O‘zbekistonda yangi ta’sis etilgan “Haqiqat va Taraqqiyot” sotsial-demokratik partiyasi yetakchisi Xidirnazar Allaqulov o‘zi va partiyadoshlariga nisbatan bosimlar davom etayotganini aytmoqda. Joriy yilnin 21 - iyun kuni Adliya vazirligi “talab etilganidan qariyb 3 marta kam imzolar taqdim etilgani” vajidan Allaqulov partiyasini ro‘yxatdan o‘tkazishni rad etgan edi.
Allaqulovning Ozodlik bilan suhbatda aytishicha, Toshkentning Yunusobod tumani Majburiy ijro byurosi xodimlari 12 -iyul kuni ogohlantirishsiz uning uyiga kelib, uydagi maishiy jihozlar - televizor, kir yuvish mashinasi va mikroto‘lqinli pechni musodara qilgan.
Ozodlik bilan suhbatda Allaqulov videoda aks etgan bu xolatni "mahalliy hokimiyat vakillari ishtirokidagi bosqinchilik" deb atadi.
4 - may kuni Toshkentning Yunusobod tuman ma’muriy sudi Allaqulovni Ma’muriy javobgarlik to‘g‘risidagi kodeksning 40-moddasi (Tuhmat, ya’ni bila turib yolg‘on, boshqa bir shaxsni sharmanda qiluvchi uydirmalarni tarqatish) bo‘yicha aybdor deb topib, bazaviy hisoblash miqdori (BHM)ning 20 barobari miqdorida jarimaga hukm qilgan edi.
Tarmoqda tarqalgan videoda Xidirnazar Allaqulov uyidan kir yuvish mashinasi, televizorini ko‘tarib olib chiqib ketayotgan MIB xodimlariga qarata: “Mana mol-mulk, olinglar, olib ketinglar, istagancha olinglar. 4 million 900 ming o‘rniga mana 17 million so‘mlik narsa. Qarshilik yo‘q. Lekin, Shovvozsoy bo‘yicha 1 milliard xalqning puli bo‘yicha kim va qachon hisobot beradi? Pandemiyaga sarflangan millionlar bo‘yicha kim va qachon hisobot beradi?,” deydi.
Браузерингиз HTML5 ни қўллаб- қувватламайди
MIB Hidirnazar Allaqulovning televizori, kiryuvish mashinasi, mikroto‘lqinli pechini musodara qildi
“Hokimiyat vakillari ishtirokidagi bosqinchilik”
Ozodlik bilan suhbatda Allaqulov videoda aks etgan holatni “mahalliy hokimiyat vakillari ishtirokidagi bosqinchilik” deb atadi.
“Menga 4 million 900 ming jarima belgilangan edi. Kecha kelib, 17 million so‘mlik, kir yuvish mashinasi, televizor, mikroto‘lqinli pechni olib kelishdi. Gruppovoy bosqinchilik bo‘ldi hokimlik vakillari ishtirokida. Maqsad, mahalla orasida meni sazoyi qilish, siyosatdan qaytarish. Hammasi uyushtirilgan. Uyimga kelib, OBONchilar hujum qilganlarini ko‘rdingizlar. Haqorat qilganlarini ko‘rdingizlar. Bular qonun oldida javob berishi kerak edi.
Bular nima qildi, meni mayda bezorilikda ayblab, sudga olib chiqishdi. Qo‘shnilardan yozdirib olishibdi. Har kuni uyida baqir-chaqir qilib tinchligimizni buzadi, turmush o‘rtog‘im bilan don olishimga qo‘ymayapti, deb yozib beribdi, pastdagi qo‘shni ayol. Uni turmush o‘rtog‘i yo‘qligini hamma biladi. Olinglar, dedim, kamlik qilsa yana beraman, dedim. Qarshilik qilmadik, videoda ko‘rgan bo‘lsangizlar kerak” , - deydi Allaqulov.
