 27 ёшли Ш.Т., йўловчи ташиш масаласида жанжаллашиб қолишган ва турли хил ножўя сўзлар билан бир-бирларини ҳақорат қилишган. Шундан сўнг улар соат тахминан 18:30 да “Уклон” қишлоғида жойлашган 36-сонли ўрта таълим мактабининг футбол майдонида яккама-якка муштлашишга келишиб олишган.
Муштлаш оқибатида Ш.Т., ҳушидан кетиб йиқилган, О.С., эса ҳодиса жойидан кетиб қолган. Воқеа гувоҳлари ҳушидан кетган йигитни йўловчи машинада тез ёрдам бўлимига олиб боришган. Бироқ кўрсатилган тиббий муолажаларга қарамасдан Ш.Т., олган тан жароҳатлари натижасида шифохонада вафот этган.
“Мазкур ҳолат юзасидан Оқдарё тумани ИИБ ҳузуридаги Тергов бўлими томонидан О.С., га нисбатан Ўзбекистон Республикаси Жиноят кодексининг 104-моддаси 3-қисми “д” банди (жабрланувчининг ўлимига олиб келган, қасддан баданга оғир шикаст етказиш) билан жиноят иши қўзғатилган. Жиноят иши бўйича О.С., айбланувчи тариқасида жалб қилиниб, унга нисбатан “қамоққа олиш” тарзидаги эҳтиёт чораси қўлланилган. Ҳозирда дастлабки тергов ҳаракатлари давом этмоқда", - дейилади хабарда.