Россиядаги суд 1 апрель куни Озод Европа/Озодлик радиоси (RFE/RL) журналисти Алсу Курмашеванинг ҳибсда қолиш муддатини 5 июнгача узайтириш ҳақида қарор чиқарди, дея хабар қилди Озодликнинг татар-бошқирд хизмати.
Қозоннинг Совет туман суди адвокатларнинг Курмашевага нисбатан эҳтиёт чорасини уй қамоғига алмаштириш бўйича илтимосномасини ҳам рад этган.
Суд аввалида Курмашева журналистларга ўзини “жисмоний жиҳатдан яхши ҳис қилмаётганини, ҳибсхонадаги шароит эса “жуда ёмон” эканини билдирган.
Курмашева унга “минимал” даражада тиббий ёрдам кўрсатилаётганини, камерадаги шароит ўта ибтидоий эканини, масалан, унитаз ўрнида полда тешик очилгани ва ўша тешик ҳожатхона вазифасини ўташини айтган.
“Коммерсант” нашри хабарига кўра, судда АҚШ бош консули Стюарт Уилсон иштирок этган.
47 ёшли Алсу Курмашева ўтган йилнинг октябрь ойида Қозон шаҳрида ҳибсга олинган. Журналист аёл Россиянинг журналистлар, фуқаролик жамияти фаоллари ва бошқа шахсларни жазолашга йўналтирилган қонунига мувофиқ хорижий агент сифатида рўйхатдан ўтишдан бош тортганликда айбланган. Унга Россия армияси ҳақида “фейк” (ёлғон маълумот) тарқатганлик айблови ҳам қўйилган. Бу айблов судда исботини топган тақдирда, Курмашева 10 йилгача озодликдан маҳрум этилиши мумкин.
RFE/RL ва АҚШ ҳукумати мазкур айбловлар Курмашеванинг Прагадаги журналистик фаолияти учун қатағон усули эканини билдириб келади. Озодлик татар-бошқирд хизматининг Прагадаги қароргоҳида журналист бўлиб ишлайдиган Алсу Курмашева Татаристонга қари онасини зиёрат қилиб, унга ғамхўрлик кўрсатиш учун борган эди. У даставвал 2023 йилнинг 2 июнь куни Чехияга қайтаётганда Қозон аэропортида ушлаб қолинган, ўша ерда унинг АҚШ ва Россия паспортлари олиб қўйилган.
Кўплаб танқидчилар ва ҳуқуқбонлик ташкилотлари хорижий агентлар тўғрисидаги қонундан Кремль ҳар қанақа ўзгача фикрлиликни бостириш йўлида фойдаланаётганини иддао қилиб келишади. Шунингдек, Москва АҚШ фуқароларини Қўшма Штатлар қамоқхоналарида ўтирган россияликларга алмаштириш учун қўлга олаётганликда айбланади.
Жорий йилнинг 23 февраль куни матбуот эркинлиги ишига қўшган ҳиссаси учун Алсу Курмашева ЮНЕСКОнинг Гильермо Кано мукофотига номзод ўлароқ кўрсатилган.
1997 йилда таъсис этилган мазкур мукофот ўзи дуч келаётган “хавф-хатар ва таъқиб”га қарамай, бутун дунёда матбуот эркинлигини ҳимоя қилиш ва олға суришга улкан ҳисса қўшган киши ёки гуруҳларга бериб келинади.