Браузерингиз HTML5 ни қўллаб- қувватламайди
MIB xodimlari Hidirnazar Allaqulovning uyidan maishiy texnikasini olib chiqib ketmoqda
Allaqulov shu yilning 31 - mart oqshomida bir guruh noma’lum odamlarning hujumiga uchragan edi.
Hujumchilar professordan siyosiy faoliyatini to‘xtatish hamda partiya uchun Yunusobod tumani, 17- mavzeda ijaraga olingan idorani bo‘shatib qo‘yishni talab qilgan.
Hodisaning ertasiga Allaqulov bosqinchilardan shikoyat qilib, IIBga ariza kiritgandi. Ammo ma’lum bo‘lishicha, bosqin uyushtirgan shaxslar ham unga qarshi ariza bilan murojaat qilgan.
Natijada, ularning arizasi inobatga olinib, Allaqulovga nisbatan Ma’muriy javobgarlik to‘g‘risidagi kodeksning 183-moddasi, ya’ni “mayda bezorilik” bo‘yicha ayblov e’lon qilindi.
Bundan avval partiya asoschisi Xidirnazar Allaqulov bir necha marta noma’lum ayollar va hukumatparast blogerlar tahdidiga ham uchragan.
Partiyaning yana bir faoli oilasi bilan ko‘chaga haydalmoqda
“Haqiqat va Taraqqiyot” partiyasining yana bir tashkilotchisi Muhammadamin Shermatovni esa, MIB 14 yil yashagan uyidan oilasi va nabiralari bilan ko‘chaga chiqarib tashlayapti. Olmazor tumani Majburiy ijro byurosi Shermatovga Toshkentning Qora-qamish dahasidagi hovlini bo‘shatib qo‘yish uchun uch kun muhlat bergan.
“Haqiqat va Taraqqiyot” partiyasi faoli Muhammadamin Shermatov.
Shermatov Ozodlik bilan suhbatda buni o‘ziga nisbatan siyosiy faoliyati tufayli o‘tkazilayotgan bosim deb hisoblashini bildirdi.
“Qarindoshimni uyida yashardim, uy olishga qurbim etmaydi. 14 yil shu uyda yashadim, hech kim hek narsa demagan. Mana endi, siyosiy faoliyatim tufayli qarindoshimga yozdirivolishib, uydan chiqarishyapti. 14 jon yashaymiz - farzandlarim, ikkita kelinim. Eng kichik nabiram 1 yoshga ham to‘lmagan. Ko‘chaga haydashyapti. Qarindoshlarimni majburlab yozdirishgan. O‘zlarini uylari bor ularni. Maqsad meni jazolash, sazoyi qilish. Uch kun muhlat bergan. MIB agar ko‘chaga chiqaradigan bo‘lsa, boradigan joyim yo‘q”, - deydi Shermatov.
“Haqiqat va Taraqqiyot” partiyasi faollarga bosimlarni hukumatning ularni siyosiy faoliyatdan chetlatishga urinish harakati, deya baholamoqda.
Ozodlik “Haqiqat va Taraqqiyot” partiyasi faollarining iddasi yuzasidan rasmiylar bilan bog‘lanishga harakat qildi.
O‘zbekiston Oliy sudining rasmiy saytida keltirilgan Jamoatchilik va ommaviy axborot vositalari bilan hamkorlik boshqarmasi boshlig‘i Aziz Abidov telefon raqamlariga qilingan qo‘ng‘iroqlar javobsiz qoldi.
Toshkent shahar sudining jamoatchilik va OAV bilan hamkorlik bo‘yicha bosh konsultanti Evelina Sinotova esa, Ozodlik savolini eshitgach: “Men bu haqda izoh berolmayman”, deyish bilan cheklandi.
O‘tgan hafta muxolifatdagi "Erk" partiyasi O‘zbekistonda yaqinlashib kelayotgan prezident sayloviga nomzod etib ko‘rsatgan Jahongir Otajonov bosimlar ortidan siyosiy faoliyatini vaqtincha to‘xtatayotgani haqida bayonot bergan edi.
Bundan oldingi chiqishlarida Otajonov ichki ishlar organlariga tinimsiz so‘roqqa chaqirilayotgani, unga tegishli xonadonlarga esa Majburiy ijro byurosi tomonidan taqiq qo‘yilgani haqida aytgan.
Muxolifatdagi “Erk” partiyasi Jahongir Otajonovning qarorini tushunish bilan qarshilashini bildirgan.
“O‘zbekiston hukumati har qanday muxolif harakat va har qanday muxolif fikrga dushmancha siyosatini faqat “Erk” partiyasi emas, yangi tuzilgan boshqa siyosiy tashkilotlarga nisbatan ham ochiqcha namoyish qilib kelmokda. Jahongir Otajonning bayonotidan keyin uning Prezidentlikka nomzodi ham avtomatik o‘laroq bekor bo‘ldi. “Erk” partiyasi mavjud siyosiy vaziyatda yaqinlashib kelayotgan Prezidentlik Saylovlariga nomzod ko‘rsatmasligini ham e’lon qiladi. Chunki bu qo‘shtirnoq ichidagi saylovda muxolifatning rasmiy ro‘yxatga olinmasligi tamomila aniq bo‘ldi. “Erk” partiyasi baynalminal tashkilotlar O‘zbekiston hukumatining bu siyosiy o‘yiniga kerakli bahoni berib, uning soxta saylovlariga kuzatuvchi yubormaslikka da’vat qiladi”, - deyiladi partiya bayonotida..
“Siyosiy maydonni tark etmaymiz”
“Haqiqat va Taraqqiyot” partiyasi yetakchisi Xidirnazar Allaqulov "maydonda yakka o‘zi qolsaham, siyosatni tark etmasligi”ni aytadi.
“Mamlakat qurolli kuchlarini avtomat va tanklari bilan bizga qarshi qo‘ysa ham siyosiy maydonni tark etmaymiz. Yakka o‘zim qolsam ham chekinish bo‘lmaydi. Partiyamiz faoliyati endi o‘n marta ortadi, aslo to‘xtamaydi”, - deydi Allaqulov.
O‘zbekiston Adliya vazirligi 21 - iyun kuni “talab etilganidan qariyb 3 marta kam imzolar taqdim etilgani” tufayli "Haqiqat va taraqqiyot" partiyasini ro‘yxatdan o‘tkazishni rad etgan edi.
Vazirlik Jamoatchilik bilan aloqalar bo‘limi tarqatgan xabarda aytilishicha, partiyani ro‘yxatdan o‘tkazish uchun 20 ming imzo kerak bo‘ladi, ammo “Haqiqat va taraqqiyot” faqat 9 873 ta imzo yiqqan.
"Haqiqat va taraqqiyot" partiyasi yetakchisi Xidirnazar Allaqulov partiyani ro‘yxatdan o‘tkazish uchun “keragidan ortiq” imzo yig‘ilganini aytdi.
"Yig‘ilgan imzolar hammasi bor va partiyani ro‘yxatdan o‘tkazish uchun yetarlisidan ham ortiq. Vazirlik rad etibdi, lekin partiya tuzish huquqmiz bizni qo‘limizda", - dedi Allaqulov.
Ozodlik o‘tgan oy “Haqiqat va taraqqiyot” partiyasining 10dan ortiq a’zo va tarafdorlari IIVga so‘roqqa chaqirilgani haqida xabar bergan edi.
O‘zbekistonda navbatdagi prezident saylovlari shu yil 24 - oktabrida bo‘lib o‘tadi.
Amaldagi prezident Shavkat Mirziyoyev rasman saylovlar bilan bog‘liq rejalarini e’lon qilmagan, ammo ko‘pchilik uning o‘z nomzodini qo‘yishi va ikkinchi muddatga saylanishiga shubha qilmaydi.
2019 - yil dekabridagi parlament saylovlarini kuzatgan YeXHT missiyasi O‘zbekistondagi nisbatan erkinlashgan matbuot siyosiy muxolifatning o‘rnini bosa olmaganini aytgan edi.